مەملەكەت باسشىسى 2018 جىلعى 5 قازانداعى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» قازاقستان حالقىنا ارناعان جولداۋىندا ۇكىمەت ءۇش جىل ىشىندە ەكونوميكاداعى كولەڭكەلى اينالىمدى كەم دەگەندە 40%-عا قىسقارتۋ ءۇشىن ناقتى شارالار قابىلداۋعا ءتيىس ەكەنىن اتاپ ءوتتى. سونداي-اق, ەلباسى بيزنەس ءوز جۇمىسىن جاڭادان باستاۋ ءۇشىن 2019 جىلدىڭ 1 قاڭتارىنان باستاپ سالىقتىڭ نەگىزگى سوماسى تولەنگەن جاعدايدا, ءوسىم مەن ايىپپۇلدى الىپ تاستاي وتىرىپ, شاعىن جانە ورتا بيزنەس ءۇشىن «سالىق امنيستياسىن» جۇرگىزۋگە كىرىسۋدى تاپسىردى.
«بۇل تاپسىرمانى ورىنداۋ اياسىندا ءبىز بۇگىندە ءتيىستى شارالاردى قولعا الدىق. اتاپ ايتار بولساق, سالىقتىڭ نەگىزگى سوماسىن تولەگەن جاعدايدا ءوسىمپۇل مەن ايىپپۇلدى ەسەپتەن شىعارۋ ارقىلى سالىق امنيستياسىن جۇرگىزۋگە مۇمكىندىك بەرەتىن نەگىزگى زاڭنامالىق وزگەرىستەر ەنگىزىلدى. بۇل زاڭناماعا ەلباسى وتكەن جىلعى 28 جەلتوقساندا قول قويدى. اتالعان زاڭناما وسى جىلدىڭ 1 قاڭتارىنان باستاپ كۇشىنە ەندى», — دەدى قارجى ۆيتسە-ءمينيسترى.
قارجى ءمينيسترىنىڭ 21 قاڭتارداعى №39 بۇيرىعىنا سايكەس, سالىق تولەۋشىلەردىڭ نەگىزگى بەرەشەگىن تولەگەن جاعدايدا ءوسىمپۇل مەن ايىپپۇلدارىن ەسەپتەن شىعارۋ تۋرالى قاعيدا بەكىتىلدى. بۇل قاعيدا بۇگىندە رەسمي تۇردە جاريالانعان جانە 8 اقپاندا كۇشىنە ەنەدى.
«وسى قاعيدا كۇشىنە ەنگەننەن كەيىن 2 كۇننىڭ ىشىندە مەملەكەتتىك سالىق ورگاندارىنىڭ بارلىق اۋداندارداعى باسقارمالاردا ءتيىستى كوميسسيا قۇرىلاتىن بولادى. بۇل كوميسسيانىڭ نەگىزگى جۇمىسى – كۇندەلىكتى سالىق امنيستياسىنا قاتىساتىن سالىق تولەۋشىلەردىڭ دەربەس شوتتارىنا مونيتورينگ جاساپ وتىرۋ, سالىق تولەۋشى سالىقتىڭ نەگىزگى سوماسىن تولەگەن جاعدايدا, كوميسسيا ءۇش كۇننىڭ ىشىندە شەشىم قابىلدايدى. سوسىن ءۇش كۇن ىشىندە سالىق تولەۋشىنىڭ دەربەس شوتىنان ايىپپۇل مەن ءوسىمپۇل الىنىپ تاستالادى. ەلباسى ايتقانداي سول كۇننەن باستاپ سالىق تولەۋشى ءوزىنىڭ قىزمەتىن تازا پاراقتان باستاۋعا مۇمكىندىك الادى», — دەدى ۆيتسە-مينيستر.
سۇحبات بارىسىندا قارجى ۆيتسە-ءمينيسترى ق. باەدىلوۆ سالىق امنيستياسىنا جاتاتىن سالىق تولەۋشىلەر تۋرالى ايتىپ بەردى.
