كەسەنەگە كەلدى. قاسىم-جومارت توقاەۆ «ازىرەت سۇلتان» مەملەكەتتىك تاريحي-ءمادەني قورىق-مۋزەيىنىڭ ارحەولوگيالىق جانە ارحيتەكتۋرالىق ەسكەرتكىشتەرىمەن تانىسىپ, قوجا احمەت ياساۋي كەسەنەسىن ارالاپ كوردى. مەملەكەت باسشىسىنا مادەني نىسانداردىڭ قايتا جوندەۋ جۇمىستارى جانە قورىق-مۋزەيدىڭ اۋماعىن اباتتاندىرۋ بارىسى جونىندە باياندالدى. سونىمەن قاتار وبلىس اكىمدىگىنىڭ, باسقارمالار مەن دەپارتامەنتتەردىڭ اكىمشىلىك عيماراتتارىن, سونداي-اق كونگرەسس-حولدى, مەديا ورتالىعىن, « ۇلى دالا ەلى» ورتالىعىن, وقۋشىلار سارايىن, تۋريزم كوللەدجىن, «استانا» الاڭىن, اۋەندى سۋبۇرقاقتى, حالىققا قىزمەت كورسەتۋ ورتالىعىن جانە باسقا دا الەۋمەتتىك-مادەني ماقساتتاعى نىسانداردى سالۋ بارىسى تۋرالى ەسەپ بەرىلدى.
جاستارمەن جولىقتى. قاسىم-جومارت توقاەۆ جۇمىس ساپارى بارىسىندا جاستاردىڭ رەسۋرستىق ورتالىعىنىڭ جۇمىسىمەن دە تانىستى. پرەزيدەنتكە جاستاردىڭ شىعارماشىلىق باستامالارىنا, كاسىپكەرلىكپەن اينالىسۋىنا قولداۋ كورسەتۋ, ولاردىڭ جۇمىسپەن جانە باسپانامەن قامتىلۋىن ۇيلەستىرۋ, جاستارعا قۇقىقتىق كومەك كورسەتۋ سياقتى نەگىزگى جۇمىس باعىتتارى جونىندە باياندالدى. ەركىن اڭگىمەلەسۋ بارىسىندا جاستار قاسىم-جومارت توقاەۆقا «جاستارعا قىزمەت كورسەتۋ», «ەرىكتىلەر كلۋبى», «جاس سارباز», «تىلدەر مەكتەبى» اتتى تاقىرىپتىق سەكتورلاردىڭ, ءبىلىم بەرۋ سالاسىنداعى «Stem» جوباسىنىڭ, سونداي-اق «TURKISTAN HUB» كوۆوركينگ ورتالىعىنىڭ جۇمىستارى تۋرالى ايتتى.
تۇرعىن ۇيلەردىڭ قۇرىلىسىمەن تانىستى. پرەزيدەنت تۇركىستان قالاسىنىڭ «وتىرار» شاعىن اۋدانىنا بارىپ, «نۇرلى جەر» باعدارلاماسى بويىنشا سالىنىپ جاتقان 26 جاڭا ءۇيدىڭ قۇرىلىسىمەن تانىستى. قازاقستان پرەزيدەنتىنە وسى باعدارلاما اياسىندا 2019 جىلدىڭ سوڭىنا دەيىن جالپى اۋماعى 96 200 شارشى مەتردى قۇرايتىن 1560 ءپاتەر پايدالانۋعا بەرىلەتىنى حابارلاندى.
جۇرتشىلىق وكىلدەرىمەن كەزدەستى. مەملەكەت باسشىسى, بۇدان بولەك تۇركىستان وبلىسىنىڭ جۇرتشىلىعىمەن دە جولىقتى. پرەزيدەنت ءىس-شاراعا قاتىسۋشىلاردى ناۋرىز مەرەكەسىمەن قۇتتىقتاپ, جاڭارۋ مەن جاڭا ءومىردىڭ باستالۋىن سيپاتتايتىن بۇل مەرەكەنىڭ رۋحاني باي مۇرامىزدىڭ جارقىن سيمۆولىنا, ۇزدىكسىز ۇرپاق ساباقتاستىعىنا جانە قازاقستان حالقى ءبىرلىگىنىڭ نەگىزىنە اينالعانىن اتاپ ءوتتى.
