سونىمەن 2005 جىلى «قازاقستان – وڭتۇستىك كورەيا» دوستىق قوعامىنىڭ باستاماسىمەن, قازاقستان سىرتقى ىستەر مينيسترلىگىنىڭ الماتىداعى كەڭسەسى دە قولداپ, يۋنيسەف-قازاقستان بالالار قورى مەن قازاقستانداعى وڭتۇستىككورەيالىق ىسكەرلەر قاۋىمداستىعى قولپاشتاپ, جاقسى ءبىر جوبا جۇزەگە اسقان ەدى. وسىلايشا مەملەكەتارالىق قارىم-قاتىناستار تاجىريبەسىنە رەسمي ەمەس ديپلوماتيالىق بىرلىك ەنىپ − قازاقستان مەن وڭتۇستىك كورەيا حالىقتارى اراسىندا بەيبىتشىلىكتىڭ بالا ەلشىسى پايدا بولدى.
سودان بەرى دە زىر ەتىپ ءبىر مۇشەل ۋاقىت وتە شىققان ەكەن. ەندەشە قازاقستان كورەيلەرى قاۋىمداستىعىنىڭ الماتىداعى باس كەڭسەسىندە 16 جاسقا تولعان ناري ەرمۇحانوۆاعا قازاقستان رەسپۋبليكاسىنىڭ ازاماتى كۋالىگى سالتاناتتى تۇردە تاپسىرىلدى.
قاراپ وتىرساق, ناريدىڭ دۇنيەگە كەلگەنى دە قىزىق. 2002 جىلى ۋدز كورسەتۋى بويىنشا ۇل كۇتىپ جۇرگەن ەرمۇحانوۆتاردىڭ وتباسىندا كەرىسىنشە... ەكىنشى ءسۇپ-سۇيكىمدى قىز دۇنيەگە كەلەدى. ءدال وسى ءسۇيىنشىلى ساتتە ازيا قۇرلىعىندا ءوتىپ جاتقان فۋتبول ماتچتارى دا اياقتالىپ, سۋديا ىسقىرىعى ەستىلەدى. سول ساتتە وڭتۇستىك كورەيا ۇلتتىق كومانداسىنىڭ ەۋروپانىڭ ازۋلى كومانداسىن جانكەشتىلىكپەن جەڭۋى «فۋتبول فاناتىنا» جىگەرلى اسەر بەرىپ, دۇنيەگە كەلگەن سابيىنە كورەي حالقىنىڭ ەسىمىن بەرۋگە شەشىم قابىلدايدى. سول ساتتە ارىپتەسىمىز ماناربەك ەرمۇحانوۆ ءوز قيالىندا كەلەشەكتە قازاقستاننىڭ ۇلتتىق قۇراماسى دا تەڭبىل دوپتىڭ الەمدىك تارلاندارىن ويسىراتا جەڭەتىن ويىنشىلارعا اينالسا دەگەن ارمان بولعانىن ايتادى.
ون التى جىل بۇرىن جۋرناليست ماناربەكتىڭ نارەستەسىنە ناري ەسىمىن بەرۋگە قازاقستان كورەيلەرى قاۋىمداستىعى عانا ەمەس, ەلىمىزدىڭ فۋتبول فەدەراتسياسى دا ارالاسىپ, قۋانىشىنا ورتاقتاسادى. جانە بۇل جاڭالىق كوپ ۇزاماي «KBS» كورەي ۇلتتىق تەلەارناسىنان دا كورسەتىلەدى. وسىدان كەيىن اراعا ءۇش جىل سالىپ «جاس وتاۋ» نەكە سارايىندا وتكەن وڭتۇستىك كورەيا ەلى تاۋەلسىزدىگىنىڭ 60 جىلدىعىنا ارنالعان سالتاناتتى جيىندا ناري الەم ەلشىسى اتانادى.
13 جىلدى ارتقا تاستاعان وسىناۋ قوعامدىق باستاما ەكى مەملەكەتتىڭ پرەزيدەنتتەرى – نۇرسۇلتان ءابىش ۇلى نازارباەۆ پەن نو مۋحەن تاراپىنان قولداۋ تاۋىپ, بەلدى باسىلىمنىڭ بىرىندە اتالىپ وتكەنى دە ەستە.
جانە بۇل وقيعا وسى سالتاناتتى ساتكە كۋا بولعان رەسەي حالىق جازۋشىسى اناتولي كيمدى دە تولقىتىپ, «ارينا» اتتى كەزەكتى رومانىنىڭ سيۋجەتىنە اسەرلى وزگەرىستەر ەنگىزەدى.
مىنە, سول ناري دا كامەلەتتىك جاسقا تولدى. قازىر الماتىداعى №111 گيمنازيانىڭ ۇزدىك شاكىرتتەرىنىڭ ءبىرى. سۇيىكتى پاندەرى بويىنشا ءوز مەكتەبىنىڭ نامىسىن قالالىق, رەسپۋبليكالىق بايقاۋلاردا قورعاپ جۇرگەن وزات وقۋشى. باسكەتبول مەن سپورتتىق بي جارىستارىندا دا زامانداستارىنا دەس بەرمەيتىن دارىن. ونىڭ شەبەر قولدارى ساز بالشىقتان تاماشا مۇسىندەر تۋدىرىپ, كەستە توقۋدان دا جالىقپايدى.
انا تىلىمەن قوسا اعىلشىن ءتىلىن ەركىن مەڭگەرگەن تاۋەلسىزدىكتىڭ ءتولى قازاقستان كورەيلەرى قاۋىمداستىعى ۇيىمداستىرعان بارلىق شارالاردىڭ ەڭ جاس تا سۇيكىمدى قوناعى.
بولاشاقتا ديپلومات بولۋدى ويلاستىرىپ جۇرگەن ناري بۇكىل وركەنيەتتى الەم كوكسەگەندەي, كەلەشەكتە كحدر مەن وڭتۇستىك كورەيانىڭ بىرىگىپ, بىرەگەي ەلگە اينالۋىن ارماندايدى.
ايناش ەسالي,
«Egemen Qazaqstan»
الماتى