«سالىق امنيستياسىنا 2018 جىلعى 1 قازانداعى جاعدايعا سايكەس, وزدەرىنىڭ دەربەس شوتتارىندا سالىق بەرەشەكتەرى بار سالىق تولەۋشىلەر جاتادى. ەگەر شوب سۋبەكتىلەرى وزدەرىنىڭ دەربەس شوتتارىنداعى تولەنبەگەن سالىقتارىنىڭ نەگىزگى بولىگىن تولەسە, وندا ولاردىڭ دەربەس شوتىنان ايىپپۇل مەن ءوسىمپۇل الىنىپ تاستالادى. سونداي-اق, دەربەس شوتتارىنان 2018 جىلعى 1 قازاننان باستاپ نەگىزگى سوماسىن تولەگەن كۇنگە دەيىن ەسەپتەلگەن ايىپپۇلدى دا الىپ تاستايمىز. بۇعان وسى زاڭ مۇمكىندىك بەرەدى. سالىق امنيستياسىنا زاڭ بويىنشا مونيتورينگتە تۇرعان ءىرى مەكەمەلەر, اكتسيزدەندىرىلەتىن ونىمدەردى شىعاراتىن سالىق تولەۋشىلەر, سونداي-اق, جەر قويناۋىن پايدالانۋشىلار جاتپايدى. بىراق ايتا كەتەتىن جاعداي, جەر استى سۋىن جانە ەمدىك ماقساتتا شىعارىلاتىن بالشىقتاردى وندىرەتىن سالىق تولەۋشىلەر وسى مۇمكىندىكتەردى پايدالانا وتىرىپ, سالىق امنيستياسىنا قاتىسا الادى. سونىمەن قاتار, كاسىپكەرلىكپەن اينالىساتىن جەكە تۇلعالار سالىق امنيستياسىنا جاتپايدى», — دەدى ۆيتسە-مينيستر.
سونىمەن قاتار, قارجى ۆيتسە-ءمينيسترى وسىعان دەيىن وتكىزىلگەن سالىق امنيستيالارىنىڭ ناتيجەلەرىنە توقتالىپ ءوتتى.
«بۇعان دەيىن وتكىزىلگەن سوڭعى ەكى سالىق امنيستيالارىندا شاعىن جانە ورتا بيزنەس سۋبەكتىلەرىنىڭ دەربەس شوتتارىندا تۇرعان 143 ملرد تەڭگەگە جۋىق ايىپپۇلدار مەن ءوسىمپۇلدار ەسەپتەن شىعارىلدى. بۇل وتە ۇلكەن قاراجات. بۇل مەملەكەت تاراپىنان شوب سۋبەكتىلەرىنە كورسەتىلگەن ۇلكەن قولداۋ شاراسى ءارى ەكى جاققا دا ءتيىمدى. اتالعان ەسەپتەن شىعارىلعان سومانىڭ ارقاسىندا بيزنەس سۋبەكتىلەرى وزدەرىنىڭ اينالىمداعى اقشالارىن ۇنەمدەپ قالدى, سول اقشانى وزدەرىنىڭ كاسىپورىندارىن ودان ءارى دامىتۋعا جۇمسادى, جۇمىس ورىندارىن ساقتاپ قالدى, ەڭ باستىسى سالىق امنيستياسىن جۇرگىزگەننەن كەيىن الداعى ۋاقىتتا سالىق سالۋ بازاسى كەڭەيتىلەدى», — دەدى.
قارجى ۆيتسە-ءمينيسترىنىڭ ايتۋىنشا, سوڭعى ەكى سالىق امنيستياسىنا 122 مىڭ زاڭدى تۇلعا مەن جەكە كاسىپكەر قاتىسقان. بۇگىنگى كۇنى سولاردىڭ 67% ءونىمدى جۇمىس ىستەپ جاتىر, مەملەكەت الدىندا ەشقانداي قارىزدارى جوق. سوڭعى وتكەن سالىق امنيستياسىنىڭ بىردەن ءبىر جاقسى ناتيجەسى وسى.
«وكىنىشكە وراي ەلىمىزدە كەيبىر ازاماتتار سالىق تولەۋ ماسەلەسىنە نەمقۇرايلى قارايدى. مىسالى, 2019 جىلعى 1 قاڭتارداعى جاعداي بويىنشا 1,3 ملن ادامنىڭ مەملەكەت الدىندا قارىزدارى بار. ولاردىڭ قارىزدارىنىڭ جالپى سانى 21 ملرد تگ اسىپ وتىر. بۇل جەكە تۇلعالار ءۇشىن وتە ۇلكەن سوما دەپ ەسەپتەيمىن. كەيبىر ازاماتتار تىپتەن وزدەرىنىڭ سالىق بەرەشەكتەرى بار ەكەنىن بىلمەيدى جانە بۇل تۋرالى شەت ەلگە شىققان كەزدە نەمەسە باسقا جاعدايلاردا ءبىلىپ جاتادى. سوندىقتان دا سالىق تولەۋگە دۇرىس كوڭىل ءبولۋ كەرەك دەپ ويلايمىن», — دەدى قارجى ۆيتسە-ءمينيسترى.
