جيىندى اشقان باسقارما توراعاسى ابىلاي مىرزاحمەتوۆ پرەزيدەنت ءوز ۇندەۋىندە ەڭ الدىمەن ايقىندىق پەن تۇراقتىلىقتىڭ ماڭىزدى ەكەنىن ايتقانىنا توقتالدى. «قوعامعا دا, بيزنەسكە دە ايقىندىق كەرەك. جوعارعى بيلىك كونستيتۋتسياعا سۇيەنىپ, زاڭ نەگىزىندە قادام جاسادى. پرەزيدەنتىمىز ەلباسىمەن دە, ەلىمىزدەگى باسقا دا ساياسي كۇشتەرمەن, پارلامەنت, ۇكىمەت باسشىلارىمەن اقىلداسقانىن ايتىپ ءوتتى. «اتامەكەن» كاسىپكەرلەردى بىرىكتىرىپ وتىرعان ۇيىم بولعاندىقتان, بيزنەسكە ەڭ ءبىرىنشى تۇراقتىلىق كەرەك ەكەنىن ايتقىم كەلەدى. كاسىپكەر ءۇشىن ءوز بيزنەسىن دامىتۋ, ەلدەگى ينۆەستيتسيالىق احۋالداردىڭ وڭ بولۋى, ىشكى بيزنەسكە دە, سىرتتان كەلەتىن بيزنەسكە دە ەلدىڭ تۇراقتىلىعى, قوعامنىڭ تۇراقتىلىعى, اۋىزبىرشىلىگى كەرەك», دەدى باسقارما توراعاسى.
پرەزيدەنت شەشىمىنە بايلانىستى وڭىرلەردەگى كاسىپكەرلەر دە قولداۋ ءبىلدىرىپ, ءوز پىكىرلەرىمەن ءبولىستى. مىسالى, «الماتى اۋىر ماشينا جاساۋ زاۋىتى» اق باس ديرەكتورى جەتپىسباي ەدىگەنوۆ بۇل شەشىم ۋاقتىلى قابىلدانعانىن ايتتى.
«مەن ءوز باسىم جىلدام شەشىم قابىلداعاندى جاقسى كورەمىن. نەگە دەسەڭىز, زاۋىتتىڭ باسشىسى بولعان سوڭ, كەز كەلگەن شارۋادا ناقتىلىق قاجەت. بيزنەستى قولداۋعا باعىتتالعان شەشىمدەر جالعاسىن تاۋىپ, ەلىمىزدە, ءتىپتى وتباسىندا تۇراقتىلىققا دەمەۋ بولاتىنىنا سەنىمدىمىن. بيزنەس ءوز كەزەگىندە سايلاۋعا بەلسەندى اتسالىسۋى كەرەك», دەپ ويىن ءبىلدىردى جەتپىسباي ەدىگەنوۆ.
شىمكەنت قالاسى كاسىپكەرلەر پالاتاسى وڭىرلىك كەڭەسىنىڭ ءتوراعاسى, «وتاۋ قۇرىلىس» حولدينگىنىڭ باسشىسى قايرات مولداسەيىتوۆ شىم قالانىڭ كاسىپكەرلەرى بۇل شەشىمدى ءبىراۋىزدان قولدايتىنىن, بۇل تەك بيزنەس ەمەس, بۇكىل حالىق كۇتىپ وتىرعان شەشىم ەكەندىگىن جەتكىزدى.
كەزەكتەن تىس پرەزيدەنت سايلاۋىن وتكىزۋ ينۆەستيتسيالىق كليماتتىڭ تۇراقتىلىعىن قامتاماسىز ەتەتىنىن ايتقان اقتوبەلىك «كوكجار» اگروونەركاسىپتىك تاۋار-شيكىزات بيرجاسىنىڭ باسشىسى ەسىمحان قۇرمانعازين شەتەلدىك ينۆەستورلار وسى توڭىرەگىندە وي قوزعاعانىن دا اتادى.
«ءبىزدىڭ وڭىردەگى شەتەلدىك كومپانيانىڭ ديرەكتورىمەن بىرەر كۇندە بولعان كەزدەسۋدە ولاردىڭ تاراپىنان الاڭداۋشىلىق بارىن بايقادىق. ارينە ءبىز بيزنەس-ارىپتەستەرىمىزگە باستالعان ءاربىر ءىس جالعاسىن تاباتىنىن ايتتىق. ەلدە تۇراقتىلىق بولسا, ينۆەستيتسيالىق كليمات تا تۇراقتى بولادى. سونى ءبارىمىز قالايمىز, قولدايمىز», دەدى ەسىمحان قۇرمانعازين.
شىعىس قازاقستان وبلىسىنداعى ءىرى بيزنەس وكىلى – «سەماز» جسش باس ديرەكتورى اسەمقان دوسقوجانوۆ اقتوبەلىك ءارىپتەسىنىڭ ءسوزىن قولداپ, كەزەكتەن تىس پرەزيدەنت سايلاۋى ينۆەستيتسيالىق كليماتتىڭ دۇرىس قالىپتاسىپ, جالپى ەلدىڭ ەكونوميكالىق دامۋىنا ۇلكەن ىقپالىن تيگىزەتىنىن ايتتى. ال «اتامەكەن» ۇكپ وڭىرلىك پالاتا ديرەكتسيالارى اتىنان ءسوز ءسويلەگەن ناريمان ابىلشايىقوۆ بۇل شەشىم ەلدەگى الەۋمەتتىك-ەكونوميكالىق تۇراقتىلىق ءۇشىن اسا قاجەت ەكەنىن, حالىق بولىپ سايلاۋعا بەلسەندى تۇردە قاتىسۋعا دايىن ەكەندەرىن جەتكىزدى.
باسقارمانىڭ كەڭەيتىلگەن وتىرىسىندا باسقا وڭىرلەردەگى كاسىپكەرلەر دە ءبىراۋىزدان بيزنەس قاشاندا ناقتى ءارى اشىق شەشىمدى تاڭدايتىنىن, ءار جاسالعان قادام بيزنەستىڭ دامۋىنا تىكەلەي اسەر ەتەتىنىن, بۇل رەتتە كەزەكتەن تىس پرەزيدەنت سايلاۋى دۇرىس شەشىم ەكەنىن اتاپ ءوتتى.
