ل. يبراگيموۆانىڭ ايتۋىنشا, كوپبالالى وتباسىلاردى مۇقيات تالداۋ وتباسىلاردىڭ تابىستارى ەڭ تومەنگى جانە جوعارى جالاقى ارالىعىندا تۇرلەنەتىنىن كورسەتتى. جالپى, ەلباسى تاپسىرماسى بويىنشا جىل سايىن 100 ملرد تەڭگە ءبولىندى. ءبىرىنشى سانات — اتاۋلى الەۋمەتتىك كومەك الاتىن وتباسىلار, ولار مەملەكەتتىڭ رەسۋرستارىنا ءومىر سۇرەدى, كىرىستەرى وتە تومەن. ولارعا ساتىپ الۋ قۇقىعىنسىز ارەندالىق تۇرعىن ءۇي بەرىلەدى.
«بيىل كوپ بالالى وتباسىلاردىڭ تۇرعىن ءۇي سالىنىپ بىتكەنشە كۇتپەۋى ءۇشىن, ۇدەرىستى جەدەلدەتۋگە 50 ملرد تگ ءبولىندى. ونىڭ ىشىندە 25 ملرد تگ قۇرىلىسقا, 25 ملرد تگ دايىن باسپانانى ساتىپ الۋعا جانە جەكەلەي 50 ملرد تگ تۇرعىن ءۇي جيناق بانكىنە بولىنەدى», — دەدى ل. يبراگيموۆا.
باسقارما ءتورايىمىنىڭ ايتۋىنشا, تقجب مىندەتى — وتباسىنىڭ ءبىر مۇشەسىنە تابىسى 20 000 – 42 500 تگ قۇرايتىن, تولەم قابىلەتى بار ازاماتتاردى قامتاماسىز ەتۋ.
«ماسەلەن, 4 بالاسى بار جانە اتا-انالارىنىڭ تابىسى شامامەن 260 مىڭ تەڭگەنى قۇرايتىن وتباسىنى الىپ قارايىق. ولار ءبىزدىڭ باعدارلاماعا ساي كەلەدى. ولاردىڭ مولشەرلەمەسى جىلىنا 2%, باستاپقى جارناسى 10% بولادى, سونىمەن قاتار, اكىمدىكتەر باستاپقى جارناعا قاراجاتتارى جوق وتباسىلارعا كومەك كورسەتە الادى, ياعني تۇرعىن ءۇي سەرتيفيكاتىن بەرۋ مۇمكىندىگى قاراستىرىلعان. اتالعان باعدارلامانى ماتەماتيكالىق ءارى ەكونوميكالىق تۇرعىدان مودەلدەگەن كەزدە, ازاماتتاردىڭ قازىر جالداپ تۇراتىن ۇيلەرىنە تولەپ جۇرگەن سومالارىنا سايكەستەندىرۋگە تىرىستىق. ويتكەنى, بۇگىندە كوپ بالالى وتباسىلار قالالاردىڭ شەتكەرى ايماقتارىندا, ۋاقىتشا تۇراق-جايلاردا پاتەرلەردى جالداپ تۇرادى. سول سەبەپتى دە, 8 ملن تەڭگە سوماسىندا تولەم باستاپقى 8 جىلدا 42 مىڭ تگ قۇرايتىن بولادى, بۇل شاعىن جاتاقحاناعا تولەيتىن سومامەن بىردەي دەۋگە بولادى. ال ودان كەيىنگى 10 جىلدا 27 مىڭ تگ قۇرايدى», — دەپ ءتۇسىندىردى ل. يبراگيموۆا.
بۇعان قوسا, باعدارلاما ارقىلى جاڭا ءۇيدى دە, قايتالاما تۇرعىن ءۇيدى دە الۋعا بولادى.
«ماقسات – باسپانامەن قامتاماسىز ەتۋ, بۇل ءاربىر وتباسىنىڭ تولەم قابىلەتىنە بايلانىستى بولماق. بىزدە پاتەر كولەمى, اۋدانى بويىنشا شەكتەۋ جوق, شەكتەۋ تەك ازاماتتاردىڭ كىرىستەرىنە قاتىستى بولادى. ءسىزدىڭ تابىسىڭىز جوعارى بولسا, وندا ءسىز اتالعان باعدارلاماعا قاتىسا المايسىز. شەكتەۋ – وتباسىنىڭ ءبىر مۇشەسىنە 42,5 مىڭ تگ جانە ەكىنشىسى – جەكەمەنشىك باسپانانىڭ بولماۋى. اتالعان باعدارلاماعا قاتىساتىنداردىڭ ءبارى – قازىرگى تاڭدا باسپانا جالداپ تۇراتىن, ءوز باسىندا ءۇيى جوق ادامدار», — دەپ ءتۇسىندىردى ءتورايىم.
سونىمەن قاتار, بانك ءتورايىمى جاڭا تۇرعىن ءۇي باعدارلاماسى اياسىندا تۇرعىن ءۇيدى بەرۋ كەزىندەگى كەپىلزات ساتىپ الىنىپ جاتقان پاتەر بولاتىنىن اتاپ ءوتتى.
«كوپبالالى وتباسىلارعا قوسىمشا كەپىلزات ىزدەۋدىڭ قاجەتى جوق», — دەپ ناقتىلادى ل. يبراگيموۆا.
