مەملەكەتتىك قىزمەت سالاسىنداعى باقىلاۋ دەپارتامەنتى ديرەكتورىنىڭ مىندەتىن اتقارۋشى ءمادينا ناۋرىزبەكتىڭ ايتۋىنشا, مەملەكەتتىك ورگانداردا ارتىق جۇمىس ىستەۋ فاكتىلەرى قىزمەتكەرلەردىڭ جۇمىس ساپاسى مەن ولاردىڭ دەنساۋلىعىنا كەرى اسەرىن تيگىزەدى.
وسىعان بايلانىستى ارنايى جۇيە ەنگىزىلدى. سونىڭ نەگىزىندە ارتىق جۇمىس ىستەيتىن مەمقىزمەتكەرلەردى انىقتاۋعا مۇمكىندىك بار.
«بيىل قاڭتار ايىندا مەملەكەتتىك ورگانداردا ۇستەمە جۇمىس فاكتىلەرى بويىنشا «سكۋد» جۇيەسىنىڭ دەرەكتەرىنە كەزەكتى تالداۋ جۇرگىزىلدى. وتكەن جىلدىڭ قىركۇيەك جانە جەلتوقسان ايلارىمەن سالىستىرعاندا وڭ سەرپىن بايقالادى. 2018 جىلدىڭ قىركۇيەگىندە 12 739 ساعات بولسا, جەلتوقساندا مەمورگانداردا ارتىق جۇمىس 4 790 ساعاتقا دەيىن ازايدى.
ال قاڭتار ايىندا اتالعان كورسەتكىش 1 194 ساعاتقا دەيىن قىسقاردى», - دەدى م.ناۋرىزبەك استانادا وتكەن ءباسپاسوز ءماسليxاتىندا.
ونىڭ ايتۋىنشا, بىرقاتار مەملەكەتتىك ورگاندا ارتىق جۇمىس ىستەۋ فاكتىلەرى مۇلدەم جويىلدى دەۋگە بولادى. سونىڭ ىشىندە يندۋستريا جانە ينفراقۇرىلىمدىق دامۋ مينيسترلىگى, ادىلەت مينيسترلىگى, ءبىلىم جانە عىلىم مينيسترلىگى, قورعانىس جانە اەروعارىش ونەركاسىبى مينيسترلىگى, مادەنيەت جانە سپورت مينيسترلىگى بار.
«قالعان مەملەكەتتىك ورگانداردا ۇستەمە جۇمىس فاكتىلەرىنىڭ ايتارلىقتاي ازايعانى بايقالادى. ايماقتاردا دا سولاي. سونىمەن قاتار, جەكەلەگەن مينيسترلىكتەردە ءالى دە ۇستەمە جۇمىس فاكتىلەرى بار. مىسالى, سىرتقى ىستەر مينيسترلىگىندە قاڭتار ايىندا 369 ساعات ۇستەمە جۇمىس انىقتالدى. دەنساۋلىق ساقتاۋ مينيسترلىگىندە 151 ساعات انىقتالدى. وسىعان بايلانىستى بارلىق مەملەكەتتىك ورگانعا ءتيىستى شارالاردى قابىلداۋعا قاتىستى ۇسىنىستار بەرىلدى», - دەپ اتاپ كورسەتتى م.ناۋرىزبەك.
