ساياسات • 17 ءساۋىر، 2019

د.نازارباەۆا ەۋروپا جانە امەريكا ىستەرى جونىندەگى بريتاندىق مينيسترمەن كەزدەستى

786 رەت كورسەتىلدى

پارلامەنت سەناتىنىڭ توراعاسى داريعا نازارباەۆا ۇلىبريتانيا سىرتقى ىستەر مينيسترلىگىنىڭ ەۋروپا جانە امەريكا ىستەرى جونىندەگى مەملەكەتتىك ءمينيسترى، قاۋىمدار پالاتاسىنىڭ دەپۋتاتى الان دانكانمەن كەزدەستى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.

ا.دانكان د.نازارباەۆاعا ۇلىبريتانيا پارلامەنتى لوردتار پالاتاسىنىڭ لورد-سپيكەرى سەر پيتەر نورمان فوۋلەردىڭ قازاقستان پارلامەنتى سەناتىنىڭ توراعاسى قىزمەتىنە سايلانۋىنا بايلانىستى قۇتتىقتاۋى مەن ىزگى تىلەكتەرىن جەتكىزدى. لورد-سپيكەردىڭ جولداۋىندا ەكى ەلدىڭ زاڭ شىعارۋ ورگاندارىنىڭ جوعارعى پالاتالارى اراسىنداعى بايلانىستاردىڭ ودان ءارى نىعايۋىنا سەنىم ءبىلدىرىلدى.

بريتاندىق مينيستر سونداي-اق قازاقستانداعى ساياسي ۇدەرىستەر مەن جاڭارۋلارعا لوندون تاراپىنا باسا نازار اۋدارىپ وتىرعانىن اتاپ ءوتتى.

د. نازارباەۆا مەيماندى قازاقستاندا بولىپ جاتقان ساياسي ۇدەرىستەر تۋرالى حاباردار ەتتى. ونىڭ ايتۋىنشا، 9 ماۋسىمدا وتەتىن كەزەكتەن تىس پرەزيدەنت سايلاۋى ەلىمىزدىڭ ساياسي جۇيەسىن دامىتۋ جولىنداعى ماڭىزدى قادام بولماق.

سەنات توراعاسى ەلدەگى ساياسي جۇيەنىڭ جاڭعىرۋىندا، ەكونوميكالىق جانە الەۋمەتتىك رەفورمالاردا ساباقتاستىق باعىتىنىڭ قامتاماسىز ەتىلەتىنىنە سەنىم ءبىلدىردى. «ەلباسىنىڭ ۇزاق مەرزىمدى ستراتەگياسى ءبىزدىڭ سىرتقى جانە ىشكى ساياساتىمىزدىڭ باستى نەگىزى بولىپ قالا بەرەدى»، – دەپ اتاپ ءوتتى د.نازارباەۆا.

جۇزدەسۋشىلەر ەكىجاقتى قارىم-قاتىناستاردىڭ جاي-كۇيى مەن كەلەشەگىن تالقىلادى. سەنات توراعاسى قازاقستاننىڭ ەۋروپاداعى ماڭىزدى ستراتەگيالىق ارىپتەسى بولىپ تابىلاتىن بىرىككەن كورولدىكپەن قارىم-قاتىناسىنىڭ دوستىق جانە سەنىمدى سيپاتىن اتاپ ءوتتى.

ا. دانكان ءوز كەزەگىندە ساياسي، ەكونوميكالىق، قارجىلىق، ينۆەستيتسيالىق، مادەني-گۋمانيتارلىق سالالارداعى ىنتىماقتاستىقتى نىعايتۋدىڭ اۋقىمدى كەلەشەگىنە توقتالا كەلىپ، قازاقستاندى ورتالىق ازياداعى نەگىزگى مەملەكەت رەتىندە اتاپ ءوتتى.

اڭگىمە بارىسىندا پارلامەنتارالىق بايلانىستاردى دامىتۋعا نازار اۋدارىلدى. د. نازارباەۆا قازاقستان مەن ۇلىبريتانيانىڭ زاڭ شىعارۋ ورگاندارىندا جۇمىس ىستەيتىن دوستىق توپتارىنىڭ جۇمىسىنا جوعارى باعا بەرىپ، ەكى ەل پارلامەنتشىلەرىنىڭ جۇيەلى بايلانىسىن اتاپ ءوتتى.

قازاقستان سەناتىنىڭ باسشىسى بىرىككەن كورولدىك پارلامەنتىنىڭ وكىلدى دەلەگاتسياسىنىڭ 2019 جىلى قىركۇيەكتە «ۇلكەن ەۋرازيا: ۇنقاتىسۋ. سەنىم. ارىپتەستىك» تاقىرىبىمەن نۇر-سۇلتاندا وتەتىن ەۋرازيا ەلدەرى پارلامەنتتەرى توراعالارىنىڭ 4-ءشى كەڭەسىنە قاتىساتىنىنا سەنىم ءبىلدىردى.

سوڭعى جاڭالىقتار

ۇقساس جاڭالىقتار