جاڭا ونەركاسىپ ورنىنىڭ اشىلۋى كورەيا رەسپۋبليكاسىنىڭ پرەزيدەنتى مۋن چجە ءيننىڭ قازاقستانعا كەلۋ ساپارىمەن تۇسپا-تۇس كەلىپ وتىر. وسى ساپار اياسىندا ساياسي, ساۋدا-ەكونوميكالىق, ينۆەستيتسيالىق جانە مادەني-گۋمانيتارللىق سالاداعى ارىپتەستىك ماسەلەلەرىن تالقىلاۋ جوسپارلانعان. الماتى ىرگەسىندەگى يندۋستريالىق ايماقتا العاشقى قازىعى قالانعان Hyundai Trans Kazakstan كولىك زاۋىتى ەكى جاقتى ىقپالداستىق اياسىندا جۇزەگە اسۋدا. زاۋىتتى «استانا موتورس» كومپانياسى قر يندۋستريا جانە ينفراقۇرىلىمدىق دامۋ مينيسترلىگىنىڭ قولداۋىمەن سالاتىن بولادى.
قازىرگى كەزدە زاۋىتتى سالۋ ءۇشىن يندۋستريالىق ايماقتان تولىققاندى ينفرقۇرىلىمى بار 25 گەكتار جەر تەلىمى بولىنگەن. زاۋىت قۇرىلىسىنا 25 ملرد تەڭگە ينۆەستيتسيالانىپ, جەتى جۇزگە جۋىق جاڭا جۇمىس ورىندارىن اشۋ كوزدەلىپ وتىر. بۇل باعىتتا قاراىستىرىلعان قارجى كولەمى 32,5 ملن تەڭگەنى قۇرايدى. زاۋىتتى سالۋعا جەكە قاراجاتپەن قاتار قازاقستان دامۋ بانكىنەن دە قوسىمشا قارجى كوزدەرى قاراستىرىلۋدا. العاشقى ءاۆتوموبيلدى شىعارۋ 2020 جىلعا قاراي جوسپارلانىپ وتىر.
كورەيادان كەلگەن دەلەگاتسياعا جىلى ءىلتيپاتىن ءبىلدىرىپ, وڭتۇستىك استانانىڭ ينۆەستيتسيالىق احۋالىنا قاتىستى بىرقاتار مالىمەتتەرمەن تانىستىرعان الماتى اكىمى باۋىرجان بايبەك وتكەن جىلى قالا ەكونوميكاسىنا سالىنعان ينۆەستيتسيا كولەمى 10,5, ال بيىلعى جىلعى قاڭتار-ناۋرىز ايلارىندا 4,8 پايىزعا ارتقاندىعىن جەتكىزدى. ونىڭ ىشىندە شەتەلدىك ينۆەستيتسيا كولەمى 21,4 پايىزعا ارتىپ, 111,1 ملرد. تەڭگەگە ۇلعايعان. ال سوڭعى ون جىلدا وڭتۇستىك كورەيادان قازاقستانعا سالىنعان ينۆەستيتسيا كولەمى 3,8 ملرد اقش دوللارىن قۇرايدى. وڭتۇستىك كورەيامەن اراداعى تاۋار اينالىمى 182 ملن اقش دوللارىنا جەتسە, ءبىر عانا الماتى قالاسىندا 61 بىرلەسكەن كاسىپورىن جۇمىس ىستەيدى.
بۇگىندە ايماقتا بيزنەسكە قولايلى جاعداي تۋعىزۋ ماقساتىندا قاجەتتى ينفرقۇرىلىم جاساقتالعان. وسىنىڭ نەگىزىندە قۇرىلعان يندۋستريالىق ايماقتا قۇنى 144 ملرد. تەڭگە كولەمىندە 39 جوبا جۇزەگە اسۋدا, ونىڭ ىشىندە Hyundai Trans Kazakstan بار. بۇگىندە بەس كاسىپورىن بەلسەندى بولسا, ونىڭ ىشىندە جاپونيانىڭ «Tokyo Rope Almaty» مەتالل بۇيىمدار زاۋىتى, رەسەيدىڭ كابەل ونىمدەرىن شىعاراتىن «KMK Investment» زاۋىتى جانە «BRB APK» جىلىجاي كەشەنى بار. اتالعان كومپانيالار تاراپىنان 600 ملن. كولەمىندە سالىق تولەنىپ, 800-دەن استام جۇمىس ورىندارى اشىلعان.
ەكى ەلدىڭ ەكونوميكالىق سالاداعى ىقپالداستىعىنا توقتالعان وڭتۇستىك كورەيا ساۋدا, ونەركاسىپ جانە ەنەرگەتيكا ءمينيسترى سون يۋن مو كولىك زاۋىتىن سالۋعا بايلانىستى كەلىسىم شارتتىڭ العاشقى كەلىسسوزدەرى ناۋرىز ايىندا سەۋل قالاسىندا وتكەن ەكونوميكالىق ماسەلەلەر بويىنشا قازاقستان-كورەيا كوميتەتىنىڭ وتىرىسىندا تالقىلانعاندىعىن جەتكىزدى. بۇگىندە كورەيا الەمدىك نارىقتا اۆتوكولىك قانا ەمەس, جارتىلاي دايىن ونىمدەر, اقپاراتتىق-كوممۋنيكاتسيالىق تەحنولوگيالار جانە روبوتوتەحنيكا سالاسىندا دا كوشباسشى ورىنداردى يەلەنىپ كەلەدى. ەندىگى كەزەكتە قازاقستان اۋماعىندا سالىنعان زاۋىت ونىمدەرى ىشكى نارىقتا عانا ەمەس رەسەي, وزبەكستان مەن وزگە دە ەلدەرگە ەكسپورتتالاتىن بولادى. كورەيا ۇزاق جىلداردا جيناعان تاجىريبەسىمەن ءبولىسىپ, قازاقستاننىڭ ونەركاسىپ سالاسىنداعى سەنىمدى ارىپتەسىنە اينالماق.
