ۇلىستىڭ ۇلى كۇنى الماتىلىقتاردى دۋمانعا بولەگەن ايرىقشا كەشتىڭ اتاۋىندا ايتىلىپ تۇرعانداي, كونتسەرتتە حالقىمىزدىڭ ءىنجۋ-مارجان مۇراسىنداعى جاۋھار شىعارمالارعا بالاناتىن اسەم اندەر ورىندالدى. كومەيىنە بۇلبۇل ۇيالاعان ءداستۇرلى انشىلەر كورەرمەندى ءوز ونەرىمەن باۋرادى.
«تاۋەلسىزدىكتىڭ ارقاسىندا ءداستۇرلى ونەرىمىزگە دەگەن بەتبۇرىس جىلدان-جىلعا ارتىپ كەلەدى. بۇگىن شىرقالعان اندەردىڭ ءاربىرىنىڭ وزىنە ءتان تاريحى بار. قازاقتىڭ ۇلتتىق ونەرىن ۇلىقتاپ كەلگەن اعايىندى كورىپ ءىشىمىز جىلىپ قالدى. قازاق باردا قازاقتىڭ ءانى ولمەيدى», – دەيدى ءداستۇرلى ءانشى جاسۇلان مۇساعالي.
كونتسەرتتە ءبىرجان سال, اقان سەرى, قاپەز, ءسۇيىنباي مەن قابان جىراۋ سەكىلدى ۇلت ونەرىنىڭ الداسپاندارىنىڭ ايگىلى اندەرى مەن تەرمەلەرى شىرقالدى.
«مۇنداي ءداستۇرلى اۋەندەر ايتىلاتىن ءان كەشتەرىنىڭ ءجيى ءوتىپ تۇرعانى جاقسى عوي. جانىمىز جاسارىپ, كوڭىلىمىز سەرگىپ قالدى. بۇل اندەر قازاقتىڭ دالاسى سياقتى سالقار. كەۋدەمىز كەڭەيىپ, مىڭ جاساعانداي كۇي كەشتىك»,-دەيدى ونەر جارمەڭكەسىن تاماشالاۋعا كەلگەن الماتىلىق باقىتجان زامانبەكوۆ.
ارمان وكتيابر,
«ەگەمەن قزاقستان»
الماتى
