اقىلىن جەتەكشى, قيالىن كومەكشى ەتكەن قوس جىگىتتىڭ ويلاپ شىعارعان قۇرىلعىلارى دا ەرەكشە. ون التى جاستاعى دۋلات ءامىرجان بۇگىنگى تاڭدا استانا قالاسى №73 مەكتەپ-ليتسەيىنىڭ 10-سىنىپ وقۋشىسى. ول قاراپايىم قولمەن يتەرۋ ارقىلى جۇرگىزەتىن مۇگەدەكتەر ارباسىنا اۆتوماتتاندىرۋ قوندىرعىسىن ويلاپ تاپقان. ارباعا ورناتىلعان قۇرىلعى مۇمكىندىگى شەكتەۋلى جانداردىڭ ەمىن-ەركىن قوزعالۋىنا مۇمكىندىك بەرمەك. دوڭگەلەكتى اينالدىراتىن ەكى قولدىڭ قىزمەتىن ەندى بار بولعانى ءۇش تەتىك اتقارادى.
«ەكى اياعى بىردەي سال بولىپ قالعان مۇگەدەك جاندار اربانىڭ دوڭعالاعىن قوس قولىمەن يتەرىپ جۇرگىزەتىنى بەلگىلى. ال مەنىڭ قۇرىلعىمدى قولدانۋ ارقىلى ولارعا جەڭىل ءارى جىلدام قوزعالۋعا مۇمكىندىك بار. اۆتوماتتاندىرىلعان اربانى الەمدىك نارىقتا شىعاراتىنداردىڭ باعاسى − تىم قىمبات. ونىڭ ەڭ ارزانى − 200 مىڭ تەڭگە. ەگەر ءبىز ساتىلىمعا شىعاراتىن بولساق, ءوز باعاسى 50-60 مىڭ تەڭگە بولادى. بۇل – تيىمدىرەك», دەيدى جوبا اۆتورى دۋلات.
ءبىر ادام اعاش وتىرعىزسا, ونى ادام سايا قىلادى. بۇگىنگى كەيىپكەرلەرىمىزدە دە وسىنداي يگى ءىستىڭ باسىن باستاپ, قايىرىمدىلىققا قادام جاساعان جاندار دەۋگە بولادى.
«بۇل قۇرىلعىنى دايىنداۋعا 40 كۇن ۋاقىت كەتتى. مەكتەبىمىزدە STEM زەرتحاناسى جۇمىس ىستەيدى. ول – وقۋشىلاردىڭ وزدەرىن شىڭداۋعا كوپ كومەگىن بەرەدى. بۇل رەتتە وسىنداي زەرتحانانى اشىپ بەرگەن مەكتەپ باسشىلىعىنا جانە جەتەكشىم جانات ەركەبۇلان ۇلىنا العىس ايتامىن», دەيدى دۋلات ءامىرجان.
دۋلاتتىڭ ويلاپ تاپقان قۇرىلعىسى ارباعا تاڭىلعان مۇمكىندىگى شەكتەۋلى مۇگەدەك جاندارعا ارنالعان بولسا, ال ءاليحاننىڭ قۇرىلعىسىن كوز جانارى كورمەيتىن زاعيپ جانداردىڭ تاياعىنا ورناتۋعا بولادى.
«بۇل قۇرىلعى زاعيپ نەمەسە ناشار كورەتىن جانداردىڭ كوشەدە ءجۇرۋىن جەڭىلدەتەدى. الداعى بوگەتكە ءبىر مەتر قالعاندا روبوتتالعان تاياق دىبىس شىعارىپ, بەلگى بەرەدى. قاشىقتىقتى كومپيۋتەر ارقىلى رەتتەۋگە بولادى. قۇرىلعى قاشىقتىقتى 5 مەترگە دەيىن سەزە الادى. ونىڭ ءوزىنىڭ باعاسى 5 مىڭ تەڭگە. ەگەر ونى وندىرىسكە شىعاراتىن بولساق, 13-15 مىڭ تەڭگە شاماسىندا بولادى. مەن پاۆلودار قالاسىنىڭ تۋماسىمىن. سول قالادا تۇرعاندا ءۇيىمىزدىڭ جانىندا «زاعيپتار قورى» بولدى. كۇن سايىن تاياق ۇستاعان جانداردى كورىپ, ولارعا كومەكتەسكىم كەلەتىن. سول وي وسىنداي قۇرىلعى جاساپ شىعارۋىما تۇرتكى بولدى», دەيدى استانا قالاسىنداعى №73 مەكتەپ-ليتسەيىنىڭ وقۋشىسى ءاليحان راحمەتوۆ.
«نۇر وتان» پارتياسى جاس ونەرتاپقىشتار اراسىندا وتكىزگەن رەسپۋبليكالىق «NURINTECH» يننوۆاتسيالىق جوبالار بايقاۋىندا «الەۋمەتتىك ماڭىزدى يننوۆاتسيالار» اتالىمى بويىنشا دۋلات ءىى-ورىندى, ءاليحان ءىىى ورىندى قانجىعالاعانىن دا ايتا كەتكەن ابزال.
قوس وقۋشىنىڭ جەتەكشىسى, STEM زەرتحاناسىنىڭ مۇعالىمى جانات ەركەبۇلان ۇلى اتالعان زەرتحانا 2018 جىلدان باستاپ جۇمىس ىستەيتىنىن, وعان 1-10 سىنىپ وقۋشىلارىنان 40 شاقتى ونەرتاپقىش بالالار اپتاسىنا ەكى مارتە قاتىساتىنىن جەتكىزدى.
راۋان قايدار,
«Egemen Qazaqstan»
