شارانى ۇيىمداستىرۋشىلار – قورعانىس مينيسترلىگى جانە «قازبات» بىتىمگەرلەر جاساعىنىڭ قۇرامىندا قىزمەت اتقارىپ ءجۇرىپ, 2005 جىلدىڭ 9 قاڭتارىندا يراك جەرىندە جارىلعان مينا سالدارىنان قايتىس بولعان بىتىمگەر-كاپيتان قايرات قۇداباەۆ اتىنداعى قوعامدىق قور مەن ەلىمىزدەگى پولشا رەسپۋبليكاسى ەلشىلىگىنىڭ قورعانىس ىستەرى جونىندەگى اتتاشەسى.
كورمەنىڭ سالتاناتتى اشىلۋ راسىمىنە بىتىمگەرلىك ميسسيانىڭ ارداگەرى, پولشا رەسپۋبليكاسىنىڭ زاپاستاعى بريگادا گەنەرالى گجەگوج بۋشكا جانە قورعانىس ءمينيسترىنىڭ ورىنباسارى گەنەرال-مايور ءمۇسليم التىنباەۆ قاتىسىپ, وتكەنگە سالاۋات, بولاشاققا بەرەكەت تىلەپ, ءسوز سويلەدى. بۇل تۇلعالاردىڭ ايتۋىنا قاراعاندا, قازاقستان مەن پولشا بىتىمگەرلەرى ءبىر-بىرىمەن يىق تىرەستىرە ءجۇرىپ يراكتا بەيبىت ءومىر قالىپتاستىرۋعا اتسالىسىپتى.
ياعني, يراكتاعى ميسسيا كەزىندە 300-گە تارتا قازاقستاندىق بىتىمگەر-جاۋىنگەرلەر «قازبات» ينجەنەرلىك-ساپەرلىك وترياد قۇرامىندا 10 رەت روتاتسياعا قاتىسىپ, دالالىق پۋنكتتەردى اۋىز سۋمەن قامتىپ, جارىلماي قالعان مينالاردى زالالسىزداندىرعان. سونىمەن قاتار جارىلۋ قاۋپى بار نۇكتەلەردىڭ كوزىن جويىپ, يراك اسكەري اكادەمياسىنىڭ 572 كۋرسانتىن ساپەر ىسىنە ماشىقتانعان.
كورمەگە جوعارىداعى اسكەري مىندەتتەردى اتقارۋ كەزىندە تۇسىرىلگەن قازاقستاندىق بىتىمگەرلەردىڭ 50-دەن استام فوتوسى قويىلدى.
شارا كەزىندە پولشا رەسپۋبليكاسىنىڭ ۇلتتىق قاۋىپسىزدىك بيۋروسى اسكەري قولباسشىلىعى دەپارتامەنتىنىڭ ديرەكتورى, بريگادا گەنەرالى ياروسلاۆ كراشەۆسكي مەن قازاقستان رەسپۋبليكاسىنىڭ پولشاداعى توتەنشە جانە وكىلەتتى ەلشىسى مارعۇلان باقىت ۇلى تىكەلەي ەفيرگە شىعىپ, اتالمىش فوتوكورمە الداعى 25 مامىردا ۆارشاۆا قالاسىنداعى «پولشا ۆويسكوسى» مۋزەيىندە جالعاساتىنىن جەتكىزدى.
بەكەن قايرات ۇلى,
«Egemen Qazaqstan»