– ەلباسىنىڭ بيىلعى 19 ناۋرىزدا قابىلداعان شەشىمى مەملەكەتىمىزدىڭ بولاشاعىنا دەگەن شىنايى قامقورلىقتى بىلدىرەدى. وسىنداي سىندارلى كەزەڭدە ەلباسىن جانە مەنى قولداعان بارشا حالقىما ريزاشىلىعىمدى ايتقىم كەلەدى, – دەدى قاسىم-جومارت توقاەۆ. مەملەكەت باسشىسى ءوزىنىڭ ەل پرەزيدەنتى رەتىندەگى العاشقى ساپارىنىڭ قازاق مادەنيەتىنىڭ, تاريحى مەن رۋحانياتىنىڭ ورتالىعى سانالاتىن تۇركىستان قالاسىنان باستالۋىنىڭ سيمۆولدىق ءمانى زور ەكەنىن ايتتى.
– تۇركىستان – مەملەكەتىمىزدىڭ التىن بەسىگى. ەلباسىنىڭ بۇل قالاعا ەرەكشە ءمارتەبە بەرۋ تۋرالى شەشىمى كەزدەيسوق ەمەس. ەجەلگى ءتۇركىستاننىڭ جاڭعىرۋى مەن جاڭارۋى دامۋ جولىمىزدىڭ دۇرىستىعىن كورسەتەدى. الداعى جۇمىستارىم تۋرالى ءجانە قوعامدى تولعاندىرعان ماسەلەلەردى شەشۋگە بايلانىستى ويىمدى ءدال وسى جەردە بولىسكىم كەلەدى, – دەدى قازاقستان پرەزيدەنتى. قاسىم-جومارت توقاەۆ بارشا قازاقستاندىقتاردى ءبىرىنشى كەزەكتە تولعاندىراتىن ماسەلەلەر تۋرالى ايتا كەلىپ, ەڭ الدىمەن, ادىلەتتىلىكتى كۇشەيتۋ قاجەتتىگىنە توقتالدى.
– قوعامداعى ادىلەتتىلىك, ەڭ الدىمەن, اتقارۋشى بيلىككە بايلانىستى. ۇكىمەتتىڭ, مينيسترلەردىڭ, بارلىق دەڭگەيدەگى اكىمدەردىڭ, پوليتسيانىڭ, پروكۋراتۋرانىڭ, سوتتاردىڭ ماقساتى – ازاماتتاردىڭ قۇقىعىن قورعاۋ. بۇل – ولاردىڭ كونستيتۋتسيالىق مىندەتى ءارى ازاماتتىق بورىشى, – دەدى مەملەكەت باسشىسى. قازاقستان پرەزيدەنتى سىبايلاس جەمقورلىققا قارسى كۇرەس كۇشەيە تۇسەتىنىن ايتىپ, ورىندى شاعىم تۇسكەن جاعدايدا ورتالىق جانە جەرگىلىكتى ورگانداردىڭ باسشىلارى تىكەلەي جاۋاپ بەرەتىنىن اتاپ ءوتتى. قاسىم-جومارت توقاەۆ مەملەكەتتىك قىزمەتشىلەردىڭ حالىقپەن تىعىز جۇمىس ءىستەۋى قاجەت ەكەنىنە باسا ءمان بەرىپ, باسشىلاردىڭ حالىق الدىنداعى ەسەپ بەرۋ كەزدەسۋلەرىنىڭ قازىرگى فورماتىن سىنعا الدى. مەملەكەت باسشىسى ەڭبەكسۇيگىشتىك پەن سىڭىرگەن ەڭبەككە وراي ماراپاتتاۋ قۇندىلىقتارىنىڭ يدەياسى ۇلتتىق يدەولوگيامىزدىڭ باستاۋىندا تۇرۋى قاجەت ەكەنىن ايتتى.
