اقتوبەدە اشىق ەسىك كۇندەرى اكتسياسى جالعاسۋدا. شارا بارىسىندا وبلىس تۇرعىندارى اقتوبە اكىمدىگىنىڭ, وبلىستىق باسقارمالاردىڭ, قۇقىق قورعاۋ ورگاندارىنىڭ جانە كوممۋنالدىق قىزمەتتەردىڭ باسشىلارى مەن ماماندارىنا جەكە سۇراقتارى بويىنشا تىكەلەي جۇگىنە الادى. 8-12 اقپان ارالىعىندا ازاماتتاردى قابىلداۋ پۋنكتتەرىنە 2267 سۇراقپەن 2155 ادام كەلگەن.
تۇرعىن ءۇي, اتاۋلى كومەك, الەۋمەتتىك جانە جەر ماسەلەلەرى, تۇرعىن ءۇي-كوممۋنالدىق شارۋاشىلىق پروبلەمالارى تۇرعىنداردى ءجيى تولعاندىرادى ەكەن. جەكە شارۋالارىمەن قايىرىلعان ازاماتتاردىڭ بارلىق ماسەلەلەرى تالدانىپ, الداعى جۇمىس باعىتتارى انىقتالدى. اكتسيا كەزىندە بالالاردى بالاباقشالار مەن مەكتەپتەرگە ورنالاستىرۋ, ماتەريالدىق كومەك كورسەتۋ, تەگىن ءدارى-دارمەك ءبولۋ جانە بىرنەشە ادامدى جۇمىسقا ورنالاستىرۋ سياقتى 220 ماسەلە شەشىلگەن. كەلىپ تۇسكەن 1801 ماسەلە بويىنشا ازاماتتارعا كەڭەس بەرىلدى, ال بىرقاتار سۇراققا بايلانىستى ودان ءارى ءىس-قيمىل جوسپارى جاسالدى. الەۋمەتتىك جاعىنان از قامتىلعان تاعى 27 ادامعا جاقىن ارادا 2 ملن. 650 مىڭ تەڭگە كولەمىندە ماتەريالدىق كومەك بەرىلەتىن بولدى. قالعان 219 ماسەلە قارالۋ ۇستىندە.
اشىق ەسىك كۇندەرى اياسىندا قالا اكىمدىگى قوعامدىق بەلسەندىلەر, دەپۋتاتتار جانە مەملەكەتتىك مەكەمەلەر وكىلدەرىنەن تۇراتىن موبيلدىك توپتار قۇردى. ولار ورىن العان ماسەلەلەردى شەشۋدىڭ ءتيىمدى تاسىلدەرىن انىقتاۋ ءۇشىن كومەككە اسا مۇقتاج جانداردىڭ وتباسىلارىنا بارماق.
2017 جىلى 17 قاڭتاردا ومىردە قيىن جاعدايعا تاپ بولعان ادامدارعا كومەك كورسەتۋ ماقساتىندا قۇرىلعان "قولعانات اقتوبە" قوعامدىق قورىنا ايلىق جالاقىنى اۋدارۋ تۋرالى اقتوبە اكىمى ءىلياس يسپانوۆتىڭ جەكە باستاماسى ۇلكەن وقيعا بولعانى ەسىمىزدە. قور ءوز جۇمىسىن تولىق كولەمدە باستادى جانە سول جىلى ءساۋىر ايىندا اقتوبە قالاسىنداعى سۋ تاسقىنى سالدارىن جويۋعا جانە مۇقتاج ازاماتتارعا كومەك كورسەتۋدە بارىنشا بەلسەندىلىك تانىتتى.
اكىمنىڭ باستاماسىن دەپۋتاتتار, كاسىپكەرلەر مەن قوعام قايراتكەرلەرى قولدادى. ايتا كەتەيىك, اقتوبە اكىمى 2017 جىلدان بەرى اي سايىن جەتىم ارتەم ستەپانەنكونىڭ شوتىنا اقشا اۋدارادى. وسى اۋدارىمدى ساناماعاندا, ءىلياس يسپانوۆ اعىمداعى ايداعى بارلىق قالعان جالاقىسىن "قولعانات اقتوبە" قوعامدىق قورىنىڭ شوتىنا اۋدارماق. سونداي-اق, قالا اكىمدىگى اقتوبە وبلىسىنىڭ اكىمى بەردىبەك ساپارباەۆتىڭ تاپسىرماسىمەن 2016 جىلدان بەرى 443 جەتىم بالاعا الەۋمەتتىك-پاتروناجدىق كومەك كورسەتۋدە.
14-15 اقپانعا دەيىن سوزىلعان اشىق ەسىك كۇندەرىنە ازاماتتاردى قابىلداۋ كەلەسى مەكەنجايلار بويىنشا جالعاسادى:
1) ساڭكىباي باتىر 249, «حالىق كەڭسەسى»;
2) ت.احتانوۆ كوشەسى, ت.احتانوۆ اتىنداعى دراما تەاترى;
3) ساڭكىباي باتىر كوشەسى 145 ب, استانا اۋدانىنىڭ اكىمدىگى;
4) «قارعالى» تۇرعىن الابى, قازان-60 جىل كوشەسى 70 ب, الماتى اۋدانىنىڭ اكىمدىگى.
قابىلداۋ ۋاقىتى: ساعات 10.00-دەن 18.00-گە دەيىن.
