مينيستر جەڭىس قاسىمبەك اتاپ وتكەندەي, 2018 جىلدىڭ قورىتىندىسىندا بارلىق كورسەتكىشتەر بويىنشا وڭ ديناميكا بايقالادى. ونەركاسىپ 4,1%-كە ءوستى, سونىڭ ىشىندە تاۋ-كەن 4,6%-كە, وڭدەۋ ونەركاسىبى 4%-كە وسكەن.
ءمينيستردىڭ ايتۋىنشا سونىمەن قاتار, قازاقستان ارقىلى وتەتىن ءترانزيتتى كونتەينەرلىك تاسىمال كولەمى تۇراقتى ءوسىپ كەلەدى. «2018 جىلى كونتەينەرلىك تاسىمال كولەمى 537,4 مىڭ جفە-ءتى قۇرادى. بۇل 2017 جىلدىڭ سايكەس كەزەڭىمەن سالىستىرعاندا 55%-كە ارتىق. سونىڭ ىشىندە قىتاي-ەۋروپا-قىتاي باعىتى بويىنشا كورسەتكىش 54,6%-كە ءوسىپ, 310,8 مىڭ جفە-ءتى قۇرادى. 2019 جىلى كونتەينەرلىك تاسىمال كولەمىن ەكى ەسەگە, ياعني 1,2 ملن جفە-كە دەيىن ارتتىرۋ جوسپارلانىپ وتىر. وسىلايشا, بۇگىن قازاقستاندى ەۋرازيا ورتالىعىندا قالىپتاسقان ترانزيتتىك حاب دەپ ايتۋعا بولادى», - دەدى جەڭىس قاسىمبەك.
بۇعان قوسا, 2019 جىلى رەسپۋبليكالىق ماڭىزى بار 4,4 مىڭ كم جول قايتا جاڭعىرتىلاتىن بولادى. جىل سوڭىندا 654 كم جولدا قوزعالىستى اشۋ جوسپارلانۋدا. رەسپۋبليكالىق ماڭىزى بار 1,7 مىڭ كم اۆتوجولدى جوندەۋ جوسپارلانىپ وتىر. ونىڭ ىشىندە 518 كم جولعا كۇردەلى جوندەۋ, 1 190 كم اۆتوجولعا ورتاشا جوندەۋ جۇمىستارى جۇرگىزىلەدى. جەرگىلىكتى جەلىدەگى 4 مىڭ كم جول جوندەلەدى. وتكەن جىلدىڭ تەندەنتسياسى ساقتالعان جاعدايدا, 2025 جىلعا قاراي جەرگىلىكتى جولداردىڭ جاقسى جانە قاناعاتتانارلىق جاعدايىن 85%-كە دەيىن جەتكىزۋ جوسپارلانىپ وتىر. ول شامامەن 60 مىڭ كم جول.
القا ءماجىلىسى وتىرىسىندا يندۋستريالاندىرۋ, «نۇرلى جول» جانە «نۇرلى جەر» مەملەكەتتىك باعدارلامالارىن ىسكە اسىرۋ, سونداي-اق شيكىزاتتىق ەمەس ەكسپورتتى, تەحنيكالىق رەتتەۋدى, گەولوگيا جانە جەر قويناۋىن پايدالانۋدى, كولىك جانە لوگيستيكانى, ازاماتتىق اۆياتسيانى, قۇرىلىس پەن تۇرعىن ءۇي-كوممۋنالدىق شارۋاشىلىقتى, يننوۆاتسيا مەن ونەركاسىپتى تسيفرلاندىرۋدى ىلگەرىلەتۋ ماسەلەلەرى قارالدى. مينيسترلىكتىڭ القا ماجىلىسىنە پرەمەر-ءمينيستردىڭ ءبىرىنشى ورىنباسارى اسقار مامين, يندۋستريا جانە ينفراقۇرىلىمدىق دامۋ ءمينيسترى جەڭىس قاسىمبەك, پارلامەنت دەپۋتاتتارى, مەملەكەتتىك ورگاندار مەن قوعامدىق ۇيىمداردىڭ وكىلدەرى قاتىستى.
ەركەجان ايتقازى,
«ەگەمەن قازاقستان»
