اشىلاتىن زاۋىتتاردىڭ قاتارىندا قاراعاندى وبلىسىنداعى قۇنى 30,6 ملرد تەڭگە بولاتىن, فەرروسيليتسيا شىعاراتىن زاۋىت, اقتوبە وبلىسىنداعى قۇنى 6,9 ملرد تەڭگەگە تەڭ, كەراميكا تاقتالارىن وندىرەتىن ءوندىرىس وشاقتارى بار. ءمينيستردىڭ ايتۋىنشا, «قاراپايىم زاتتار ەكونوميكاسىن» دامىتۋ ماقساتىندا وتاندىق كاسىپورىنداردى قولجەتىمدى نەسيەلەندىرۋگە 600 ملرد تەڭگە قاراستىرىلادى. ونىڭ 400 ملرد تەڭگەسى وڭدەۋ ونەركاسىبىنە باعىتتالۋعا ءتيىس. ءسويتىپ حالىق تۇتىناتىن وتاندىق ونىمدەردىڭ قاتارى 250-گە كوبەيەدى. ونىڭ ىشىندە جەڭىل ونەركاسىپكە جاتاتىن جيھاز ونەركاسىبى, سونداي-اق قۇرىلىس ماتەريالدارى بار.
بيىلعى جىلدىڭ ەنشىسىنە رەسپۋبليكالىق ماڭىزى بار 4,4 مىڭ شاقىرىم جولدى قايتا جاڭعىرتۋ جۇمىستارى دا ەنىپ وتىر. ونىڭ ىشىندە 518 شاقىرىم جولعا كۇردەلى جوندەۋ جۇرگىزىلسە, 1190 شاقىرىم اۆتوجولعا ورتاشا جوندەۋ جۇمىستارى جۇرگىزىلەدى.
اتالعان مينيسترلىكتىڭ قۇزىرەتىنە كىرەتىن ماڭىزدى سالالاردىڭ ءبىرى – حالىقتى تۇرعىن ۇيمەن قامتاماسىز ەتۋ. بيىل 13 ملن شارشى مەتر تۇرعىن ءۇي سالۋ جوسپارلانىپ وتىر. ناتيجەسىندە 118 مىڭ وتباسىنا جاڭا باسپانانىڭ كىلتى تابىس ەتىلمەك. ونىڭ ىشىندە 22 مىڭ پاتەر مەملەكەت قارجىسى ەسەبىنەن سالىنۋعا ءتيىس.
مينيستر ج.قاسىمبەكتىڭ ايتۋىنشا, بيىل قازاقستان ەكسپورتشىلارىنا قىتاي, بىرىككەن اراب امىرلىكتەرى مەن يران نارىقتارىنا شىعۋ جەڭىلدەيدى.
− ەكسپورتقا باعدارلانعان كومپانيالارعا مەملەكەت باسشىسىنىڭ تاپسىرماسىنا سايكەس قارجىلىق قولداۋدان تىس كومەك شارالارى كورسەتىلەدى. ەكسپورتتاۋشىلارعا قولداۋدىڭ سەرۆيستىك شارالارىن كۇشەيتۋ اياسىندا قحر, ءباا جانە يراننان ينسپەكتسيالىق كوميسسيالاردى قازاقستاندىق ەكسپورتتاۋشى كاسىپورىندارعا شاقىرۋ ارقىلى ولاردىڭ نارىقتارىنا شىعۋدى جەڭىلدەتۋ كوزدەلگەن, − دەدى ول.
مينيستر كەلتىرگەن دەرەكتەر بويىنشا, 2019-2021 جىلدارى ەكسپورتتاۋشىلاردى قولداۋ شارالارىن كۇشەيتۋ ءۇشىن 500 ملرد تەڭگە جۇمسالادى. قارجىلىق جانە سەرۆيستىك شارالاردى كۇشەيتۋ اكىمشىلىك جانە ساۋدا كەدەرگىلەرىن ەڭسەرۋگە مۇمكىندىك بەرەدى. بيزنەسكە الەۋەتتى ساتىپ الۋشىنى تاڭداۋعا, كولىك شىعىندارىن تومەندەتۋگە جول اشادى. بەلگىلەنگەن شارالاردى تابىستى جۇزەگە اسىرعان جاعدايدا شيكىزاتتىق ەمەس تاۋار ەكسپورتىنىڭ كولەمىن 2020 جىلعا قاراي 1,5 پايىزعا, ياعني 22,4 ملرد دوللارعا جەتكىزۋ جوسپارلانىپ وتىر.
مينيسترلىككە قاراستى ءار سالاعا قاتىستى وقىلعان باياندامالاردان كەيىن پرەمەر-ءمينيستردىڭ ءبىرىنشى ورىنباسارى اسقار مامين قازاقستاننىڭ ساۋدا ساياساتى اگرەسسيۆتى بولا ءتۇسۋى ءتيىس ەكەنىن ايتتى.
– ىشكى جانە سىرتقى ساياسات سياقتى ساۋدا ساياساتى دا ءبىرشاما اگرەسسيۆتى ءارى پرواكتيۆتى بولۋى قاجەت. قازىردىڭ وزىندە كۇردەلى نارىقتارمەن باسەكەگە تۇسەمىز. تاياۋ جىلدارى كورشىلەرىمىزدىڭ قارقىندى دامۋى ەسەبىنەن قالىپتاساتىن ەركىن ەكسپورتتىق كەڭىستىكتەگى ءوسىم بارىنشا شەكتەۋلى بولادى. سوعان دايىن بولۋ قاجەت, − دەدى ءبىرىنشى ۆيتسە-پرەمەر.
القا ءماجىلىسى وتىرىسىندا يندۋستريالاندىرۋ, «نۇرلى جول» جانە «نۇرلى جەر» مەملەكەتتىك باعدارلامالارىن ىسكە اسىرۋ, سونداي-اق شيكىزاتتىق ەمەس ەكسپورتتى, تەحنيكالىق رەتتەۋدى, گەولوگيا جانە جەر قويناۋىن پايدالانۋدى, كولىك جانە لوگيستيكانى, ازاماتتىق اۆياتسيانى, قۇرىلىس پەن تۇرعىن ءۇي-كوممۋنالدىق شارۋاشىلىقتى, يننوۆاتسيا مەن ونەركاسىپتى تسيفرلاندىرۋدى ىلگەرىلەتۋ ماسەلەلەرى قارالدى.
P.S. بەت قاتتالىپ جاتقاندا ەلباسى جارلىعىمەن ۇكىمەت وتستاۆكاعا كەتىپ, پرەمەر-ءمينيستردىڭ مىندەتىن ۋاقىتشا اتقارۋ اسقار مامينگە جۇكتەلدى.
ەركەجان ايتقازى,
«Egemen Qazaqstan»
