كوپ بالالى, ايلىعى شايلىعىنا جەتپەيتىن وتباسىلار العاشقى جارناسىن, ودان كەيىن اي سايىنعى نەسيەسىن تولەپ, باسپانالى بولۋعا دا قاۋقارسىز. سوندىقتان دا قازىرگى كەزدە كوپ بالالى جانە از قامتىلعان وتباسىلاردىڭ الەۋمەتتىك ماسەلەسىن وڭتايلاندىرۋ وزەكتى بولىپ تۇر. ال جامبىل وڭىرىندە جاعدايى تومەن جاندارعا ارنالعان جاتاقحانا سالىنادى دەگەن جاڭالىقتىڭ دا تالاي جۇرەككە جىلۋ, تالاي كوڭىلگە ءۇمىت ۇيالاتقانى انىق.
جۋىردا جامبىل وبلىسىنىڭ اكىمى اسقار مىرزاحمەتوۆ جەرگىلىكتى كوپ بالالى انالارمەن كەزدەسىپ, ولاردىڭ الەۋمەتتىك ماسەلەسىن شەشۋ ماقساتىندا وڭىردە 10 جاتاقحانا سالىناتىنىن ايتقان ەدى. كوكتەم شىعىپ كۇن جىلىنا سالىسىمەن, كوپ بالالى وتباسىلاردىڭ كوپتەن كۇتكەن ءۇمىتى اقتالعانداي. تاراز قالاسى №5 «قاراسۋ» شاعىن اۋدانىنان كوپ بالالى وتباسىلارعا ارنالعان 4 كوپقاباتتى الەۋمەتتىك جاتاقحانا سالىناتىن بولدى. جامبىل وبلىستىق قۇرىلىس باسقارماسىنىڭ باسشىسى جايىقباي شالداروۆتىڭ ايتۋىنشا, جاتاقحانادا بارلىعى 180 پاتەر بولادى دەپ جوسپارلانۋدا. اتالعان جوبانىڭ قۇنى 812 ميلليون تەڭگەگە اينالادى ەكەن. قۇرىلىستىڭ جالپى اۋماعى 8 100 شارشى مەتردى قۇراسا, پاتەردىڭ ءبىر شارشى مەترىنىڭ قۇنى 100,2 مىڭ تەڭگە بولادى.
ايتا كەتۋ كەرەك, جاڭا سالىناتىن تۇرعىن ءۇيدىڭ جاتاقحانا دەگەن اتى بولعانىمەن, زاتى زاماناۋي تالاپقا ساي كادىمگى پاتەر. العاشقى 4 بىردەي جاتاقحانا سالىناتىن اتالعان اۋماقتا ينفراقۇرىلىم ماسەلەسى شەشىلگەن. ال جاتاقحانانىڭ ىشكى قۇرىلىسى كادىمگى ەكى بولمەلى پاتەرلەردەن تۇرادى. ونداعى ءبىر پاتەردىڭ جالپى اۋدانى 35-40 شارشى مەتردى قۇرايدى. ءار پاتەردە زال جانە جاتىن بولمەلەر, سونداي-اق ءار پاتەردىڭ اس ءۇيى, اجەتحاناسى مەن جۋىناتىن بولمەسى دە جوسپارلانعان. جوسپار بويىنشا جوبانىڭ بارلىق قۇجاتتارى الداعى ءۇش ايدا دايىندالىپ, قۇرىلىس جۇمىستارى اعىمداعى جىلدىڭ ماۋسىم ايىندا باستالىپ, بيىلعى 1 جەلتوقسانعا دەيىن اياقتالۋى ءتيىس.
