قالا اكىمىنىڭ ورىنباسارى ماليكا بەكتۇروۆانىڭ ايتۋىنشا, نۇر – سۇلتان قالاسىندا پيك جانە قىزمەت كورسەتەتىن ۇيىمداردىڭ قىزمەتكەرلەرىن وقىتىلاتىن بولادى.
قالا اكىمىنىڭ تاپسىرماسىنا ساي پوليتەحنيكالىق كوللەدج بازاسىندا قىزمەت كورسەتۋشى ۇيىمدار مەن پاتەر يەلەرى كووپەراتيۆى قىزمەتكەرلەرىن كاسىبي دايارلاۋ جانە ولاردىڭ بىلىكتىلىگىن ارتتىرۋ بويىنشا وقۋ ورتالىعىنىڭ جوباسى ازىرلەندى.
«اتالعان وقۋ ورتالىعىندا تۇرعىن ءۇي سالاسىنداعى كاسىبي مامانداردى دايارلاۋ, كورسەتىلەتىن قىزمەتتەردىڭ ساپاسىن ارتتىرۋ جانە دە تۇرعىنداردى جايلى جاعدايمەن قامتاماسىز ەتۋ باعىتتارى قامتىلاتىن بولادى», – دەدى ماليكا بەكتۇروۆا. وقۋ ورتالىعىنىڭ باعدارلاماسىن پوليتەحنيكالىق كوللەدج, سارىارقا اۋدانى اكىمدىگى جانە قىزمەت كورسەتۋشى ۇيىمداردىڭ قىزمەتكەرلەرى بىرلەسە ازىرلەدى. باعدارلاماعا قاتىسۋشىلار – تۇرعىن ۇيلەرگە قىزمەت كورسەتەتىن 430 باسقارۋشى كومپانيا.
«وقۋ باعدارلاماسى 2 اي كولەمىندە جۇرگىزىلەدى جانە 288 ساعاتتان تۇراتىن 10 ءمودۋلدى قۇرايدى. ولار: نورماتيۆتىك - قۇقىقتىق قۇجاتتار, عيماراتتى ينجەنەرلىك–تەحنيكالىق جابدىقتاۋ, قاۋىپسىزدىك تەحنيكاسى, كوندومينيۋم نىساندارىن باسقارۋ, جوسپارلاۋ, ۇيىمداستىرۋ جانە تاعى باسقالارى. وقۋ بارىسىندا تىڭداۋشىلار تۇرعىن ءۇي – كوممۋنالدىق شارۋاشىلىعىندا كورسەتىلەتىن قىزمەتكە بايلانىستى تۋىندايتىن ماسەلەلەردى تالداۋ جانە جۇيەلەندىرۋمەن اينالىساتىن بولادى», – دەدى م. بەكتۇروۆا.
سونىمەن قوسا, ولار كوپ پاتەرلى تۇرعىن ۇيلەردى باسقارۋ تيىمدىلىگىن قامتاماسىز ەتەتىن مەحانيزمدى ازىرلەۋگە قاتىسادى. جوبانى قارجىلاندىرۋ سەرۆيستىك كومپانيالاردىڭ جەكە قاراجاتتارى ەسەبىنەن ىسكە اسىرىلادى دەپ جوسپارلانۋدا. جان باسىنا شاققاندا 1 ايلىق وقۋ قۇنى 30 000 (وتىز مىڭ) تەڭگەنى قۇرايدى.
بۇگىنگى تاڭدا قۇرىلىس-تەحنيكالىق, تۇران-پروفي قالالىق شارۋاشىلىق, يندۋستريالدى-ينجەنەرلىك ەكونوميكالىق كوللەدجدەرىندە: سلەسار-مەحانيك, تەحنيك-سانتەحنيك, جەلدەتكىش جۇيەلەرىنىڭ قۇراستىرۋشىسى ماماندىقتارى بويىنشا ءبىلىم بەرىلەدى. قازىرگى كەزدە 327 ستۋدەنت مەملەكەتتىك تاپسىرىس ەسەبىنەن وقىپ جاتىر. بيىل 100 ادامعا تاعى دا مەملەكەتتىك تاپسىرىس ورنالاستىرىلادى, ونىڭ 50 جەرگىلىكتى بيۋدجەت, 50 رەسپۋبليكالىق بيۋدجەت ەسەبىنەن ماماندىقتى يگەرمەك. جوسپار بويىنشا 37,2 ملن.تەڭگە بولىنەدى.
سونىمەن قاتار, پوليتتەحنيكالىق كوللەدجىندە «كناۋف», «BOSCH», «ينگري» سياقتى 3 رەسۋرستىق ورتالىق جانە «تەحنونيكول» «Bosch Thermotechnik» 2 وقۋ ورتالىق جۇمىس ىستەيدى.
بۇل جوبالاردىڭ ماقساتى قۇرىلىستىڭ قۇرعاق ءادىسى (كناۋف تەحنولوگياسى) بويىنشا ماماندار دايارلاۋ (بۇگىنگە دەيىن 1140 مامان دايارلاندى); ەلەكتر قۇرالدارى مەن بوش جابدىعى سالاسىندا كاسىبي ءبىلىم بەرۋ ساپاسىن جاقسارتۋ (بۇگىنگى كۇنگە 222 ادام سەرتيفيكات الدى).
سونىمەن قاتار, 5 ساۋىردە پوليتەحنيكالىق كوللەدج ءبىلىم جانە عىلىم مينيسترلىگىنەن «گازبەن قامتاماسىز ەتۋ جابدىقتارى مەن جۇيەلەرىن قۇراستىرۋ جانە پايدالانۋ» ماماندارىن دايىنداۋ بويىنشا وقۋ ليتسەنزياسىن الدى. وقۋ بارىسىندا تەحنيك بىلىكتىلىگىمەن «گاز وبەكتىلەرى قۇرال-جابدىعىن پايدالانۋ تەحنيگى», «گاز شارۋاشىلىعىندا اپاتتى قالپىنا كەلتىرۋ جۇمىستارىنىڭ سلەسارى», «گاز قۇبىرلارىن پايدالانۋ جانە جوندەۋ سلەسارى» سياقتى قوسىمشا ەكى جۇمىسشى ماماندىعى بەرىلەتىن بولادى.
«الداعى 3 جىل ىشىندە گازداندىرۋ سالاسى بويىنشا مامانداردى دايارلايتىن بولامىز. بيىل, سۇرانىسقا سايكەس, 25 ورىنعا مەملەكەتتىك تاپسىرىس ورنالاستىرىلادى. اتالعان مامانداردى دايارلاۋ ساپاسىن ارتتىرۋ ماقساتىندا كوللەدج بازاسىندا Bosch Thermotechnik كومپانياسىمەن بىرلەسكەن وقۋ ورتالىعى اشىلدى. ءاربىر باعدارلاما بويىنشا حالىقارالىق سەرتيفيكاتتاۋ جۇرگىزىلەدى. وسىلايشا, جەتەكشى تەحنولوگيالاردىڭ ءىرى حالىقارالىق وندىرۋشىلەرىمەن ىنتىماقتاستىق قاتىناسى كوللەدجدى جاڭا ستاندارتتار بويىنشا كادرلاردى دايارلاۋدىڭ ماڭىزدى الاڭىنا اينالدىردى», – دەدى بەكتۇروۆا.