– ءبىز ازاماتتارىمىزدىڭ, ەڭ الدىمەن, جاستاردىڭ جۇمىسقا ورنالاسۋىنا جانە كاسىبي تۇرعىدان وسۋىنە جاعداي جاساۋعا ءتيىسپىز. شەتەلدە جۇمىس ىستەپ جاتقانداردىڭ الەۋەتىن ەلىمىزدە پايدالانۋ مۇمكىندىگىن قاراستىرۋىمىز كەرەك. سوندا ءبىز كۇشەيە تۇسەمىز. سونىمەن قاتار جۇمىس تابۋعا ۇمتىلمايتىنداردى, اسىرەسە الەۋمەتتىك ماسىلدىقتى قولداۋعا بولمايدى. مەملەكەت الەۋمەتتىك جاعدايى ناشارلارعا كومەك كورسەتەتىن بولادى. قالعاندارىنىڭ ءبارى جۇمىس ىستەۋگە ءتيىس, – دەدى قازاقستان پرەزيدەنتى. وعان قوسا, ۇكىمەتكە بيۋدجەتتى تەك مەملەكەتىمىزدىڭ دامۋىنا ءجانە قاۋىپسىزدىك ماقساتتارىنا وراي قايتا بەيىمدەۋدى, سونداي-اق يميدجدىك ءىس-شارالارعا ارنالعان شىعىنداردى ازايتۋدى تاپسىردى.
– مەملەكەتتىك شىعىستاردىڭ باستى مىندەتى – قاراپايىم ادامداردىڭ ماسەلەلەرىن شەشۋ. اۋىز سۋ, باسپانا, جۇمىس ورىندارى, جايلى ءومىر ءۇشىن ينفراقۇرىلىم – وسىلاردىڭ ءبارى ەل تۇرعىندارىن الاڭداتادى. مىنە, ءبىز وسى مىندەتتەردى شەشەتىن بولامىز. مينيسترلەر مەن اكىمدەردىڭ جۇمىسىن ناقتى پروبلەمالاردى شەشۋ ءناتيجەلەرى بويىنشا باعالايتىن بولامىن, – دەدى قاسىم-جومارت توقاەۆ.
سونىمەن قاتار قازاقستان پرەزيدەنتى رۋحاني جاڭعىرۋ ماسەلەلەرىنە توقتالىپ, ەلباسىنىڭ «رۋحاني جاڭعىرۋ» باعدارلاماسى جانە « ۇلى دالانىڭ جەتى قىرى» اتتى ماقالاسىنداعى باعىتتاردى ودان ءارى جۇزەگە اسىرۋدىڭ ماڭىزدىلىعىن ايتتى.
كەزدەسۋ بارىسىندا جاستار جىلىن وتكىزۋ ىسىنە دە ەرەكشە نازار اۋدارىلدى.
– ءبىز جاستار ءۇشىن جاڭا ءمۇمكىندىك بەرۋىمىز كەرەك. سونىڭ ىشىندە ولاردىڭ بيزنەسپەن اينالىسۋىنا, ءبىلىم الۋىنا, جۇمىسقا ورنالاسۋىنا, تابىس تابۋىنا جول اشۋ قاجەت. ءوز ءومىرىن جاقسارتۋعا, مانسابى بويىنشا جوعارىلاۋعا ارنالعان الەۋمەتتىك ليفتىلەر ءىس جۇزىندە جۇمىس ىستەۋى كەرەك. ەلىمىزدىڭ جاستارى مەن تالانتتى ازاماتتارى مەملەكەتتىك قىزمەتتە ءىلگەرىلەۋ ءۇشىن ارنايى كادرلىق باعدارلاما دايىندايمىز. بولاشاعىمىز جاستاردىڭ قولىندا, – دەدى قاسىم-جومارت توقاەۆ. سوڭىندا مەملەكەت باسشىسى ءوزىنىڭ پرەزيدەنت رەتىندەگى نەگىزگى ۇستانىمدارى ساباقتاستىق, ادىلەتتىلىك جانە ىلگەرىلەۋ ەكەنىن اتاپ ءوتتى.
