كورەگەن ساياساتكەردىڭ كەمەل ويىن كوپتەن بەرى تانىپ-ءبىلىپ كەلە جاتساق تا, ءوز قولىمەن قۇرعان جاسامپاز مەملەكەتىنىڭ ەرتەڭىنە قانشالىقتى ەت جۇرەگى ەلجىرەپ ەلەڭدەيتىندىگىن تاعى ءبىر كورىپ, ءاماندا الىستى اڭداي بىلەتىن ساياسي سەزىمتالدىعى مەن كەمەڭگەرلىگىن ايقىن اڭعارىپ وتىرمىز. تۇڭعىش پرەزيدەنتىمىزدىڭ وسى ءبىر باعا جەتكىزگىسىز بايلامىن ۋاقىت وتە كەلە كەيىنگى ۇرپاق لايىقتى ماقتان ەتەتىندىگى داۋسىز.
تاۋەلسىزدىكتى قالىپتاستىرۋ جىلدارى دوستىقتىڭ التىن ارالى اتانعان قازاقستاندى مەكەن ەتكەن سانداعان ۇلتتار مەن ۇلىستاردىڭ بىرلىگى سۇتتەي ۇيىپ, ءبىر-بىرىمەن ەتەنە تابىسىپ, توننىڭ ىشكى باۋىنداي ارالاسا ءتۇستى. بىزگە ەڭ باستى كەرەگى, وسى بىرلىك بولاتىن. دانا قازاقتا «تورتەۋ تۇگەل بولسا, توبەدەگى كەلەدى» دەيتىن اتالى ءسوز بار. ىرىس تا ىنتىماققا ۇيىرىلەدى ەمەس پە؟ سول ىنتىماقتىڭ ناتيجەسىندە ءبىزدىڭ بويىمىزداعى شىدام مەن توزىمدىلىكتىڭ سان رەت سىناققا سالعان قيىن-قىستاۋ كەزەڭدەردەن وتتىك. ءوتىپ قانا قويماي, ءبىر كەزدە ارمان بولىپ كورىنگەن اسقارالى اسۋلارعا بەتتەدىك. قازاقستاندىقتاردىڭ بۇل تابىسىن الەمدىك قاۋىمداستىق كورىپ, ءبىلىپ, وزدەرىنىڭ ءادىل باعالارىن بەرىپ وتىر. ءبىز وسىنداي اۋىزبىرلىگى كۇشتى, ىنتىماعى جاراسقان ەلدە تۇراتىنىمىزدى ءوزىمىزگە ماقتان ەتەمىز. ءبىزدىڭ ەلدەگى سايلاۋ دەموكراتيا پرينتسيپتەرىنە سايكەس اشىق تا ءادىل وتەتىندىگى امبەگە ايان. بۇل جولى دا سان رەت سىناققا تۇسكەن سارا جولدان سىنىقسۇيەم تايماي, تاڭداۋىمىزدى جاسايتىنىمىزعا سەنەمىن. ەل پرەزيدەنتى قاسىم-جومارت توقاەۆ تا سايلاۋدىڭ اشىق ءارى ءادىل وتەتىندىگىن ايتىپ, كەپىلدىك بەرىپ وتىر.
ەل بولاشاعىنا بەيجاي قارامايتىن وتانداستارىمىز ءوز تاڭداۋلارىن جازا باسپاي جاساي بىلەتىندىكتەرىنە سەنەمىن. سەنىم ۇدەسىنەن تابىلۋعا اركىمنىڭ دە ساياسي پارقى, ءبىلىمى مەن بىلىگى قاپتال جەتەدى.
سايلاۋ دەر كەزىندە ۇيىمداستىرىلىپ وتىر. ونىڭ وزىندىك ەرەكشەلىگى بار. بارلىعى زاڭدى. سولاي بولا تۇرا, ەل سايلاعان پرەزيدەنتكە سەنىم ەسەلەي ارتا ءتۇسپەك. ەندەشە, بۇل جولعى سايلاۋ جاقسىلىقتىڭ بۇلاق باستاۋىنان جالعاسىپ كەلە جاتقان ىزگىلىكتىڭ ىزەتىن ساتىمەن ساباقتايتىن ءسات.
ۋمار شونازاروۆ,
«تاجىك ۇلتتىق مادەني ورتالىعى» قوعامدىق بىرلەستىگىنىڭ توراعاسى
