وقيعا 6 ناۋرىزدا بولعان ەكەن. باسپانا يەلەرىنە ءورت قاۋىسىزدىگى جايلى ءتۇسىندىرۋ جۇمىستارىن جۇرگىزۋ ءۇشىن كوشە ارالاۋعا شىققان سەرجانت نۇرجان ساپاش كەزەكتى ءۇيدىڭ ەسىگىن قاققاندا, كومەك سۇراعان بوزبالانىڭ داۋىسىن ەستيدى. بۇل كەزدە ۇيدە 16 جاستاعى ەراسىل مەن ءىنىسى تەمىرلان ەكەۋى عانا بار ەدى. قاقپا سىرتىنان ەستىلگەن دىبىستان ويانعان ەستيار ەراسىل ىنىسىنە دەم جەتپەي, دەنەسى قۇرىسىپ جاتقانىن كورەدى. ءوز بەتىنشە كومەك كورسەتە الماعان ول جانۇشىرا ايقايلاپ جىبەرەدى. وسى كەزدە ۇيگە كىرگەن ءورت ءسوندىرۋشى تەمىرلاندى كورە سالا, بىردەن العاشقى مەديتسينالىق كومەك كورسەتۋگە كىرىسكەن. «جەدەل جاردەم» كەلگەنگە دەيىن نۇرجان دەمى تارىلعان ءجاسوسپىرىمدى قۇتقارۋعا كۇش سالدى. بالانىڭ «قۇرىسۋ سيندرومىمەن» اۋىراتىنىن ەستىگەن سوڭ, ونىڭ ءتىلىن جۇتۋىنا جول بەرمەي, تىنىس الۋىنا جانىن سالدى. دارىگەرلەر دە جىلدام جەتىپ, تەمىرلانعا ەكپە سالىپ كومەك كورسەتكەن.
- سول كۇنى كەزەكشىلىكتە بولعان دارىگەر ەندى 1 مينۋت كەشىككەندە بالامىز قۇرىسۋ مەن اۋا جەتىسپەۋىنەن ءولىپ كەتۋى مۇمكىن ەكەنىن ايتتى. سەرجانت ءبىزدىڭ ۇيگە دەر كەزىندە كەلگەن ەكەن. ۇلىمىزدىڭ قۇتقارۋشىسىنا العىسىمىز شەكسىز. ءوز ءىسىن ادال اتقاراتىن نۇرجان سياقتى جاستاردىڭ ءىسىن قوعام ءبىلىپ, دارىپتەپ ءجۇرسىنشى, - دەيدى بالپىق بي اۋىلىنىڭ تۇرعىنى جەكسەمباەۆتار وتباسى.
قالماحانبەت مۇقامەتقالي,
«Egemen Qazaqstan»
الماتى وبلىسى
