وبلىسقا جۇمىس ساپارىمەن كەلگەن "سامۇرىق-قازىنا" ۇلتتىق ءال-اۋقات قورى" اق باسقارما توراعاسى احمەتجان ەسىموۆ قىزىلوردا وبلىسىنىڭ اكىمى قىرىمبەك كوشەرباەۆپەن جانە "قازمۇنايگاز" ۇك اق باسقارما توراعاسى اليك ايدارباەۆپەن بىرگە CRC-1 دانەكەرلەۋ كەشەنىنە بارىپ,"سارىارقا" ماگيسترالدى گاز قۇبىرىنىڭ قۇرىلىسىمەن تانىستى.
"سارىارقا" گاز قۇبىرىنىڭ قۇرىلىسى تۇڭعىش پرەزيدەنت-ەلباسى ن.ءا.نازارباەۆتىڭ باستاماسىمەن قولعا الىنعان بولاتىن. ماگيسترالدىق گاز قۇبىرى قىزىلوردا – جەزقازعان – قاراعاندى – تەمىرتاۋ – نۇر-سۇلتان باعىتى بويىنشا وتەدى. گاز قۇبىرى جىلىنا 2,2 ملرد.تەكشە مەتر كوگىلدىر وتىن وتكىزۋ مۇمكىندىگىنە يە, ۇزىندىعى 1061 كم قۇرايدى. بۇل جوبانى جۇزەگە اسىرۋ 2 ميلليون 700 مىڭ قازاقستاندىقتى گازبەن قامتاماسىز ەتۋگە مۇمكىندىك بەرەدى.
قۇرىلىس مەردىگەرى - "قازقۇرىلىسسەرۆيس" كومپانياسى, ال وپەراتورى - "استانا گاز قمگ" مەكەمەسى. گاز قۇبىرىنىڭ قۇرىلىسى اعىمداعى جىلدىڭ سوڭىنا قاراي ەلوردانى گازداندىرۋعا مۇمكىندىك بەرەدى دەپ جوسپارلانۋدا.
جوبانى جۇزەگە اسىرۋ اياسىندا جەزقازعان, قاراعاندى, تەمىرتاۋ جانە نۇر-سۇلتان قالالارىندا اۆتوماتتى گاز تاراتۋ ستانتسيالارى سالىنادى. اتالعان قالالاردا ماگيسترالدىق گاز قۇبىرىن سالۋمەن قاتار, جەرگىلىكتى بيۋدجەت ەسەبىنەن كوگىلدىر وتىن تاراتۋ جەلىلەرىنىڭ قۇرىلىسى جۇرگىزىلەتىن بولادى. جوبانىڭ قۋاتى: جىلىنا 3,6 ملرد.م3. قۇرىلىس بارىسىندا 1690 جۇمىس ورنى, ىسكە قوسىلعان سوڭ 194 جۇمىس ورنى قۇرىلادى.
قىزىلوردا وبلىسى