اتالعان ماسەلەگە وراي وتكەن جيىندا دا اكىم قۇجاتتاردى دايىنداۋ مەن قۇرىلىس جۇمىستارىن بارىنشا جىلدامداتىپ, اعىمداعى جىلدىڭ قازان ايىنا دەيىن جاتاقحانانى تاپسىرۋ كەرەگىن باسا ايتقان ەدى. ەگەر اكىمنىڭ قويعان تالابى ورىندالىپ, ءتيىستى مەكەمەلەر كۇش سالسا, جىل اياقتالماي جاتىپ-اق تالاي ازاماتتىڭ ارمانى ورىندالادى. سونداي-اق وڭىردە تۇرعىن ءۇي كەزەگىندە تۇرعان 23 مىڭ ادام بار ەكەن. ەندى ولاردىڭ ماسەلەسىن شەشۋ ءۇشىن وڭىردەگى تۇرعىن ءۇي قۇرىلىسىنىڭ كولەمىن بارىنشا ارتتىرۋ قاجەتتىگىنە كوڭىل ءبولىنىپ, بۇل باعىتتاعى جۇمىستار كۇشەيىپ كەلەدى.
ماسەلەن, 7 بالانىڭ اناسى اينۇر سەرىكباەۆا وتباسىمەن تاراز قالاسىندا پاتەر جالداپ تۇرادى. ت.رىسقۇلوۆ اۋدانىنان كەلگەن وتباسى 7 جىل بۇرىن پاتەر كەزەگىنە تۇرعان. ءبىر قيىنى, از قامتىلعان وتباسىندا دۇنيەگە كەلگەن ەگىز بالالاردىڭ سىڭارى بۇگىندە 6 جاسقا كەلسە دە, وزدىگىنەن جۇرە المايدى. وزدىگىنەن سويلەي دە المايتىن بالانى اينۇر كۇيەۋى ەكەۋى جۇمىس ىستەمەي ۇيىندە وتىرىپ قارايدى ەكەن. وسى سياقتى تاعى قانشاما الەۋمەتتىك جاعدايى تومەن وتباسى بار. ءبىر جاقسىسى, الداعى ۋاقىتتا وڭىردە وسىنداي از قامتىلعان جانە كوپ بالالى وتباسىلاردىڭ ماسەلەسىن شەشۋ ءۇشىن شارالار قولعا الىنۋدا.
«بينوم» جاۋاپكەرشىلىگى شەكتەۋلى سەرىكتەستىگىنىڭ باسشىسى سەرىك ولجابەكوۆ ۇيىم تاراپىنان بيىل جوبا قۇنى 203 ميلليون تەڭگەدەن بولاتىن ارقايسىسى 45 پاتەرلى ەكى كوپقاباتتى الەۋمەتتىك تۇرعىن ءۇي سالۋدى جوسپارلاپ وتىرعانىن ايتتى. سونىمەن قاتار سەرىكتەستىك باسشىسى ەگەر قولداۋ بولسا, بۇل باعىتتا اۋقىمدى قۇرىلىس جۇرگىزۋگە مۇمكىنشىلىكتەرى جەتەتىنىن دە مالىمدەدى. بۇل ورايدا وبلىس اكىمدىگى تۇرعىن ءۇي ماسەلەسىن شەشۋدە مەردىگەرلەردىڭ مۇمكىنشىلىگى مەن الەۋەتىن پايدالانۋدىڭ قوس تاراپقا دا تيىمدىلىگىن ەسكەرە وتىرىپ, ناقتى جۇمىستاردى باستادى. سونداي-اق تاراز جانە شۋ, جاڭاتاس, قاراتاۋ قالالارىنداعى تۇرعىن ءۇي كەزەگىندە تۇرعان از قامتىلعان وتباسىلاردىڭ جاتاقحانا ماسەلەسىن شەشۋ جولدارى سارالانىپ, جاڭا عيمارات سالۋ نەمەسە بوس نىسانداردى ساتىپ الىپ ىڭعايلاستىرۋ شارالارى دا جان-جاقتى تالقىلانۋدا.
حاميت ەسامان,
«Egemen Qazaqstan»
جامبىل وبلىسى
