بۇگىن ۇكىمەت پەن ۇلتتىق بانك اراسىندا ۇكىمەت پەن ۇلتتىق بانك اراسىنداعى ۇيلەستىرىلگەن ساياساتتى جۇرگىزۋگە باعىتتالعان كەلىسىمگە قول قويىلدى. جالپى, ءسوز ماڭىزدى باعىتتاردى قامتيتىن ءوزارا ءىس-قيمىلدى كۇشەيتۋ تۋرالى بولىپ وتىر. اتاپ ايتقاندا, ينفلياتسيانى باقىلاۋ, ەكونوميكانى قورلاندىرۋ, قارجىلىق تۇراقتىلىق, ناقتى سەكتوردى قالپىنا كەلتىرۋ جانە كولەڭكەلى ەكونوميكانى تومەندەتۋ.
پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءاليحان سمايىلوۆ ناقتىلاعانداي, كەلىسىمدەگى ەڭ ماڭىزدىسى — بۇل ماكروەكونوميكالىق ساياساتتى ۇيلەستىرۋ.
«قارجى-نەسيە ساياساتى جانە ماكروەكونوميكالىق باعىت ءبىر-بىرىنە بايلانىستى: بۇل تۇستا كەلىسىمدىلىك پەن ۇيلەسىمدىلىك كەرەك. كەلىسىم 2019 جىلعا جاسالعان بولسا دا, ول مازمۇنى جاعىنان ءبىزدىڭ ەكونوميكامىزدىڭ بىرتىندەپ ودان ءارى دامۋى ءۇشىن قاجەتتى ۇزاقمەرزىمدىك ترەندتەردى ايقىندايدى. بيۋدجەتتىڭ تۇراقتى بولۋى, ينفلياتسيانىڭ باقىلاۋدا بولۋى, ال ۆاليۋتا باعامىنىڭ ەداۋىر اۋىتقىماۋى ماڭىزدى. سونىمەن قاتار كولەڭكەلى ەكونوميكانى تومەندەتىپ, قولما-قول اقشاسىز تولەمدەردى دامىتىپ, ناقتى سەكتوردى قالپىنا كەلتىرۋ ماڭىزدى», — دەدى قارجى ءمينيسترى.
ونىڭ ايتۋىنشا, ەكونوميكاعا بولجامدىلىق قاجەت, سوندىقتان كەلىسىم نارىققا جانە قوعامعا «ۇكىمەت پەن ۇلتتىق بانكتىڭ بىرلەسىپ جۇمىس ىستەيتىن باعىتتارى جايلى» ناقتى بەلگى بەرەدى.
