كەزدەسۋگە قوعامدىق دامۋ ءمينيسترىنىڭ م.ا. دارحان قالەتاەۆ, قر پرەزيدەنتى اكىمشىلىگىنىڭ مەمەلەكەتتىك ينسپەكتورى سالىمگەرەي بەكبەرگەنوۆ قاتىسۋدا.
ەسەپ بەرۋ كەزدەسۋى تىكەلەي ەفيردە جەرگىلىكتى تەلەارنالار مەن الەۋمەتتىك جەلىلەردە دە كورسەتىلدى.
- مەنىڭ بۇگىنگى ەسەبىم بارلىق دەڭگەيدەگى اكىمدەردىڭ قورىتىندى كەزدەسۋلەرىنىڭ تىزبەگىن اياقتاپ وتىر. قىستىڭ سوڭعى ايىندا حالىقپەن 429 كەزدەسۋ وتكىزىلىپ, وعان 40 مىڭ ادام قاتىستى. ءوزىمنىڭ ەسەبىمدى وتكەن جىلدىڭ شەگى ەمەس, اتقارىلعان جۇمىستاردىڭ ساپالى ولشەمىنىڭ كورسەتكىشتەرى جانە بولاشاققا قويىلعان ماقساتتارعا قوسىمشا تۇزەتۋ ەنگىزۋدىڭ مۇمكىندىگى دەپ بىلەمىن, - دەدى ەرلان قوشانوۆ. – بۇگىنگى تاڭدا تىلدەسۋدىڭ, اقپارات الماسۋدىڭ جولدارى الۋان ءتۇرلى – مەسسەندجەرلەر, الەۋمەتتىك جەلىلەر, سايتتار. سونىڭ سالدارىنان بەتپە-بەت جۇزدەسىپ, ديالوگ قۇرۋ مۇمكىندىكتەرى جويىلىپ بارادى. سوندىقتان وسى سەكىلدى كەزدەسۋلەر ارقىلى سىزدەرمەن جۇزدەسۋدىڭ بالاماسىن كورىپ وتىرعان جوقپىن.
ءوڭىر باسشىسى وتكەن جىلعى ەسەپ بەرۋ كەزدەسۋىنەن كەيىن جەرگىلىكتى بيلىك قانداي جۇمىستار اتقارعانىن باياندادى. ونىڭ ايتۋىنشا, سول جيىندا كوتەرىلگەن 65 ماسەلەنىڭ 37-ءى شەشىلگەن. قالعاندارىن شەشۋ ءۇشىن ۋاقىت قاجەت.
- جەزقازعان تۇرعىندارى دارىندى بالالارعا ارنالعان مەكتەپتىڭ جوقتىعى تۋرالى ايتتى. ماسەلە قارالدى, رەسپۋبليكالىق بيۋدجەتتەن قاراجات ءبولىندى, ناتيجەسىندە مەكتەپتىڭ قۇرىلىسى باستالدى. قاراعاندىلىقتار ورتالىق ساياباقتىڭ اباتتاندىرىلماعاندىعى تۋرالى ماسلەكوتەرگەن بولاتىن. وتكەن جىلى ساياباقتىڭ باتىس بولىگىن قايتا جاڭارتۋ جۇمىستارى جۇرگىزىلدى. بيىلعى جىلى ساياباقتى قالىپقا كەلتىرۋدى جالعاستىرامىز. وتكەن جىلى بارلىعى 80 گۇلزار مەن وبلىس بويىنشا 2 ۇلكەن ساياباق اباتتاندىرىلدى, - دەپ حابارلادى ەرلان قوشانوۆ.
تەمىرتاۋدا ەڭ باستى ماسەلەلەردىڭ ءبىرى ەكولوگياعا قاتىستى بولىپ تابىلادى, دەپ اتاپ ءوتتى ول. مەتاللۋرگتەر قالاسىنداعى ەكولوگيالىق جاعدايدى جاقسارتۋ ءۇشىن جوسپار قۇرىلدى. تاۋەلسىز ەكولوگتار جانە جۇرتشىلىقتىڭ قاتىسۋىمەن جاسىل كەڭەس قۇرىلدى.
تۇرعىن ءۇي شارۋاشىلىعى جانە ينفراقۇرىلىم ماسەلەلەرى دە شەشىلۋدە. ابايدا كارىزدىك جەلىلەردى قالىپقا كەلتىرۋ جۇمىستارى باستالدى - قۇنى 4 ملرد تەڭگەنى قۇرايتىن جوبا ءۇش جىلعا جوسپارلانعان. ال قارقارالى اۋدانىنىڭ اپپاز اۋىلىندا جاڭا سۋ تاراتقىش سالىنادى. نۇرا اۋدانىندا بيىلعى جىلى قۇلانوتپەس وزەنى ارقىلى وتەتىن كوپىردى قالىپقا كەلتىرۋ جۇمىستارى اياقتالادى.
