ءوز سوزىندە ا.مامين ەلباسى ن.نازارباەۆتىڭ تاپسىرماسىنا سايكەس «نۇرلى جەر» باعدارلاماسىنا وزگەرىس ەنگىزۋ قاجەتتىگىن اتاپ ءوتتى.
«ەلباسىنىڭ الەۋمەتتىك قامقورلىق شارالارىن ىسكە اسىرۋ اياسىندا 5 جىلدىڭ ىشىندە جىل سايىن 6 مىڭعا جۋىق كوپبالالى وتباسى ۇيمەن قامتاماسىز ەتىلەدى. 1 مامىردان باستاپ پاتەر ءبولۋدى باستايمىز», دەدى ۇكىمەت باسشىسى.
سونىمەن قاتار پرەزيدەنتتىڭ الەۋمەتتىك باستاماسىنا سايكەس مۇقتاج وتباسىلارعا تۇرعىن ءۇي نەسيەلەرى قازاقستان تۇرعىن ءۇي قۇرىلىس جيناق بانكى ارقىلى بەرىلەتىنىن حابارلادى. «ەكى جىلدا 22,5 مىڭ وتباسى جەڭىلدىكپەن نەسيە الادى», دەدى پرەمەر-مينيستر.
بۇدان بولەك, ا.مامين قۇرىلىستاعى وتاندىق كاسىپكەرلەردىڭ ۇلەسىن 90 پايىزعا دەيىن ارتتىرۋدى تاپسىردى.
«ۇكىمەتتىڭ كەڭەيتىلگەن وتىرىسىندا ەلباسى قۇرىلىستاعى وتاندىق ۇلەستى ۇلعايتۋ مىندەتىن قويدى. وتاندىق قۇرىلىس ماتەريالىن شىعارۋ –«قاراپايىم زاتتار ەكونوميكاسى» باعدارلاماسىنىڭ ارنايى باعىتى. ونىڭ ورىندالۋىنا 600 ميلليارد تەڭگە كولەمىندە قاراجات ء بولىنىپ وتىر. بۇل ءۇشىن جەڭىلدىكپەن قارجىلاندىرۋ بويىنشا مەملەكەتتىك قولداۋ شارالارى كوزدەلگەن. وسى باعىتتا جاڭا جوبالاردى دامىتۋ كەرەك», دەدى پرەمەر مينيستر.
سونداي-اق ۇكىمەت باسشىسى جەرگىلىكتى ءونىمدى پايدالانۋ ەكونوميكانىڭ باسقا سالالارىنا كەڭىنەن اسەر ەتىپ, جاڭا جۇمىس ورىندارىن قۇرۋعا مۇمكىندىك بەرەتىنىن جەتكىزدى.
«تۇركىستان قالاسىندا اۋقىمدى قۇرىلىس ءجۇرىپ جاتىر. وسى جەردە قۇرىلىس ماتەريالدارىن شىعارۋ بويىنشا جوبالاردى جۇزەگە اسىرۋ قاجەت. ءبىز بۇل ماسەلەنى ومىرزاق ەستاي ۇلىمەن تالقىلادىق. جالپى, وسىنداي وندىرىستەردى بارلىق وڭىرلەردە ۇيىمداستىرۋ قاجەت. باقىلاۋ جەڭىس ماحمۇد ۇلىنا جۇكتەلەدى», دەدى ا.مامين.
