فوتو: دەنساۋلىق ساقتاۋ مينيسترلىگى
تەكسەرۋ ناتيجەلەرى
2025 جىلى جۇرگىزىلگەن باقىلاۋ شارالارىنىڭ قورىتىندىسى بويىنشا ەلىمىزدە 400-گە جۋىق دەنساۋلىق ساقتاۋ سۋبەكتىسىنىڭ قىزمەتى توقتاتىلدى. تەكسەرۋ بارىسىندا 500-دەن استام اكىمشىلىك جازا قولدانىلىپ, سالىنعان ايىپپۇلداردىڭ جالپى سوماسى 70 ملن تەڭگەدەن اسقان.
قاداعالاۋ تاجىريبەسىندە العاش رەت جەدەل دەن قويۋ تەتىكتەرى ىسكە قوسىلدى. اتاپ ايتقاندا, مەديتسينالىق ۇيىمداردىڭ قىزمەتىن ۋاقىتشا توقتاتا تۇرۋ, ليتسەنزياسىز جۇمىس ىستەگەن نىسانداردى جابۋ جانە بىلىكتىلىك تالاپتارىنا ساي كەلمەگەن مەديتسينا قىزمەتكەرلەرىن قىزمەتتەن شەتتەتۋ شارالارى قولدانىلدى.
فارماتسەۆتيكا سالاسىنداعى بىلىق: جالعان قۇجاتپەن مەديتسينالىق جابدىقتار جەتكىزگەن كومپانيا انىقتالدى
قاي باعىتتارعا ەرەكشە نازار اۋدارىلدى؟
تەكسەرۋلەر ەڭ الدىمەن جەكە ەمشارا كابينەتتەرىنە, ناركولوگيالىق جانە وڭالتۋ ورتالىقتارىنا, سونداي-اق ستوماتولوگيالىق كلينيكالارعا باعىتتالدى. ناتيجەسىندە ليتسەنزياسىز قىزمەت كورسەتۋ مەن مەديتسينالىق كومەك ستاندارتتارىن ساقتاماۋ فاكتىلەرى كەڭ تارالعانى انىقتالدى.
ەلىمىز بويىنشا جۇمىس ىستەپ تۇرعان 1900-دەن استام جەكە ەمشارا كابينەتى انىقتالىپ, ونىڭ 406-سى, ياعني 20,5 %-ى ليتسەنزياسىز قىزمەت كورسەتكەن. تەكسەرۋ جانە ءتۇسىندىرۋ جۇمىستارىنىڭ ناتيجەسىندە 247 كابينەت ءوز ەركىمەن جۇمىسىن توقتاتتى.
جەكە ناركولوگيالىق جانە وڭالتۋ ورتالىقتارى بويىنشا 39 تەكسەرۋ جۇرگىزىلىپ, 14 جاعدايدا ليتسەنزيانىڭ بولماۋى انىقتالدى. ال ستوماتولوگيالىق قىزمەت كورسەتەتىن 313 كلينيكانىڭ 143-ءى ءتۇسىندىرۋ جۇمىستارىنان كەيىن ءوز قىزمەتىن توقتاتۋعا شەشىم قابىلداعان.
ەڭ ءجيى كەزدەسەتىن بۇزۋشىلىقتار
مينيسترلىك مالىمەتىنشە, تەكسەرۋ بارىسىندا انىقتالعان نەگىزگى زاڭبۇزۋشىلىقتار مىنالار:
- ليتسەنزياسىز قىزمەت كورسەتۋ بويىنشا 179 حاتتاما تولتىرىلىپ, 3,9 ملن تەڭگە ايىپپۇل سالىنعان;
- فارماتسەۆتيكالىق قىزمەت قاعيدالارىن بۇزۋ دەرەگىمەن 85 حاتتاما جاسالىپ, 19,5 ملن تەڭگە وندىرىلگەن.
سونىمەن قاتار بىلىكتىلىك تالاپتارىنا سايكەس كەلمەۋ, مەديتسينالىق كومەك ستاندارتتارىن ورەسكەل بۇزۋ, تىركەلمەگەن دارىلىك زاتتار مەن مەديتسينالىق بۇيىمداردى قولدانۋ فاكتىلەرى دە تىركەلگەن.
الداعى جوسپارلار
دەنساۋلىق ساقتاۋ مينيسترلىگى 2026 جىلدان باستاپ جەكە مەديتسينالىق ۇيىمدارعا باقىلاۋدى ودان ءارى كۇشەيتۋدى جوسپارلاپ وتىر. ونىڭ ىشىندە تمككك مەن ءمامس شەڭبەرىندە كەشەندى تەكسەرۋلەر جۇرگىزۋ, ليتسەنزيالاردىڭ قولدانىلۋ مەرزىمىن 5 جىل سايىن قايتا باعالاۋ, ليتسەنزيادان كەيىنگى باقىلاۋدى تسيفرلاندىرۋ جانە جاساندى ينتەللەكت ەلەمەنتتەرى بار تاۋەكەلدەردى باسقارۋ جۇيەسىن ەنگىزۋ كوزدەلگەن.
مينيسترلىك ازاماتتارعا مەديتسينالىق كومەك الار كەزدە ۇيىمنىڭ ليتسەنزياسى مەن مەديتسينا قىزمەتكەرلەرىنىڭ بىلىكتىلىگىن تەكسەرۋگە كەڭەس بەرەدى. ەگەر زاڭبۇزۋشىلىق انىقتالسا, مەديتسينالىق جانە فارماتسەۆتيكالىق باقىلاۋ كوميتەتىنىڭ اۋماقتىق دەپارتامەنتتەرىنە E-otinish جۇيەسى ارقىلى جۇگىنۋگە بولادى.
مىندەتتى مەديتسينالىق ساقتاندىرۋ قورى نەگە قارجى مينيسترلىگىنە بەرىلدى؟
