بىراق ءبىر ادامنىڭ جاساعان ىزگى ىسىنەن قۇلاعدار بولعان ەكىنشى ادامنىڭ بويىندا دا قايىرىم ەتۋگە دەگەن ىنتا وياناتىنى اقيقات. وسى رەتتە, اسىرەسە قولىندا ارتىق قاراجاتى بار كاسىپكەرلەردىڭ مۇقتاج جاندارعا جاساعان يگى امالدارىن ايتۋىمىزدىڭ ءجونى بار. وسىنداي يگى ءىس جەتىسۋ توپىراعىندا جالعاسىپ جاتىر. جاقىندا وڭىرگە تانىمال مەتسەنات-كاسىپكەر اسقار سۇلەيمەنوۆ تالعار اۋدانى گۇلدالا اۋىلىنان مۇقتاج وتباسىعا باسپانا ساتىپ الىپ بەردى. جانبولاتوۆتار اۋلەتى بۇعان دەيىن اۋىلداعى مونشا ءۇشىن سالىنعان عيماراتتى پانالاپ كەلگەن ەكەن.
– قۋانىش جانبولاتوۆتىڭ وتباسى ەسكى مونشادا تۇراتىنىن ءارى وتاعاسىنىڭ مۇگەدەك ەكەنىن الەۋمەتتىك جەلىدەن كورىپ, حاباردار بولدىق. بەينەجازبانى كورگەن وبلىس اكىمى اماندىق باتالوۆ تالعار اۋدانىنداعى ىسكەر ازاماتتاردان قولۇشىن بەرۋدى ءوتىندى. العاشقى بولىپ ءۇن قاتقان مەتسەنات اسقار سۇلەيمەنوۆ وتباسىنا ءۇي ساتىپ الىپ بەرەتىنىن ايتتى, − دەيدى ءبىزدى وقيعا بارىسىنان حاباردار ەتكەن وبلىس اكىمىنىڭ ءباسپاسوز حاتشىسى عالىمۇرات جۇكەل.
ال وتاعاسى قۋانىش جانبولاتوۆ بيلىك تاراپىنان مۇنداي ارەكەت كۇتپەگەن ەكەن. ول باسپانالى بولعانىن وبلىس اكىمىنىڭ ءوزى كەلىپ, جاڭا ۇيگە كوشەتىنىن ايتقاندا بارىپ ءبىر-اق بىلگەن. ۇيعىر اۋدانىنىڭ تۋماسى وندىرىستىك جاراقاتتىڭ كەسىرىنەن ءبىر كوزىنەن ايىرىلىپتى. قازىر جۇمىسسىز. مۇقتاج وتباسىن جارىلقاعان مەتسەنات اسقار سۇلەيمەنوۆ قۋانىشقا اۋىلدان لايىقتى جۇمىس تاۋىپ بەرۋگە ۋادە بەردى. دەمەك, بۇل يگى ءىس ايتۋعا تۇرارلىق جايت.
سونداي-اق الاكول اۋدانىندا دا باسپاناعا مۇقتاج وتباسىلاردىڭ ءوتىنىشى قاناعاتتاندىرىلدى. جاقىندا اۋدان اكىمى الىبەك جاقانباەۆتىڭ تاپسىرماسىمەن بەسكول اۋىلدىق وكرۋگىندە ەكى اۋلەتكە تۇرعىن ءۇي قورىنان پاتەر بەرىلدى. بەسكولدىك جالعىزباستى اكە نيكولاي ودۋدەنكو 3 بالاسىن باعىپ-قاعىپ وتىر. جاعاجايداعى قوناق ۇيلەردىڭ بىرىندە قارا جۇمىس ىستەيتىن نيكولاي اۋلەتىمەن ەسكى ءۇيدى پانالاپ كەلگەن ەدى. باسپانا دەگەن اتى بولماسا, بۇل ۇيدە بالالاردىڭ ساباققا دايىندالۋىنا, الاڭسىز ويناۋىنا ەش مۇمكىندىك جوق-تۇعىن. بالالارىنىڭ ۇشەۋى دە ساباقتى جاقسى وقيدى. ۆيكتوريا التىنشى, ۆلاديمير ءتورتىنشى, ال سەرگەي ەكىنشى سىنىپقا بارىپ ءجۇر. جالعىزباستى اكەنىڭ جايىنان حاباردار بولعان اۋدان اكىمى نيكولايعا بەسكول اۋىلىنان 2 بولمەلى پاتەر بەردى. قازىر ورتالىقتان جىليتىن ۇيگە قونىستانعان اۋلەتتىڭ قۋانىشىندا شەك جوق.
