الدىن الا دەرەكتەر بويىنشا 22 بالا مەن ەكى ەرەسەك ادام اۋرۋحاناعا جاتقىزىلعان. بارىنەن بىردەي سيمپتومدار ياعني, باس اينالۋى, باس اۋرۋى, كوزدىڭ شىرىشتى قابىعىنىڭ تىتىركەنۋى بايقالعان.
«بارلىعىنا مەديتسينالىق كومەك كورسەتىلدى. گاز كومپانياسىنىڭ قىزمەتكەرلەرى مەكتەپ پەن اۆتونومدى قازاندىقتى مۇقيات تەكسەرىپ, تابيعي گازدىڭ سىرتقا شىعۋىن تەكسەردى, بىراق ەشتەڭە تاپپادى. ۋلانۋ تەك ءبىر عانا سىنىپتا ەمەس, ءارتۇرلى سىنىپ وقۋشىلارىندا بايقالدى. بولمەدە جانە مەكتەپ الاڭىندا جاعىمسىز ءيىس سەزىلگەن. بالالاردىڭ جاعدايى الاڭداۋشىلىق تۋدىرمايدى. كەيبىر وقۋشىلار اۋرۋحانادان شىعارىلىپ, ۇيلەرىنە قايتارىلدى», دەدى شىمكەنت قالالىق ءبىلىم ءبولىمىنىڭ باسشىسى اقەركە ابىلايحان.
وقيعا ورنىنا بارلىق توتەنشە جاعدايلار قىزمەتتەرى: توتەنشە جاعدايلار دەپارتامەنتى, پوليتسيا, دارىگەرلەر, گاز قىزمەتتەرى جۇمىس ىستەدى. ۋلانۋ سەبەپتەرى ءالى انىقتالمادى.
ايتا كەتەيىك, قالالىق دەنساۋلىق ساقتاۋ باسقارماسىنىڭ ءباسپاسوز قىزمەتى وكىلدەرىنىڭ سوڭعى مالىمەتى بويىنشا, قازىر 36 ادام ۋلانۋ بەلگىلەرىمەن اۋرۋحانادا جاتىر. ونىڭ ىشىندە 34 وقۋشىسى, ءبىر پەداگوگ جانە تەحنيكالىق قىزمەتكەر زارداپ شەككەن. 24 ادامعا كومەك كورسەتىلىپ, ۇيلەرىنە جىبەرىلدى. قالعاندارى ەم الىپ جاتىر.
