اۋىز سۋدىڭ ازابىن شەگىپ وتىرعان مۇنداي اۋىلدار نەگىزىنەن امانگەلدى, جانگەلدين, قاراسۋ, قارابالىق, قوستاناي, مەڭدىقارا, سارىكول, ۇزىنكول, فەدوروۆ اۋداندارىندا ورنالاسقان. وبلىس اكىمىنىڭ اپپارات ماجىلىسىندە وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشى المات يسەنباەۆ 2020-2021 جىلدارى ساپالى اۋىز سۋمەن قامتۋ جۇمىستارىن وسىنداي وزەن-كولدەردەن جانە ونى تاسىپ ءىشىپ وتىرعان اۋىلداردان باستاۋدى ۇسىندى. ولاردىڭ قاتارىنان 37 ەلدى مەكەن ىرىكتەلىپ الىندى. ونداعى تاراتۋ جەلىلەرىن قوسپاعاندا وندىرىستىك-سمەتالىق قۇجاتتارىن دايىنداۋ مەن قۇرىلىس جۇمىستارىنا 6 ميلليارد تەڭگەدەي قارجى كەتەدى.
2019 جىلى اۋىلدىق جەرلەردە اۋىز سۋمەن قامتاماسىز ەتۋ ءۇشىن 22 جوباعا رەسپۋبليكالىق بيۋدجەتتەن 7,6 ميلليارد تەڭگە قارجى ءبولىندى.
«اۋىز سۋدى الدىمەن ءىرى ەلدى مەكەندەرگە, ياعني اۋدان ورتالىقتارىنا جانە ءتورتىنشى بيۋدجەتكە كوشىرىلگەن, ارقايسىسىندا كەمىندە 2 مىڭ ادام تۇرىپ جاتقان 45 اۋىلدىق وكرۋگتەرگە اپارۋ كەرەك. ارينە, بۇل بولىنگەن قارجىنىڭ ازدىق ەتەتىنىن ۇكىمەتپەن, ءتيىستى ورىندارمەن سويلەسەمىز» دەدى وبلىس اكىمى ارحيمەد مۇحامبەتوۆ.
جىل اياعىنا دەيىن وبلىستاعى اۋىلدىق جەرلەردە 34 مىڭنان اسا تۇرعىنى بار 8 ەلدى مەكەندى ساپالى اۋىز سۋمەن قامتاماسىز ەتەتىن 11 قۇرىلعى ىسكە قوسىلۋى ءتيىس.
