ءوز جۇمىسىن توقتاتقان نىساندار سوت شەشىمىمەن مەملەكەت مەنشىگىنە قايتارىلىپ, ىسكەر كاسىپكەرلەرگە بەرىلە باستادى. «رادۋگا» كوپبەيىندى كاسىپورىن سانالادى. سوڭعى جىلدارى ىشىندە بەس نىسانعا كۇردەلى جوندەۋ جۇرگىزىپ, ءوندىرىس وشاقتارىن سالدى. تاعام, گيگيەنا,پلاستيكالىق بۇيىمدار شىعارۋمەن اينالىسادى. ەندى تاعى ءبىر يەسىز قالعان عيماراتتى ىسكە جاراتىپ, زاماناۋي كوتەرمە-ساۋدا ورتالىعىن تۇرعىزىپ, كۇزگە سالىم ىسكە قوسپاق. ونىڭ جالپى اۋماعى 6 مىڭ شارشى مەتردى قۇرايدى.
سەرىكتەستىك تۇرمىستىق حيميا شىعاراتىن فابريكا سالۋدى دا جوسپارلاپ وتىر. قازىر تسەحتا ايىنا 100 توننا سۇيىق سابىن شىعارىلادى. قاجەتتى قۇتىلار دا وسىندا دايىندالادى. شيكىزات جەرگىلىكتى جەرلەردەن جانە رەسەيدەن اكەلىنەدى. ءونىمنىڭ ءبىر بولىگى سىرتقا جونەلتىلەدى. جاڭا جەلى ىسكە قوسىلعاننان كەيىن جىلىنا 6 مىڭ توننا سۇيىق جانە قاتتى سابىن وندىرىلەتىن بولادى. سونىمەن قاتار اۋىل شارۋاشىلىق اگرەگاتتارىن شىعارۋ دا بەلگىلەنگەن. حالىق سۇرانىسىنا يە ەلەكتر قۇرىلعىلارىنا باسىمدىق بەرىلەدى. بۇل تسەحتار كەزىندە پەتروپاۆل اۋىر ماشينا جاساۋ زاۋىتىنىڭ مەنشىگىنە بولعان.
بوس تۇرعان عيماراتتىڭ ءبىرىن «PP Solutions» جشس-ءى يەلەندى. بۇرىنعى كالينين زاۋىتى اۋماعىندا قايتا قالپىنا كەلتىرۋ جۇمىستارىن باستاپ كەتتى. مۇندا زاماناۋي «داتا» ورتالىعى ورنالاسپاق. سەرۆەرلەر ورناتىلىپ, الەمدىك ستاندارتتارعا ساي اقپاراتتىق قىزمەتتەر ۇسىنىلادى. سونداي-اق بەينە, اۋديو, ەلەكتروندىق اقپاراتتاردىڭ كەز كەلگەن ءتۇرى وڭدەلەدى. ورتالىق 2020 جىلى پايدالانۋعا بەرىلىپ, 150 ادام جۇمىسپەن قامتاماسىز ەتىلەدى
