– ءبىلىم مەن عىلىمنىڭ قاراشاڭىراعى قىزدار ۋنيۆەرسيتەتىنىڭ باستاماسى العاش رەت ۇيىمداستىرىلىپ وتىرعان «كيەلى بەسىك» رەسپۋبليكالىق مۋزىكا فەستيۆالى – ۇلتىمىزدىڭ ۇلىلىعىن ۇلىقتاپ, مەرەيىن تاcىتۋعا باعىتتالعان بىرەگەي جوبا. بۇل فەستيۆال – بابادان بالاعا ميراس بولىپ كەلە جاتقان ۇلتتىق قازىنالارىمىزدى قادىرلەۋگە, جاستاردى وتباسىلىق قۇندىلىقتاردى قۇرمەتتەۋگە ۇندەيدى. قازاق ەلىندە تۇراتىن ءتۇرلى ەتنوس وكىلدەرى مەن حالىقتاردىڭ سالتى مەن ءتول مادەنيەتىن ناسيحاتتاۋعا باعىتتالعان بۇل شارا الداعى ۋاقىتتا دا داستۇرگە اينالاتىنىنا كامىل سەنىمدىمىز, – دەيدى ۋنيۆەرسيتەتتىڭ ونەر جانە مادەنيەت فاكۋلتەتىنىڭ دەكانى گۇلنۇر ومىرباەۆا.
فەستيۆالعا ەلىمىزدەگى ءتۇرلى ۇلت وكىلدەرىنىڭ قوعامدىق بىرلەستىكتەرى مەن جوعارى جانە ورتا ارناۋلى وقۋ ورىندارىنىڭ ستۋدەنتتەرى, مەكتەپ وقۋشىلارى قاتىسادى دەپ كۇتىلۋدە. بايقاۋ ەكى كەزەڭنەن تۇرادى. العاشقى تۋردا قاتىسۋشىلار بەسىك تاقىرىبىندا تەاترلاندىرىلعان قويىلىمدى كوپشىلىك نازارىنا ۇسىنسا, ەكىنشى كەزەڭدە «كيەلى بەسىك» تاقىرىبىنداعى حالىق اندەرىن ورىنداماق. ولاردىڭ قاتارىندا بەسىك جىرلارى, انا ءالديى جانە بەسىك تۋرالى اندەر بار.
قاتىسۋشىلاردىڭ ونەرى تەاتر قويىلىمىنىڭ اقپاراتتىق ناسيحاتتالۋى, بۇرىن زەرتتەلمەگەن تىڭ يدەيانى كورسەتۋ, دەكوراتسيا, كوستيۋم جانە اكتەرلىك شەبەرلىك سىندى باعىتتار بويىنشا باعالانادى. ال مۋزىكالىق باعىتتا ءاننىڭ ءسوزى مەن اۋەنىنىڭ ساپالىلىعى, شىعارمانىڭ كۇردەلىلىگى, ورىنداۋشىنىڭ ساحنالىق كيىم ۇلگىسى مەن مادەنيەتى نازارعا الىنباق.
فەستيۆال جەڭىمپازدارى ارنايى ديپلومدارمەن جانە باعالى سىيلىقتارمەن ماراپاتتالادى.
ايناش ەسالي,
«Egemen Qazaqstan»
الماتى
