ەرتەڭىمىز – ساپالى بىلىمدە

قازىرگى عالامدانۋ زامانى قانداي ەلدىڭ بولماسىن دامۋ جو­لىن انىقتاۋىنا ۇلكەن سالماق سالىپ وتىر. ءححى عاسىر, ءبىر جاعى­نان, عىلىم مەن ءوندىرىستىڭ قار­قىن­داپ دامىعان, يننوۆاتسيالىق تەحنولوگيالار عاسىرى بولسا, ەكىن­شى جاعىنان, دامىعان ەلدەر ەكونو­ميكا الەمىندە ءوز باعىت-باعدارىن بەكەم ۇستاپ, شامالارى جەتكەنشە, ەشكىمدى جاقىنداتپاي, وق بويى الدا ءجۇرۋدى ماقسات تۇتۋدا. وسىن­داي كۇردەلى كەزەڭدە بار ەلدىڭ ەكونوميكاسىنا اۋىر جۇك سالعان جاھاندىق داعدارىس باستالدى. بۇل داعدارىس قاي ەلگە بولماسىن, ءۇل­كەن سىن ساعاتى بولدى. ەلىمىز دە بۇل داعدارىستان شەت قالا المادى. بىراق, كورەگەندىك دانالىعىن ءدۇ­نيە ءجۇزىنىڭ وزىق ويلى عۇلامالارى مويىنداپ وتىرعان, ءبىزدىڭ ەلبا­سىمىز نۇرسۇلتان ءابىش ۇلى نازار­باەۆتىڭ ساليقالى ساياساتىنىڭ ارقاسىندا, قازاق ەلى بۇل داع­دارىس­قا توتەپ بەردى. وسى داعدارىستىڭ ساباعىن بىزگە تەرەڭ ءتۇسىندىرىپ كەلگەن ەلباسى ءوز جولداۋىندا: “مەنىڭ باستى ماقساتىم – ەلىمىزدىڭ الداعى ونجىلدىقتاعى ەكونوميكالىق ورلەۋىن قامتاماسىز ەتىپ, جاڭا مۇمكىندىكتەرگە جول اشۋ”, – دەپ ويىن اشىق ايتادى. مەنىڭ ويىمشا, بۇل جولداۋ ەشبىر قازاقستاندىقتى بەي-جاي قالدىرعان جوق. سەبەبى, ءار ادام­نىڭ كوكىرەگىنە تەرەڭ وي سالعان, ەلدىڭ كەلەشەك دامۋىنىڭ انىق باعىت-باعدارىن كورسەتكەن ۇلكەن جولداۋ بولدى. جولداۋدا ەلىمىزدە ءبىلىم بەرۋ ساپاسىن دۇنيە ءجۇزىنىڭ وزىق ەلدەرى دەڭگەيىنە جەتكىزۋ ماقساتىندا ات­قا­رىلۋى قاجەتتى ەڭ ءتۇيىندى ماسە­لەلەر ناقتىلى ايتىلعان. ەلىمىز ەگەمەندىك العاننان بەرى ەلباسى جاستارعا سانالى تاربيە, ساپالى ءبىلىم بەرۋ ماسەلەلەرىن كۇن تارتىبىنەن شىعارعان ەمەس. بىزدەردى ەلباسىنىڭ ءبىلىم بەرۋ سالاسىن تەرەڭ بىلەتىنى ءتانتى ەتەدى. بىردە, ەلباسى, جاپون ەلىندە عاسىرلار بويى ساقتالىپ كەلە جاتقان ۇلت­تىق رۋحاني ادامگەرشىلىك تاربيە­نىڭ ماڭىزىنا ەرەكشە كوڭىل ءبول­گەن بولسا, ۇستىمىزدەگى جىلى ۇكىمەت مۇشەلەرىمەن وتكىزگەن ماجىلىستە, فينن ەلىنىڭ دامۋ ءۇردىسىن ۇيرەنۋ­دىڭ قاجەتتىگىنە توقتالدى. وسى ەكى ەلدىڭ عارىشتاپ دامۋىنىڭ ءتۇپ نە­گىزى ولاردا ءبىلىم بەرۋ جۇيەلەرىنىڭ عىلىمي نەگىزدە دۇرىس ۇيىمداس­تىرىلعانىندا بولىپ وتىر. ءبىلىم بەرۋ سالاسىندا ەڭبەك ەتەتىن قىزمەتكەرلەر الدىنا ناق­تىلى ماقسات-مىندەتتەر جۇكتەل­گەن. 2020 جىلى ەلىمىزدە 12 جىل­دىق ءبىلىم بەرۋ جۇيەسى ناتيجەلى جۇمىس جاساۋى ءتيىس, كاسىپتىك جانە تەحنيكالىق ءبىلىم ەكونوميكا سۇرانىستارىنا تولىق جاۋاپ بەرۋلەرى كەرەك, ەلىمىزدىڭ جوعارى وقۋ ورىندارى رەيتىنگى الەمدەگى وزىق ۋنيۆەرسيتەتتەر رەيتىنگى توپتاماسىنا قوسىلۋى قاجەت. ءبىلىمنىڭ ءتۇپ قازىعى مەكتەپتە قالانادى. ىرگەتاسى جوق جەردە عي­مارات تا جوق. 12 جىلدىق ءبىلىم بەرۋ جۇيەسىنە ءوتۋدىڭ باستى ماق­ساتى – ءبىلىم بەرۋگە نەگىزدەلگەن وقىتۋ جۇيەسىنەن, ناتيجەگە باعدار­لانعان ءبىلىم بەرۋ جۇيەسىنە كوشۋ. مۇنداي جۇيە بارلىق دامىعان ەلدەردە ناتيجەلى جۇمىس جاساۋدا. وسىنداي جۇيە تولىق ىسكە اسىرىل­عان جاعدايدا عانا ءبىلىم ساپاسى قارقىندى داميتىن بولادى. بۇل ءبىزدىڭ ءبارىمىزدىڭ دە ورتاق ماقساتىمىز بولۋى كەرەك دەپ ويلايمىز. قازىرگى جاھاندانۋ زامانىندا ەلىم, جەرىم, ءتىلىم دەپ سوققان جۇرەگى بار, ءھام زەيىندى دە زەردەلى جاستار تاربيەلەگەن جاعدايدا عانا قازاق ەلىنىڭ كەلەشەگى كەمەل بولاتىنىن ەسكەرگەنىمىز ابزال. اسقاربەك قۇسايىنوۆ, قازاقستان پەداگوگيكالىق عىلىمدار اكادەمياسىنىڭ پرەزيدەنتى.