انالار اكىممەن كەزدەسۋ بارىسىندا ءتۇرلى الەۋمەتتىك ماسەلەلەرىن كوتەرىپ, تىلەك-وتىنىشتەرىن ءبىلدىردى.
ءوز كەزەگىندە اسقار مىرزاحمەتوۆ وڭىردەگى از قامتىلعان جانە كوپ بالالى انالارعا قاجەتتى كومەكتەر بارىنشا كورسەتىلەتىنىن, ول ءۇشىن بيىلعى بيۋدجەت ەسەبىنەن 30 ميلليارد تەڭگە بولىنگەنىن ايتتى. اكىمنىڭ ايتۋىنشا, از قامتىلعان وتباسىلاردى قولداۋ ماقساتىندا وبلىستا بيىل 10 جاتاقحانا سالىنادى. ونىڭ 7-ەۋى تاراز قالاسىنان, ال 3 جاتاقحانا شۋ, قاراتاۋ جانە جاڭاتاس قالالارىنان بوي كوتەرمەك. بۇل جاتاقحانالار تۇرعىن ءۇي كەزەگىندە تۇرعان از قامتىلعان جانە كوپ بالالالى وتباسىلاردى قامتيتىن بولادى. ال, وسىنداي وتباسىلاردان شىققان وبلىس مەكتەپتەرىندە وقيتىن 29 مىڭ بالانىڭ ىستىق تاماعىنا 2 ميلليارد تەڭگە, مەكتەپ فورماسىن الىپ بەرۋ ءۇشىن 500 ميلليون تەڭگە بولىنبەك. بۇدان بولەك, 23 مىڭ وقۋشىعا جازعى ساۋىقتىرۋ لاگەرلەرىنە تەگىن جولداما بەرىلمەك.
سونداي-اق, اكىم از قامتىلعان جانە كوپ بالالى وتباسىنان شىققان وقۋشىلار مەن تۇلەكتەر ءۇشىن دە ايتارلىقتاي جەڭىلدىكتەر جاسالاتىنىن جەتكىزدى. ايتالىق, بيىل كوللەدجدەرگە بولىنەتىن 13 مىڭ گرانتتىڭ 50 پايىزى از قامتىلعان جانە كوپ بالالى وتباسىنىڭ بالالارىنا تيەسىلى بولماق. ياعني, 6 جارىم مىڭعا جۋىق ستۋدەنت مەملەكەت ەسەبىنەن كوللەدجدەردە تەگىن وقىتىلادى. ولاردىڭ شاكىرتاقىسى مەن تاماقتانۋىنا 1,7 ميلليارد تەڭگە قارالماق.
سونىمەن قاتار, 7500 از قامتىلعان جانە كوپبالالى وتباسىلاردىڭ كوممۋنالدىق تولەمدەرىن تولەپ بەرۋ ءۇشىن 500 ميلليون تەڭگە بولىنەدى. اسقار مىرزاحمەتوۆ ءوز سوزىندە از قامتىلعان جانە كوپبالالى وتباسىلاردىڭ 70 پايىزى اۋىلدا تۇراتىنىن ەسكەرىپ, ولارعا دەمەۋشىلەر ەسەبىنەن قايتارىمسىز مال بەرۋ شارالارى دا قاراستىرىلىپ جاتقانىن ايتتى. سونىمەن قاتار, ءوڭىر باسشىسى الەۋمەتتىك قولداۋ كورسەتۋ ءۇشىن قۇرىلاتىن ارنايى كوميسسيا قۇرامىنا دا بارىنشا كوپبالالى انالاردىڭ قوسىلاتىنىن ايتىپ ءوتتى.
ايتا كەتەيىك, رەسپۋبليكالىق «باقىتتى وتباسى» اكتسياسى اياسىندا از قامتىلعان جانە كوپبالالى وتباسىلارىنا الەۋمەتتىك قولداۋ كورسەتۋ ءۇشىن وبلىستىق «قامقور» جوباسى قولعا الىنعان. وعان 1 مىڭنان اسا ەرىكتىلەر تارتىلدى.
حاميت ەسامان,
«Egemen Qazagstan»
جامبىل وبلىسى
