كەزدەسۋدە ايماق باسشىسى ەلدىڭ رۋحاني دامۋى ءۇشىن الدىڭعى تولقىن ارداگەرلەردىڭ ۇلەسى مول ەكەندىگىن ايتتى.
«ەلباسىمىزدىڭ «بولاشاققا باعدار: رۋحاني جاڭعىرۋ», « ۇلى دالانىڭ جەتى قىرى» اتتى باعدارلامالىق ماقالالارى بويىنشا وبلىستا ناقتى جۇمىستار اتقارىلۋدا. وسى ماقالالارى ارقىلى تەرەڭگە تامىر تارتقان تاريحىمىزدى, ۇلتتىق بولمىسىمىزدى قادىرلەۋ كەرەكتىگىن ايتتى. سول ىزگى قاسيەتتەردىڭ ءبىرى – قازىنالى قارتتاردى قۇرمەتتەۋ. ال اقساقالدارىمىز ۇرپاققا ونەگەلى اڭگىمەسىن ايتىپ, ەلدى بىرلىككە, ىنتىماققا شاقىرۋى ءتيىس», – دەدى ءوڭىر باسشىسى ومىرزاق شوكەەۆ.
ودان سوڭ وبلىستىق ارداگەرلەر كەڭەسىنىڭ توراعاسى جەڭىسبەك ماۋلەنقۇلوۆ ۇيىمنىڭ نەگىزگى ماقساتىنا توقتالدى.
«ارداگەرلەر ۇيىمىنىڭ 168 مۇشەسى بار. 33 جىلدىق تاريحىن اۋىز تولتىرىپ ايتۋعا بولادى. ارداگەرلەر ۇيىمىنىڭ ماقساتى – ەل تاتۋلىعىن تۋ ەتىپ, ۇرپاق تاربيەسىنە كوڭىل ءبولۋ. ارداگەرلەردىڭ الەۋمەتتىك قامسىزداندىرىلۋىن جاردەم بەرۋ. سونداي-اق, سىزگە تۇركىستاندى تۇلەتۋدە, تۇركىستاندى كوركەيتۋدە قاجىر- قايرات تىلەيمىز», – دەدى ول.
كەزدەسۋدە بىرقاتار ارداگەرلەر ەلباسى ماقالاسى جايىندا, ءوڭىر احۋالى حاقىندا, سونداي-اق ۇيىم مۇشەلەرىنە قاجەتتى عيمارات, كولىك, قولداۋ جاعىن ءسوز ەتتى.
ءوز كەزەگىندە وبلىس اكىمى بارلىق قولداۋ كورسەتىلەتىندىگىن جەتكىزدى.
«حالقىمىزدا «ىنتىماق – بۇزىلمايتىن قورعان, قوسىلىپ ەككەن اعاش – ورمان» دەگەن ماقال بار. ياعني, ءار ءىستى كەلىسىپ ىستەي بىلسەك, ۇرپاقتار اراسىندا ساباقتاستىق ۇزىلمەسە, ەلىمىز وركەندەيدى. كەزىندە تولە, قازىبەك, ايتەكە سىندى كەمەڭگەرلەرىمىز ەلدى ۇلى مۇرات جولىندا توپتاستىرىپ, ءباتۋالى ويلارىن ايتىپ, مەملەكەتكە قىزمەت ەتە بىلگەن. سىزدەرگە عيمارات, كولىك تۇرعىسىنان ءتيىستى قولداۋ كورسەتىلەدى. تۇركىستاندى تۇلەتۋ جولىندا بىرىگە ەڭبەك ەتەمىز», – دەدى ومىرزاق ەستاي ۇلى.
