كونكۋرسقا قاتىسۋ ءۇشىن كانديداتتار وتىنىشتەرىن eqyzmet.gov.kz پورتالى ارقىلى ونلاين تۇردە بەرەدى. بۇل ءتاسىل ۋاقىتتى ءتيىمدى پايدالانۋعا مۇمكىندىك بەرىپ, مەملەكەتتىك قىزمەتكە كىرۋ پروتسەسىنىڭ اشىقتىعىن ارتتىرادى.
مەملەكەتتىك لاۋازىمدارعا كانديداتتار كونكۋرسقا قاتىسار الدىندا زاڭنامانى بىلۋگە ارنالعان تەستىلەۋدەن, سونداي-اق جەكە قاسيەتتەرىن باعالاۋ كەزەڭىنەن وتەدى. زاڭنامالىق تەست قازاقستان رەسپۋبليكاسىنىڭ كونستيتۋتسياسى, «مەملەكەتتىك قىزمەت تۋرالى» جانە «سىبايلاس جەمقورلىققا قارسى ءىس-قيمىل تۋرالى» زاڭدارى, سونداي-اق ادەپ كودەكسى بويىنشا جۇرگىزىلەدى. 55 سۇراقتان تۇراتىن تەستىلەۋدە كەمىندە 30 دۇرىس جاۋاپ بەرۋ جانە ءاربىر نورماتيۆتىك اكت بويىنشا كەمىندە 5 دۇرىس جاۋاپ كورسەتۋ قاجەت.
جەكە قاسيەتتەردى باعالاۋ ءۇش باعدارلاما بويىنشا وتكىزىلەدى:
– باسشىلىق لاۋازىمدارعا ارنالعان (10 قۇزىرەت);
– باسشىلىق ەمەس لاۋازىمدارعا ارنالعان (7 قۇزىرەت);
– جۇمىس ءوتىلىن تالاپ ەتپەيتىن تومەنگى لاۋازىمدارعا ارنالعان (ەموتسيونالدىق, الەۋمەتتىك جانە لوگيكالىق قابىلەتتەر).
تەستىلەۋ ناتيجەلەرى ءبىر جىل بويى جارامدى. كانديداتتار جەكە قاسيەتتەردى باعالاۋ تەستىن ايىنا ءۇش رەتكە دەيىن تاپسىرا الادى.
كونكۋرسقا ەڭ جوعارى بالل جيناعان توپ-5 كانديدات جىبەرىلەدى. قۇجاتتار جەكە كابينەت ارقىلى ۇسىنىلادى.
باسشىلىق لاۋازىمدارعا كانديداتتار ەسسە جازىپ بەينەبايلانىس ارقىلى اڭگىمەلەسۋدەن وتەدى. ال باسقا لاۋازىمدارعا كانديداتتار پراكتيكالىق تاپسىرمالار ورىندايدى (اناليتيكالىق جازبا, رەسمي حات دايىنداۋ, وتىنىشتەردى قاراۋ).
ەكىباستۇزدا قۇمار ويىندارعا قاتىسقان مەملەكەتتىك قىزمەتشىلەر انىقتالدى
جۇيە بارلىق ناتيجەلەردى اۆتوماتتى تۇردە ەسەپتەيدى. ەڭ جوعارى جيىنتىق بالل جيناعان كانديدات جەڭىمپاز دەپ تانىلادى. بالل تەڭ بولعان جاعدايدا ەڭبەك ءوتىلى مەن ءبىلىم دەڭگەيى ەسكەرىلەدى.
جالپى ىرىكتەۋ كەزەڭدەرىنىڭ اشىقتىعى, وبەكتيۆتىلىگى جانە ادىلدىگىن قامتاماسىز ەتۋ ماقساتىندا (اڭگىمەلەسۋ كەزەڭىن قوسپاعاندا) بارلىق كەزەڭدەردە پروكتورينگ قولدانىلادى.
باتىس قازاقستاندا مەملەكەتتىك قىزمەتكەر ۇلتتىق بۇيىمدار جاساۋمەن اينالىسادى
جاڭا تارتىپكە سايكەس كونكۋرس راسىمدەرىنىڭ ۇزاقتىعى ايتارلىقتاي قىسقارىپ, ورتا ەسەپپەن 5–7 جۇمىس كۇنىن قۇرايدى (بۇرىن 23–30 كۇن بولعان).
جالپى, جاڭارتىلعان جۇيە مەملەكەتتىك قىزمەتكە قابىلداۋ پروتسەسىن جەڭىلدەتىپ, ونىڭ اشىقتىعى مەن ادىلدىگىن قامتاماسىز ەتۋگە, سونداي-اق كاسىبي كادرلاردى تارتۋعا مۇمكىندىك بەرەدى.