وسى بەسكول اۋىلدىق وكرۋگىنىڭ «زاگاتزەرنو» اۋىلىندا تۇراتىن كوپ بالالى تاعى ءبىر وتباسىنىڭ دا جاعدايى ءماز ەمەس ەدى. الەكساندرا مەلنيكوۆانىڭ 10 بالاسى بار. ءوزى جالعىزباستى انا. بەسكولدەگى بالىق زاۋىتىندا جۇمىس ىستەيدى ەكەن. بار تاپقان-تايانعانىن بالالارىنىڭ اۋزىنا توساتىن الەكساندرانىڭ باسىندا باسپاناسى جوق. اۋدان اكىمدىگىنە جازعان ءوتىنىشى قارالىپ, جاقىندا بۇل اۋلەتكە دە 2 بولمەلى پاتەر بەرىلدى.
– وڭىردە كوپ بالالى وتباسىلارعا كورسەتىلەتىن كومەكتىڭ كولەمى جىل سايىن ارتىپ كەلەدى. ولاردى ازىق-ت ۇلىكپەن, كيىم-كەشەكپەن, تۇرمىستىق زاتتارمەن, قىستىق كومىرمەن قامتاماسىز ەتۋ, باسقا دا ماتەريالدىق قولداۋ كورسەتۋ بويىنشا ءتۇرلى شارالار بار. باسپانا جايىن دا قولدان كەلگەنشە شەشىپ جاتىرمىز. بىلتىر اۋدان ورتالىعى ءۇشارال قالاسىندا سالىنعان 20 جانە 60 پاتەرلى تۇرعىن ۇيدەن الەۋمەتتىك جاعىنان از قامتىلعان بىرنەشە وتباسىعا پاتەر بەردىك, − دەيدى الاكول اۋدانىنىڭ اكىمى الىبەك جاقانباەۆ.
جالپى, الماتى وبلىسىندا 2 مىڭنان استام كوپ بالالى انا تۇرعىن ءۇي كەزەگىندە تۇر ەكەن. وتكەن جىلدىڭ جەلتوقسان ايىندا ايماق باسشىسىنىڭ قابىلداۋىنا جازىلعان ءبىر توپ كوپ بالالى انا تالدىقورعان قالاسىنداعى تۇرعىن ءۇي كەزەگىنە قاتىستى ماسەلە كوتەرگەن بولاتىن. سول كەزدە وبلىس اكىمى ا.باتالوۆ «التىن القا», «كۇمىس القا» يەگەرلەرىنە ءۇي كەزەگىنە قاتىستى تۋعان پروبلەمانى باقىلاۋىنا الىپ, وڭتايلى شەشۋگە ۋادە بەرگەن ەدى. مۇنان بولەك, الماتى وبلىسىندا الەۋمەتتىك جاعىنان از قامتىلعان وتباسىلارعا دەگەن قامقورلىق نيەت ەرەكشە دەۋگە بولادى. اسىرەسە كوپ بالالى وتباسىلاردىڭ ءومىر ءسۇرۋ دەڭگەيىن ارتتىرۋعا باسا ءمان بەرىلۋدە.
– وبلىس اكىمدىگى كوپ بالالى انالارعا كومەك رەتىندە «7-20-25» باعدارلاماسى بويىنشا قايتارىمسىز 1 ميلليون نەسيە بەرىپ, تالدىقورعان قالاسىنداعى جاڭا كوتتەدج قالاشىعىنان جانە سالىنىپ جاتقان كوپ قاباتتى ەكى تۇرعىن ۇيدەن پاتەر ساتىپ الۋلارىنا جاعداي جاساماق. بيىل وبلىس اكىمىنىڭ وقۋ گرانتىن تاعى دا 100 گرانتقا كوبەيتەمىز. مۇنىڭ جارتىسى كوپ بالالى جانە از قامتىلعان وتباسىلاردان شىققان بالالارعا بەرىلەدى. ال از قامتىلعان وتباسىلاردىڭ تۇرعىن ۇيلەرىن گازعا قوسۋ باعاسىن ينۆەستورلار ەسەبىنەن تومەندەتۋگە كىرىستىك. ءبىز جەكە تۇرعىن ۇيلەرگە تەگىن گاز ولشەۋ قوندىرعىسىن ورناتۋ ءۇشىن دە قارجى قاراستىرىپ جاتىرمىز, − دەيدى وبلىس اكىمى اماندىق باتالوۆ.
قالماحانبەت مۇقامەتقالي,
«Egemen Qazaqstan»
الماتى وبلىسى
