ەندى كولىك جۇرگىزۋشىلەرى اۆتوكولىكتەردى قايتا تىركەۋ جانە جۇرگىزۋشى كۋالىگىن اۋىستىرۋ سياقتى مەملەكەتتىك قىزمەت تۇرلەرىن ق.تۇلەمەتوۆ كوشەسى, 35 مەكەن جايدا ورنالاسقان فرونت-وفيستە جۇزەگە اسىرا الادى. جاڭا مامانداندىرىلعان حقو مەملەكەتتىك كورپوراتسيانىڭ شىمكەنت قالاسىنداعى تۇرعىندارعا مەملەكەتتىك قىزمەت كورسەتەتىن ون ءبىرىنشى فرونت-وفيسكە اينالىپ وتىر.
جاڭا مامانداندىرىلعان حقو-دا 52 قىزمەتكەر جۇمىس ىستەيدى, ال دايىن قۇجاتتاردى قابىلداۋ جانە بەرۋ بويىنشا 20 جۇمىس ورنى قۇرىلعان. مامانداندىرىلعان حقو جاڭا جيھازبەن جابدىقتالعان, 150 اۆتوكولىككە ارنالعان تۇراق تا بار, مۇمكىندىگى شەكتەۋلى ازاماتتار ءۇشىن پاندۋستار مەن شاقىرتۋ تۇيمەلەرى قاراستىرىلعان.
اتالعان ورتالىقتىڭ اشىلۋ سالتاناتىنا قالا اكىمىنىڭ ورىنباسارى دانات جۋمين, «ازاماتتارعا ارنالعان ۇكىمەت» باسشىلىعى جانە قالالىق پوليتسيا باسقارماسىنىڭ باستىعى ەرالى جۇماحانبەتوۆ قاتىستى.
«شىمكەنت ميلليون تۇرعىنى بار جەكە قالا ستاتۋسىن الدى. ەكستەرريتوريالدىلىق قاعيداتى بويىنشا مۇندا جاقىن جاتقان اۋدانداردان دا كولىكتەرىنىڭ قۇجاتتارىن جاساتۋ ءۇشىن جۇرگىزۋشىلەر كوپ كەلەدى. بۇل رەتتە ءبىز تۇرعىنداردىڭ وتىنىشتەرىن ەسكەرىپ, تاعى ءبىر مامانداندىرىلعان حقو اشىپ وتىرمىز. جىل باسىنان بەرى شىمكەنتتەگى العاشقى مامانداندىرىلعان حقو ارقىلى ازاماتتارعا 45 مىڭ جۇرگىزۋشى كۋالىگى بەرىلدى جانە اۆتوكولىكتى قايتا تىركەۋ بويىنشا 200 مىڭنان استام قىزمەت كورسەتىلدى» دەدى مامانداندىرىلعان حقكو باسشىسى داۋلەت دۇيسەنبەكوۆ.
شاھارداعى ەكىنشى حقو عيماراتىندا كولىك قۇرالىن تىركەۋگە جانە قايتا تىركەۋدەن وتكىزۋگە, جۇرگىزۋشى كۋالىگىن اۋىستىرۋعا بولادى. ازىرگە A, A1, B, B1, C, C1, D, D1 جۇرگىزۋشى كاتەگوريالارى بويىنشا پراكتيكالىق ەمتيحان تاپسىرۋ جانە مەديتسينالىق تەكسەرىستەن ءوتۋ جۇمىستارى دوستىق مولتەك اۋدانىنداعى مامانداندىرىلعان حقو-دا عانا جۇزەگە اسىرىلادى.
نۇرشات توكەن,
«Egemen Qazaqstan»
شىمكەنت
