كەشە قازاقستان رەسپۋبليكاسى كاسىپوداقتار فەدەراتسياسى اتقارۋ كوميتەتىنىڭ كەزەكتەن تىس وتىرىسى ءوتىپ, وندا قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋ وتكىزۋ شەشىمىن قولداۋ تۋرالى ۇندەۋ قابىلدانعان ەدى. وندا قازاقستان رەسپۋبليكاسى كاسىپوداقتار فەدەراتسياسىنىڭ توراعاسى باقىتجان ءابدىرايىم الدا سايلاۋ وتكىزۋ تۋرالى شەشىمگە قاتىستى ءوزىنىڭ پىكىرىن بىلدىرگەن بولاتىن:
– بۇل – تاريحي وقيعا. كەشە عانا ەلباسىمىز ءوز وكىلەتتىگىن توقتاتىپ, قاسىم-جومارت توقاەۆتى پارلامەنت ءبىراۋىزدان پرەزيدەنت لاۋازىمىنا سايلادى. بىراق پرەزيدەنتتى ءسىز بەن ءبىز, حالىق سايلايدى. قازاقستاننىڭ تۇراقتىلىعى ءۇشىن سايلانعان پرەزيدەنت قاجەت. سول سەبەپتى قازىرگى پرەزيدەنتىمىز ق.توقاەۆ مىرزانىڭ كەزەكتەن تىس سايلاۋ وتكىزۋ ۇسىنىسىن تولىعىمەن قولدايمىز, – دەدى فەدەراتسيا باسشىسى. ونىڭ ايتۋىنشا, الداعى كەزەكتەن تىس پرەزيدەنتتىك سايلاۋ ۇلگىلى تۇردە ءوتىپ, ءادىل بولۋى كەرەك. بارلىق ۇمىتكەرگە جان-جاقتى مۇمكىنشىلىك جاسالۋى ءتيىس. «وسى مۇمكىندىكتەردى پايدالانۋ ارقىلى قازاقستانعا لايىقتى, قازىرگى زامانعا ساي ءبىلىمدى, ساۋاتتى, العىر پرەزيدەنت سايلاپ الۋىمىز كەرەك. سول ارقىلى بۇكىل الەمگە بىرلىگىمىزدى, ىنتىماعىمىزدى, ساياسي سانا-سەزىمىمىزدىڭ جوعارى ەكەندىگىن پاش ەتىپ كورسەتۋىمىز كەرەك».