شىمكەنت قالاسىنا باردى. مەملەكەت باسشىسى قاسىم-جومارت توقاەۆ جۇمىس ساپارى بارىسىندا شىمكەنت قالاسىنا كەلىپ, وندا ورنالاسقان اكىمشىلىك-ىسكەرلىك ورتالىعىن ارالاپ, «Shymkent city» جاڭا اۋدانىنىڭ ماكەتىن, اۋەجايدىڭ جاڭا تەرمينالىن كوردى. «ەسكى قالاشىق», قوشقار اتا وزەنىنىڭ جاعالاۋىن اباتتاندىرۋ جانە «تۇران» شاعىن اۋدانىنىڭ ينجەنەرلىك ينفراقۇرىلىمىن سالۋ جوبالارىمەن تانىستى. 20,5 گەكتار اۋماقتى قامتيتىن اكىمشىلىك-ىسكەرلىك ورتالىق زاماناۋي ينفراقۇرىلىمىمەن, ءومىر سۇرۋگە جانە بيزنەس ءجۇرگىزۋگە قولايلى جاعداي جاسالعاندىعىمەن ەرەكشەلەنەدى, سونداي-اق قالا قۇرىلىسى مەن ساۋلەتىنىڭ قازىرگى ستاندارتتارىنا ساي كەلەدى. قالانىڭ جاڭا اۋدانىندا جالپى اۋماعى 201,2 مىڭ شارشى مەتردى قامتيتىن 2 990 پاتەرى بار 47 ءۇي سالۋ جوسپارلانۋدا.
بيزنەس وكىلدەرىمەن كەزدەستى. قاسىم-جومارت توقاەۆ جەكە كاسىپكەرلەرمەن دە جولىعىپ, ولاردىڭ شىعارىپ وتىرعان ونىمدەرىمەن دە تانىستى. سونىڭ ءبىرى – توقىما ءوندىرىسىندەگى ءجىپ ءيىرۋ, وڭدەۋ جانە تىگىن تىگۋمەن اينالىساتىن «AZALA Textile» جاۋاپكەرشىلىگى شەكتەۋلى سەرىكتەستىگى. سونىمەن قاتار مەملەكەت باسشىسىنا «وڭتۇستىك» ارنايى ەكونوميكالىق ايماعىنىڭ بازاسىندا جۇمىس ىستەيتىن ءوندىرىستىك كاسىپورىندار جونىندە مالىمەت بەرىلدى. سولاردىڭ قاتارىندا «بال تەكستيل» جشس-ءنىڭ كىلەم جانە كىلەم ونىمدەرى فابريكاسى, «الەم-بت» جشس-ءنىڭ ش ۇلىق فابريكاسى, «پك «اگف گرۋپپ» جشس-ءنىڭ كونۆەيەرلى تىگىن فابريكاسى, «سپ «Lux shoes» جشس-ءنىڭ اياق كيىم فابريكاسى, «Tumar Textile» جشس-ءنىڭ ورامالدار مەن حالاتتار تىگەتىن فابريكاسى جانە باسقا دا كاسىپورىندار بار. بۇدان بولەك, قازاقستان پرەزيدەنتى «MEDIKER 4K» مەديتسينا مەكەمەسىنىڭ جۇمىسىمەن تانىسىپ, دارىگەرلەر بولمەلەرىن ارالاپ كوردى. اتالعان كومپانيانىڭ «مەديكەر» ەمحاناسى رەسپۋبليكالىق ەمحانالار جەلىسىنىڭ فيليالى سانالادى. بۇل مەكەمە تسيفرلى مەديتسينا, دياگنوستيكا جانە سپورتتىق مەديتسينا سياقتى باعىتتار بويىنشا جۇمىس ءىستەيدى. وسىلايشا پرەزيدەنت ءتۇركىستان وبلىسىنداعى ساپارى بارىسىندا ءوڭىردىڭ تىنىس-تىرشىلىگىمەن تانىسىپ, قوعامنىڭ ءتۇرلى وكىلدەرىمەن كەزدەسىپ, ءوزىنىڭ وي-پىكىرلەرىمەن ءبولىستى.
عالىمجان ەلشىباي,
نۇرشات توكەن,
«Egemen Qazaqstan»
