بيىلعى باسەكە تامىز ايىندا قازان قالاسىندا وتەدى. وندا قازاقستان اتىنان ۆيكتور ۆەسەلوۆ قاتىسادى. 19 جاستاعى ستۋدەنت ءۇشىن ءۇي تۇرعىزۋ ەش تاڭسىق ەمەس. ويتكەنى, بولاشاق قۇرىلىسشى ءوزىنىڭ كاسىبي شەبەرلىگىن تالاي دودالاردا دالەلدەگەن. بىلتىر ماسكەۋدە وتكەن حالىقارالىق «WorldSkills» چەمپيوناتىندا ءۇشىنشى ورىندى يەلەنگەن. قاراپايىم قۇرىلىس ماتەريالدارىنان ء تۇرلى قۇرىلىمدار جاساپ, قازىلار القاسىنىڭ نازارىنا ىلىككەن. ول ەكى تاپسىرمانى دا تالاپقا ساي ءمىنسىز ورىنداپ شىققان.
ۆيكتوردىڭ جەتەكشىسى ءارى تالىمگەرى ەۆگەني سميرنوۆ تا وسال ەمەس. كەزىندە كاسىبي شەبەرلىك سايىستارىنىڭ تالايىندا وزا شاۋىپ,توپ جارعان. قازاقستان چەمپيونى, «ەuroSkills» جۇلدەگەرى سەكىلدى اتاقتارى بار. ەندى بىلگەن-تۇيگەنىن وعان ۇيرەتۋدەن جالىققان ەمەس.
«ۆيكتور بىردە وزگە قاتارلاستارىمەن بىرگە ماعان تاجىريبەدەن وتۋگە كەلدى. ءا دەگەننەن ۇيرەنسەم دەگەن تالابى, العىرلىعى, ەڭبەكقورلىعى ۇنادى. قۇرعاق قۇرىلىستىڭ قىر-سىرىن تەز-اق مەڭگەرىپ الدى. وزىمە شاكىرت تاڭداۋ ءۇشىن ستۋدەنتتەر اراسىندا سايىس وتكىزىپ, ونىڭ لايىقتى ءىزباسار بولاتىنىنا كوزىم جەتتى», دەيدى سولتۇستىك قازاقستان كاسىپتىك-پەداگوگيكالىق كوللەدجىنىڭ وندىرىستىك وقىتۋ شەبەرى ە. سميرنوۆ.
ءسوز اراسىندا ۆيكتوردىڭ «Worldskills» چەمپيوناتىنىڭ رەسپۋبليكالىق كەزەڭىندە دە ءبىرىنشى ورىن العانىن ايتا كەتكەن ءجون. ەندى كاسىبي شەبەرلىگىن حالىقارالىق دەڭگەيدە قورعاۋ ءۇشىن قىزۋ دايىندىققا كىرىسىپ كەتكەن.
