«جاعالاۋدا روليكپەن سەرۋەندەگەننەن كەيىن دەمالىپ وتىرعاندا توسىننان سۋيتسيدكە كۋا بولدىق. بىردەن پوليتسياعا حابارلادىم. ساناۋلى سەكۋند ىشىندە وقيعا ورنىنا جەتكەن پوليتسيا قىزمەتكەرلەرىنىڭ ءبىرى باتىپ بارا جاتقان ادامعا تەز ءجۇزىپ باردى. سۋ مۇزداي, وعان قوسا قاتتى اعىس قىزدى قالاي اعىزىپ بارا جاتقانى دا كورىنىپ تۇردى. بىراق پوليتسيا قىزمەتكەرى ءوز ءومىرىن تاۋەكەلگە تىگىپ, باتقان ادامدى قۇتقارۋعا تالپىنىسىن توقتاتقان جوق», دەيدى وقيعا كۋاگەرى رايىمبەك ساربالين.
وزىمەن بىرگە بورەنەنى الىپ سۋعا تۇسكەن پوليتسيا كىشى لەيتەنانتى رۇستەمبەك سۇندەتوۆ تە شالقارعا كومەككە ۇمتىلادى. «سۋعا باتقان ادامعا جەتكەن كەزىمدە شالقار اعىسقا توتەپ بەرە الماي باتىپ كەتتى», دەپ ەسكە الادى ر.سۇندەتوۆ. اجال اۋزىنان قالعان باتىس قازاقستان وبلىسىنىڭ تۋماسى جەدەل جاردەم كولىگىمەن وبلىستىق اۋرۋحانانىڭ رەانيماتسيا بولىمشەسىنە جەتكىزىلگەن. «ساعات 00.50-دە شالقار اقىمعاليەۆتىڭ مۇردەسى وقيعا ورنىنان تومەن جاقتان تابىلىپ, جاعاعا شىعارىلدى. شالقار اقىمعاليەۆ كوپ بالالى وتباسىنىڭ جالعىز اسىراۋشىسى بولاتىن. بويداق, 1 ساۋىردە 25 جاسقا تولاتىن ەدى. وتانىنا 5 جىل بويى ادال قىزمەت ەتىپ كەلە جاتقان ول سۋعا باتقان ايەلدى قۇتقارامىن دەپ ءوز ءومىرىن قيدى», دەيدى ءىىم كەڭەسشىسى-رەسمي وكىلى ءنۇردىلدا وراز. سونداي-اق ول بەيبىت كۇن باتىرىنىڭ مەملەكەتتىك ناگراداعا ۇسىنىلاتىنىن, سونىمەن بىرگە جەكە قۇرام تاراپىنان ونىڭ وتباسىنا ماتەريالدىق كومەك كورسەتىلەتىنىن ايتتى.
وسى وقيعاعا بايلانىستى پارلامەنت سەناتىنىڭ توراعاسى داريعا نازارباەۆا ماحامبەت اۋدانىنىڭ بەرەكە اۋىلىندا تۇراتىن اقىمعاليەۆتەر وتباسىنا كوڭىل ايتۋ جەدەلحاتىن جولداپ, شالقار كوشكىنباي ۇلىنىڭ ەرلىگى مەن ازاماتتىعى بارشاعا ۇلگى ەكەنىن اتاپ وتكەن بولاتىن.
سونداي-اق «Nur Otan» پارتياسى توراعاسىنىڭ ءبىرىنشى ورىنباسارى مəۋلەن Əشىمباەۆ: «شالقاردىڭ بۇل ەرلىگى ونىڭ انتىنا ادالدىعىن, ەڭ باستىسى, ادامگەرشىلىك قاسيەتىنىڭ جوعارى بولعانىن كورسەتەدى. قىزمەتىنە اسقان جاۋاپكەرشىلىكپەن قاراپ, وزگە ءۇشىن ءوز ءومىرىن قيۋعا دايىن بولعان شالقارداي ۇل تəربيەلەپ وسىرگەنى ءۇشىن اقىمعاليەۆتەر əۋلەتىنىڭ الدىندا باسىمىزدى يەمىز», دەدى. ال ىشكى ىستەر ءمينيسترى ەرلان تۇرعىمباەۆ شالقاردىڭ اناسى لəززات مəجەنقىزىنا جولداعان كوڭىل ايتۋ حاتىندا ىشكى ىستەر ورگاندارى جəنە قالىڭ قازاق جۇرتى ءوزىنىڭ ەرجۇرەك, باتىر ۇلىنان كوز جازىپ قالعانىن, بۇل ورنى تولماس قايعى ەكەنىن اتاپ وتكەن. وتكەن سەنبىدە اتىراۋلىقتار باتىر پەرزەنتتەرىن سوڭعى ساپارعا شىعارىپ سالدى. جينالعان قاۋىم اراسىندا اتىراۋ وبلىسىنىڭ əكىمى ن.نوعاەۆ, ءىىم Əكىمشىلىك پوليتسيا كوميتەتى باستىعىنىڭ ورىنباسارى, پوليتسيا پولكوۆنيگى م.بايبولوۆ, وبلىستىڭ باس پوليتسەيى, پوليتسيا پولكوۆنيگى ا.دۇيسەمباەۆ, سونداي-اق پوليتسيا دەپارتامەنتىنىڭ جەكە قۇرامى مەن مəسليحات دەپۋتاتتارى, جەرگىلىكتى əكىمدىك, پروكۋراتۋرا, قمدب وكىلدەرى بولدى. قارالى جيىندا قىزمەتكەرىنىڭ جوعارى ادامگەرشىلىك قاسيەتتەرىن ەسكە العان پوليتسيا دەپارتامەنتىنىڭ باستىعى ايان دۇيسەمباەۆ: «مەن قىزمەت ەتكەن بىرنەشە جىلدىڭ ىشىندە العاش رەت جاس جاۋىنگەرىمنەن ايىرىلىپ تۇرمىن. مەنىڭ جاۋىنگەرىم قان مايداندا ەمەس, ادامدى اجالدان اراشالاۋ كەزىندە جايىقتىڭ اساۋ تولقىنىندا قازا بولدى. قوش بول, مەنىڭ جاس جاۋىنگەرىم!», دەپ تولقي سويلەدى. جەرلەۋ ءرəسىمى كەزىندە ەرلىكپەن قازا تاپقان پوليتسيا سەرجانتى شالقار اقىمعاليەۆقا قۇرمەت كورسەتۋ ءۇشىن پوليتسيا دەپارتامەنتىنىڭ قىزمەتكەرلەرى اسپانعا ءۇش مəرتە بوس پاتروندارمەن وق اتىپ, قوشتاسۋ بەلگىسىن ءبىلدىردى.
باقىتگۇل باباش,
«Egemen Qazaqstan»
