«وتباسىلىق سوت» پيلوتتىق جوباسىن جۇزەگە اسىرۋ اياسىندا ماڭعىستاۋ وبلىسى قازاقستان حالقى اسسامبلەياسى عيماراتىندا ارنايى «وتباسى ورتالىعى» سالتاناتتى تۇردە اشىلدى.
اشىلۋ راسىمىنە ماڭعىستاۋ وبلىستىق سوتىنىڭ قىلمىستىق ىستەر جونىندەگى سوت القاسىنىڭ توراعاسى ەرجان قاراباەۆ, اۋداندىق جانە وعان تەڭەستىرىلگەن سوتتاردىڭ توراعالارى مەن سۋديالارى, ماڭعىستاۋ وبلىستىق قحا حاتشىلىعىنىڭ مەڭگەرۋشىسى گۇلجان يسمۋرزينا, ەتنومادەني بىرلەستىكتەردىڭ وكىلدەرى قاتىستى.
اتالعان ورتالىقتا وتباسىلىق داۋ-جانجالداردى شەشۋ ماقساتىندا بىتىمگەر سۋديا جانە پسيحولوگ جۇمىس جاسايتىن بولادى. مۇندا وتباسىنى ساقتاپ قالۋ ماقساتىندا تاراپتارعا جانە بالالارعا الدىمەن پسيحولوگيالىق كومەك كورسەتىلەدى.
ورتالىق بالالارعا ارنالعان قىزىقتى كىتاپتارمەن, ويىنشىقتار مەن وزگە دە دامىتۋ قۇرالدارىمەن قامتاماسىز ەتىلگەن. ورتالىقتا ىستەردى مەدياتيۆتىك راسىممەن شەشۋگە زور ءمان بەرىلمەك. جيىندا وتباسىلىق ىستەردىڭ ساناتتارى, ولاردى بىتىمگەرشىلىكپەن شەشۋ جولدارى جانە وسى باعىتتاعى سوت پراكتيكالارى تالقىلاندى.
قاتىسۋشىلار سوتقا الىپ كەلەتىن داۋلاردىڭ سەبەبى مەن ەرلى-زايىپتىلاردىڭ الەۋمەتتىك ماسەلەلەرى دە تالقىلادى. بۇل كۇنى ماڭعىستاۋ وبلىستىق اكىمدىگىنىڭ قولداۋىمەن وتكىزىلگەن قايىرىمدىلىق اكتسياسىنىڭ قورىتىندىسى شىعارىلدى. ياعني, 1 ناۋرىز العىس ايتۋ كۇنىنە وراي وبلىس ورتالىعىندا قايىرىمدىلىق كونتسەرتى وتكىزىلىپ, ودان جينالعان قاراجات ارنايى قايىرىمدىلىق قورىنا اۋدارىلدى. وڭىردەگى سۋديالار دا وسى ىزگى شارادان قالىس قالماي, ءبىر كۇندىك جالاقىلارىن قورعا اۋدارعان بولاتىن.
ناتيجەسىندە 2 500 000 تەڭگە جينالىپ, القا توراعاسى ەرجان قاراباەۆ پەن گۇلجان يسمۋرزينا كوپبالالى جاعدايى تومەن 5 وتباسىعا اتاۋلى قاراجاتتى تەڭدەي ءبولىپ بەردى.
گۇلايىم شىنتەمىرقىزى,
«Egemen Qazagstan»
ماڭعىستاۋ وبلىسى
