رۋحاني شارانى ۇيىمداستىرۋشى ۋنيۆەرسيتەت رەكتورى التىنبەك نۋح ۇلىنىڭ ايتۋىنشا, جاڭا كىتاپ «فوليانت» باسپاسىنان 2,5 مىڭ دانامەن شىققان.
كىتاپتا عالىم قانىش ساتباەۆ جايلى م.سارسەكەنىڭ عۇمىر بويى جيناعان ماتەريالدارى مەن سوڭعى ۋاقىتتاردا عانا بەلگىلى بولعان دەرەكتەرى جازىلعان.
ال, كىتاپ وبلىس اكىمى بولات باقاۋوۆ, شىعىس قازاقستان وبلىسىنىڭ اكىمى دانيال احمەتوۆتىك قولداۋىمەن باسىلىپ شىققان.
جازۋشى, «قۇرمەت» جانە «پاراسات» وردەندەرىنىڭ يەگەرى 84 جاسقا كەلگەن مەدەۋ سارسەكە اعامىز عۇمىرىنىڭ 60 جىلعا تاياۋ ۋاقىتىن قانىش ساتباەۆتىڭ ءومىرىن زەرتتەۋگە ارناعان ەكەن.
- مەن دە تاۋ-كەن سالاسى ماماندىعىنا وقىپ, ءبىلىم الدىم. بىراق, ادەبيەتكە قۇشتار بولدىم. بىرنەشە جىل ءوز ماماندىعىم بويىنشا وندىرىستە ينجەنەر بولىپ ىستەدىم. ءبىر كۇنى الكەي مارعۇلان اعامىز مەنى كورگىسى كەلەدى دەگەندى ەستىدىم. الماتىعا بارىپ جولىقتىم. ول كىسى مەنىڭ كىتاپتارىمدى وقىعانىمدى ايتىپ, باعالاي كەلە, قانىش اعاڭ تۋرالى جاز دەپ ءوتىنىش ءبىلدىردى. ول كەزدە قانەكەڭنىڭ اتاعىن ەستىگەنىمىز بولماسا, ءجۇزىن كورمە-گەنمىن. جۇرەكسىنىپ, قولىمنان كەلمەيدى دەپ ەدىم, ۇرسىپ تاستادى. ەكى-ءۇش كۇن ويلانىپ, الەكەڭە قايتا بارىپ, تاپسىرماسىن قابىلدادىم,-دەيدى مەدەۋ اعا.
ساتباەۆ تۋرالى كىتاپتاردى جازىپ بىتىرگەن سوڭ, قايتادان تاۋ-كەن ينجەنەرى قىزمەتىنە ورالماق بولادى.
بىراق, عالىم قانىشتىڭ ەڭبەگىن, ءومىرىن زەرتتەۋ مەدەۋ سارسەكەنىڭ عۇمىر بويعى تاقىرىبىنا اينالادى.
العاشقى زەرتتەۋ كىتابىن 13 جىل جازىپ, 1980 جىلى ماسكەۋدەن «جايساڭ جاندار ءومىرى» («جيزن زامەچاتەلنىح ليۋدەي») سەرياسىمەن جارىققا شىعارادى.
جازۋشى ق.ساتباەۆ تۋرالى 18 كىتاپ جازعان, ونىڭ 12-ءسى - قازاق تىلىندە, التاۋى - ورىسشا.
-«قازاقتىڭ قانىشى. فەنومەن. The Phenomenon» كىتابىنىڭ جارىققا شىعۋى - مەن ءۇشىن ۇلكەن قۋانىش. ءبارىن ەسەپتەسەم, 100 مىڭ دانامەن شىققاندارى بار, بۇگىنگە دەيىن كىتاپتارىم جالپى العاندا 330 مىڭ دانامەن جارىق كورىپتى,- دەگەن مەدەۋ سارسەكە ۋنيۆەرسيتەت رەكتورى التىنبەك نۇح ۇلىنا العىسىن ءبىلدىردى.
شارا بارىسىندا جينالعان جۇرتشىلىق جازۋشىعا ۇلكەن قوشەمەت-قۇرمەت كورسەتتى.
پاۆلودار
سۋرەتتى تۇسىرگەن جاناسىل ەركەن
