استانا قالاسى اكىمدىگىنىڭ ۇيىمداستىرۋىمەن وتكەن ءىس-شاراعا استانا قالاسى مادەنيەت جانە سپورت باسقارماسىنىڭ باسشىسى بولات ماجاعۇلوۆ, قازاقستان جازۋشىلار وداعى استانا قالاسى فيليالىنىڭ ديرەكتورى داۋلەتكەرەي كاپ ۇلى, ءماجىلىس دەپۋتاتى بەكبولات تىلەۋحان, ەلىمىزدىڭ ەڭبەك سىڭىرگەن قايراتكەرلەرى مەن قالا قوناقتارى, ەلوردالىقتار قاتىستى. قالالىق اكىمدىك الاڭى مەرەكەنى تويلاعان حالىققا لىق تولىپ, ونەر جۇلدىزدارى ونەرلەرىن كورسەتتى.
«ەلدىك پەن بىرلىكتىڭ ەلورداسى – نۇر-سۇلتان» مەرەكەلىك كونتسەرتىندە جۇرتشىلىق قازاقستاننىڭ تۇڭعىش پرەزيدەنتى-ەلباسىنىڭ مەملەكەت قۇرۋداعى ءرولى تۋرالى پىكىرلەرىن ءبىلدىردى. «زلاتا» بولگار ەتنومادەني بىرلەستىگىنىڭ توراعاسى ولگا اندريەۆسكايا مەملەكەتتىڭ بارلىق تابىسىنا ەلىمىزدەگى تۇراقتىلىقتىڭ, تىنىشتىقتىڭ جانە 100-دەن استام ەتنوس وكىلدەرى دوستىعىنىڭ ارقاسىندا قول جەتكىزىلگەنىن ايتادى.
– ەلباسىمىزدىڭ حالىققا جولداعان مالىمدەمەسىن ەستىگەندە ءتۇرلى سەزىمگە بوي الدىردىق. ءبىر جاعىنان قيماستىق بيلەسە, ەكىنشى جاعىنان وسى كۇنگە جەتكىزگەن پرەزيدەنتىمىزدىڭ ەڭبەگىنە العىسىمىزدى بىلدىردىك. وسىنداي دامىعان مەملەكەتتە ءومىر سۇرگەنىم ءۇشىن باقىتتىمىن. بالالار مەن انالار, ەل تۇرعىندارى, سونداي-اق ءار سالاداعى قىزمەتكەرلەر ءاردايىم مەملەكەت قامقورلىعىندا بولىپ كەلەدى. وسىدان جيىرما جىل بۇرىن استانامىزدىڭ گۇلدەنۋىنە كۇمانمەن قاراعانداردىڭ قاراسى باسىم ەدى. ال بۇگىنگى دامۋىنا قاراڭىزشى, كۇننەن كۇنگە قۇلپىرىپ كەلەدى. قالانىڭ نۇر-سۇلتان اتالۋى ورىندى دەپ بىلەمىن, – دەيدى ولگا اندريەۆسكايا.
ەلباسى ءاردايىم سپورتشىلار مەن شىعارماشىل جاستارعا, جاس ونەر يەلەرىنە قولداۋ كورسەتىپ كەلگەنى ءمالىم. بۇل ورايدا قازاقستاندى قۋاتتى ەلگە اينالدىرۋ جولىنداعى ەلباسىنىڭ ەلەۋلى ەڭبەگىنە ەل جاستارى ءدان رازى ەكەنىن ايتادى.
– سپورت – سالاماتتى ءومىر سالتىن قالىپتاستىرۋدىڭ نەگىزگى كەپىلى. مەملەكەت دەنە تاربيەسىنە ەرەكشە كوڭىل ءبولىپ, سپورت سالاسىن دامىتۋعا جاعداي جاساپ كەلە جاتقانىن وزدەرىڭىز كورىپ وتىرسىزدار. تۇڭعىش پرەزيدەنت نۇرسۇلتان نازارباەۆ رەسپۋبليكامىزدا جاستاردىڭ ومىردەن ءوز ورنىن تابۋىنا بىرەگەي مۇمكىندىكتەر بەرىپ, ساپالى ءبىلىم الۋدىڭ ماڭىزدىلىعىنا نازار اۋدارىپ كەلەدى. حالىق يگىلىگى ءۇشىن اتقارىلىپ جاتقان باستامالارعا قولداۋ كورسەتۋگە قاشاندا ءازىرمىز, – دەيدى قازاقستاننىڭ ەڭبەك سىڭىرگەن سپورت شەبەرى, بوكسشى ءلاززات كۇنگەيباەۆا.
وزىندىك قىزىققا تولى ويىن-ساۋىق باعدارلاماسىندا كوڭىلدە جاتتالعان اسەم اندەر تارتۋ ەتىلىپ, ونەرپازدار استانالىقتار مەن قالا قوناقتارىنا كۇنى بويى كوتەرىڭكى كوڭىل كۇي سىيلادى. قالا تۇرعىندارى ءبىر-ءبىرىن جاڭا بەلەسپەن قۇتتىقتاپ, مەرەكەنى كەڭ كولەمدە اتاپ ءوتتى.
ايا ءومىرتاي,
«Egemen Qazaqstan»
