«بۇگىنگى كۇنى وبەكتيۆتى ءارى اشىق ىرىكتەۋ وتكىزۋ ءۇشىن بارلىق جاعداي جاسالعان. مىسالى, وتكەن جىلى مەملەكەتتىك اكىمشىلىك لاۋازىمدارعا ورنالاسۋعا وتكەن كونكۋرستاردا 26 مىڭنان استام (26608) جاس ۇمىتكەر قاتىستى. ولاردىڭ ىشىندە 10,5 مىڭنان استامى (10732) ءتۇرلى مەملەكەتتىك لاۋازىمدارعا تاعايىندالدى», - دەدى ج. تىلەۋكەنوۆ.
ونىڭ ايتۋىنشا, ءبىر جارىم مىڭنان استام جاس مامان مەملەكەتتىك قىزمەتتە ءتۇرلى باسقارۋشى لاۋازىمداردا جۇمىس جاساۋدا. مىسالعا, 2370 اۋىلدىق وكرۋگ اكىمدەرىنىڭ 94-ءى - 29 جاسقا دەيىنگى ازاماتتار.
سونىمەن قاتار, قىزمەتكەردىڭ سىڭىرگەن ەڭبەگىنە نەگىزدەلگەن كەزەڭ-كەزەڭمەن مانساپتىق ءوسۋ قامتاماسىز ەتىلۋدە. وتكەن جىلى ىشكى كونكۋرستارعا قاتىسۋ ارقىلى 7 مىڭعا جۋىق جاس قىزمەتكەر لاۋازىمىن جوعارلاتقان.
«قولىنا ديپلوم العان 22 جاسار جاس مامان ءوزى ءۇشىن مەملەكەتتىك قىزمەت پەن جەكە سەكتور اراسىندا شەشۋشى تاڭداۋ جاساۋى ءتيىس. بۇدان ءارى ول تاڭداعان باعىتتان بۇرماي, ىشتەي دامىپ, مانساپتىق ساتى ارقىلى رەت-رەتىمەن كوتەرىلەدى», - دەپ تۇيىندەدى.
