ايتا كەتەر جايت, اتالمىش شارا 2017 جىلدان بەرى ءداستۇرلى تۇردە وتكىزىلىپ كەلەدى. شارانىڭ ۇيىمداستىرۋشىسى – «QazaqGeography» رەسپۋبليكالىق قوعامدىق بىرلەستىگى مەن ITECA كومپانياسى.
«Almaty Travel Fest 2019» قوناقتارى قىزىقتى اڭگىمەلەر مەن پرەزەنتاتسيالار تۇرىندە تىلسىم سىرعا تولى الىس جولدارعا «ساياحاتقا» اتتاندى. QazaqGeography-ءدىڭ ەكسپەديتسيالارى مەن قازاقستاننىڭ تۋريستەرگە ارنالعان تاريحي مەكەندەرى, قورىقتارى جايلى نۇرجان العاشوۆ ءسوز باستادى. شاراعا قاتىسۋشىلاردى جىل سايىن ارال ماسەلەسىنە قاتىستى وتكىزىلەتىن عىلىمي ەكسپەديتسيا قىزىقتىردى. ودان بولەك, قازاقستانداعى ىشكى جانە سىرتقى ءتۋريزمدى دامىتۋعا قاتىستى جاسالىپ جاستقان جۇمىستار جايلى اڭگىمە ءوربىدى. وسى ورايدا, ءتۋريزمدى دامىتۋدىڭ باستى جولدارىنىڭ ءبىرى – كەلگەن قوناقتارعا جاسالاتىن جاعداي مەن جىلى شىراي تانىتۋدىڭ قانشالىقتى ماڭىزدى ەكەنى تالقىلاندى.
كورشىلەس قىرعىزستاننىڭ تاڭ قالدىرار تابيعاتىن بىشكەكەتەن كەلگەن قوناق ازامات اكماتوۆ باياندادى. ماروككونىڭ قۇپيالارى جايلى دينارا كاليموۆا ايتىپ بەرسە, رەسەي ساياحاتشىسى ەۆگەني اندروسوۆ جاڭا زەلاندياعا ساپارى جايلى ءسوز قوزعادى. تانىمال بلوگەر الەكساندر تسوي «سولتۇستىك جارىقتارىن» ىزدەۋدەگى ءوز حيكاياسىن بايانداپ, كوپشىلىك نازارىن قىزىقتى وقيعالارىمەن باۋرادى. لايفستايل بلوگەر ساۋلە سەرگازيەۆنا وڭتۇستىك افريكاعا ساپارى جايلى جانە سول ايماققا جولعا شىققىسى كەلگەن جانداردىڭ قانداي نارسەلەرگە نازار اۋدارۋ كەرەك ەكەنىن تىلگە تيەك ەتتى.
فورۋمنىڭ اياقتالۋىنا وراي, جينالعاندار اراسىندا «نسك» ساقتاندىرۋ كومپانياسى, «SCAT» اۆياكومپانياسى مەن ماروككو ەلشىلىگى ۇسىنعان باعالى سىيلىقتار ويناتىلدى. ايتا كەتەر جايت, «نۇر-سۇلتان قالاسىنان ۇلان-باتورعا» دەيىنگى اۋە بيلەتىن الماتى قالاسى تۇرعىنى جەڭىپ الدى.