ماشينا جاساۋ ءوندىرىسى قازاقستاننىڭ يندۋستريالاندىرۋ باعدارلاماسىنداعى باسىم باعىتتاردىڭ ءبىرى ەكەندىگىن اتاپ وتكەن قر يندۋستريا جانە ينفراقۇرىلىمدىق دامۋ ءمينيسترى رومان سكليار بۇگىندە كورەيامەن بىرلەسكەن ارىپتەستىك اياسىندا وتاندىق ماشينا جاساۋ سالاسىنىڭ ستراتەگياسى ازىرلەنگەندىگىن جەتكىزدى. كوممەرتسيالىق ماقساتتا قولعا الىنعان بۇل جوباعا مەملەكەت تاراپىنان قولداۋ كورسەتىلىپ وتىر. جاڭا زاۋىت بولاشاقتا ءونىم كولەمىن ۇلعايتۋعا مۇمكىندىك بەرۋمەن قاتار ورتالىق ازيادان وزگە دە ەلدەرگە ەكسپورتتىق الەۋەتىن ارتتىرىپ, كورەيانىڭ ماشينا جاساۋ وندىرىسىندەگى وزىق تاجيريبەلەرى وتاندىق ونەركاسىپ سالاسىنىڭ دامۋىنا تىڭ سەرپىن بەرەدى. ەلىمىزدە بۇگىندە SsangYong, حەا, Hyundai الەمدىك تانىمال برەندتەردىڭ ءوندىرىسى ارتىپ كەلەدى. وتكەن جىلى ەلىمىزدە 32000 اۆتوكولىك وندىرىلگەن.
Astana Group پرەزيدەنتى نۇرلان سماعۇلوۆ جاڭا زاۋىت ىرگەسىنىڭ قالانۋى ەلىمىزدىڭ اۆتوكولىك ءوندىرىسى ءۇشىن ايتۋلى وقيعا دەپ اتاپ ءوتتى. Hyundai وتاندىق ماشينا شىعارۋ نارىعىنا جاڭا تەحنولوگيالىق مۇمكىندىك بەرە وتىرىپ, بۇرىنعىلارىنا مۇلدەم ۇقسامايتىن زاماناۋي ۇلگىلەرىمەن ەرەكشەلەنەدى. ءارى تاياۋ بولاشاقتا ەۋرازيالىق ەكونوميكالىق وداق ەلدەرىنە جوعارى ساپالى ءونىم ەكسپورتتاۋ مۇمكىندىگى جاسالادى. ال ماشينا جاساۋ سالاسىنداعى مامان ماسەلەسى رەسەيمەن كەلىسىمدەر اياسىندا جۇزەگە اساتىن بولادى.
بۇگىندە اتالعان كومپانيا ەلىمىز نارىعىنا 11 اۆتوموبيل برەندىن ۇسىنىپ وتىر ءارى Hyundai جەڭىل جانە كوممەرتسيالىق تەحنيكاسىنىڭ رەسمي ديستريبيۋتورى بولىپ تابىلادى. 2011 جىلدان Hyundai كوممەرتسيالىق تەحنيكاسىن قۇراستىراتىن اۆتوموبيل قۇراستىرۋ كاسىپورنى ىسكە قوسىلىپ, رەسەيگە, بەلورۋس جانە تاجىكستان ەلدەرىنە ەكسپورتتالا باستىدى. قازاقستانداعى Hyundai ەڭ كوپ ساتىلاتىن اۆتوموبيلدەردىڭ ۇشتىگىنە كىرەدى.
جاڭا كاسىپورىننىڭ قۋاتى ءبىرىنشى كەزەڭدە جىلىنا 30 مىڭ, ال ەكىنشىسىندە 45 مىڭ اۆتوموبيل شىعارۋ مۇمكىندىگىنە يە. ساپالى ءارى باعاسى جاعىنان قولجەتىمدى Hyundai ماركالى جەڭىل كولىكتەرمەن وتاندىق نارىقتى عانا ەمەس, ەلدىڭ ەكسپورتتىق الەۋەتىن ارتتىرۋدىڭ مۇمكىندىگى زور. زاۋىتتا Hyundai برەندىنىڭ بارلىق ساندىك ۇلگىلەرى قۇراستىرىلماق. ءبىرىنشى كەزەڭدە Hyundai جەلىسى جەڭىل مودەلدەرىنىڭ تولىق تسيكلىن, كەيىننەن Creta مودەلدەرىن شىعارۋ جەلىسى ىسكە قوسىلاتىن بولادى.
زاۋىتتىڭ قۇرامىنا دانەكەرلەۋ تسەحى, بوياۋ تسەحى, قۇراستىرۋ تسەحى, پلاستيك پانەلدەردى شىعارۋ تسەحى مەن ساپانى باقىلاۋ ءبولىمى كىرەدى. زاۋىت وڭتۇستىك كورەيا جانە جاپونيادا وندىرىلگەن جاڭا تەحنولوگيالارمەن جابدىقتالاتىن بولادى.
