تالاپتى ءھام تاباندى ادامعا الىنبايتىن قامال جوق. دانيار شايانباەۆ «Zhas رroject» جوباسى جايىندا ينتەرنەتتەن كورىپ, كاسىپكەرلىكتى باستاۋعا ۇلكەن مۇمكىندىك ەكەندىگىن ءتۇسىندى. ءسويتتى دە, اۋداندىق «جاستار رەسۋرسى» ورتالىعىنا بارىپ, ترەنينگتەرگە قاتىستى. ءوزىنىڭ جاڭا جوباسىن ۇسىنىپ, 1 ملن تەڭگە قايتارىمسىز گرانت جەڭىپ الدى.
اياق استىنان ميلليونەر بولىپ شىعا كەلگەن دانيار كەيبىر قۇرداستارىنداي قىزىق قۋىپ كەتپەي, ءۇش باس ساۋىن سيىر ساتىپ الادى. ءسۇتتى ءۇش سيىر باعا بىلگەنگە اجەپتاۋىر بايلىق. سۇتتەن قايماق ايىرعاننان بولەك, ايران ۇيىتىپ, قۇرت, ىرىمشىك, سارى ماي العان دانياردىڭ جۇمىسى ءجۇرىپ سالا بەردى. بيزنەس جوباداعى باستاماسىنا وراي 12 وتباسىنىڭ ازىعىن ايىرعان جاس جىگىت بۇل جەتىستىگىنە توقمەيىلسىپ وتىرعان جوق. قاسىنا اۋىلداعى جۇمىسسىز جۇرگەن ءۇش ءجاسوسپىرىمدى تارتىپ, ايلىق تولەپ وتىرعان دانياردىڭ ەندىگى مەجەسى جاستار جىلىنا وراي بەرىلەتىن 3 ملن تەڭگەلىك گرانتتى جەڭىپ الۋ بولىپ وتىر. ءبىر ميلليونمەن-اق ءبىرتالاي الەۋمەتتىك ماسەلەلەردى شەشكەن جىگىت ءوزىنىڭ كەلەشەكتە مىقتى كاسىپكەر بولارىنا سەنەدى.
قارماقشى اۋداندىق جاستار رەسۋرستىق ورتالىعىنىڭ ديرەكتورى ءادىل يبراحيم «Zhas رroject» جوباسى بويىنشا اۋداندا 30-دان اسا جوبا ۇسىنىلعانىن ايتادى. سونىڭ ىشىندە جۇمىسسىز جۇرگەن 13 جاس قايتارىمسىز گرانت ۇتىپ العان.
مەملەكەتتىك كومەكتىڭ قولتىقتان مىقتاپ دەمەرىن سەزىنگەن جاستار بيزنەس نەسيەلەر مەن بيزنەس گرانتتاردىڭ وقىتۋ كۋرستارىنا كوپتەپ جازىلا باستاعان.
«Zhas رroject» – جاستار ءۇشىن ۇلكەن مۇمكىندىك. ەلباسى «Nur Otan» سەزىندە مەملەكەتتىك قولداۋلاردىڭ ءالى دە ءتيىمدى پايدالانىلماي جاتقانى جايلى ايتقان-دى. راسىندا, ميللياردتاعان قارجىنىڭ ءىزى جوق ساعىم جوبالارعا سالىنىپ, تالان-تاراج بولۋى جيىلەپ كەتتى. سونداي «سۋ اياعى قۇردىم» جوبالاردان گورى از عانا اقشامەن ۇلكەن ناتيجەگە جەتكەن دانيار سياقتى جاستارعا قولداۋ كورسەتىلگەنى الدەقايدا ءتيىمدى ەكەنى ءسوزسىز.
باقتيار تايجان,
«Egemen Qazaqstan»
قىزىلوردا وبلىسى
