يدەيا قالاي تۋدى دەگەنگە كەلەتىن بولساق, بىلاي. 30 جىلدىق جۇمىس ءوتىلى بار باستاۋىش سىنىپ مۇعالىمى گۇلنار تەمىربولاتوۆا اتا-انالاردىڭ كەزەكتى جينالىسىندا بالانىڭ ۇشقىر قيالىنا ەرىك, شىعارماشىلىق ىزدەنىسىنە شابىت بەرەتىن, قارىم-قابىلەتىن اشاتىن ۇيىرمەلەردىڭ ماڭىزىن تۇسىندىرە كەلىپ ۇل-قىزدارىمەن بىرلەسىپ ءبىر-ءبىر جۇمىس جاساپ اكەلۋ جونىندە ءوتىنىش ايتادى. بىلىكتى ۇستازدىڭ تاپسىرماسى لەزدە ورىندالىپ, كوزدىڭ جاۋىن الاتىن نەبىر جوبالار ۇسىنىلادى. ولاردىڭ اراسىنان سپورت پەن ءبىلىمدى قاتار الىپ جۇرگەن نۇرجان ءشامىلدىڭ اكە-شەشەسىمەن بىرىگىپ ازىرلەگەن تۋىندىسى وزىندىك ورىندالۋ ەرەكشىلىگىمەن , كوركەمدىك شەبەرلىگىمەن جۇرتشىلىق نازارىن ەرىكسىز اۋدارادى.
ونەرلى وتباسىنىڭ قولىنان شىققان ۇلتتىق ناقىشتاعى ساياباققا «قوزى كورپەش–بايان سۇلۋ» دەگەن تاماشا اتاۋدى اپكەسى بەرسە, اكەسى جانبولات كۇن ەنەرگياسىنان قۋات الاتىن باعانالاردى جاساعان. اناسى گۇلجان گۇل وسىرەتىن اۋماقتى ازىرلەگەن. ۇجىمدىق ەڭبەكتىڭ نەگىزگى اۆتورى نۇرجان اينالانى كوركەيتكەن. ونىڭ يدەياسى بويىنشا ورتاعا تىلەك التىباقانى ورناتىلعان.
بالا قيالى شەكسىز عوي. كىشكەنتاي ورەن وبلىس ورتالىعىندا وسى ۇلگىگە ۇقساس ساياباق ورىن تەپسە دەگەن ارمانىن جاسىرمايدى. شىنىندا دا ۇلتتىق رەڭى سولعىن شاحاردا ورنالاسقان دەمالىس ورىندارى ءبىر-بىرىنەن اۋمايدى, ەگىزدىڭ سىڭارىنداي ۇقساس. كەڭەستىك كەزەڭدى ەسكە سالاتىن ەسكەرتكىشتەر كوپ. نەسى بار, وزىق ويلى بالاقايدىڭ ءيىنى قانعان يدەياسى جاس وتاۋ يەلەرىنىڭ عاشىقتىق, پاك, ادال سەزىمىن ايشىقتايتىن سيمۆولدىق بەلگىسىنە ۇقساتىلىپ, تاۋەلسىزدىكتىڭ تابارىگىندەي وزگەشە تالعاممەن, تالاپپەن بوي كوتەرىپ, اتىنا زاتى اي ايگىلەنىپ تۇرسا, ەش ارتىقتىق ەتپەيدى. بيلىك تۇتقاسىن ۇستاپ وتىرعان اعالارىنىڭ نازارىنا ءىلىنىپ, «جاستار جىلى» اياسىندا بوي كوتەرىپ جاتسا, قۇبا قۇپ بولار ەدى.
ءومىر ەسقالي,
«ەگەمەن قازاقستان»
پەتروپاۆل
