حالقىمىزدىڭ اياۋلى اقىن قىزى, قازاقستاننىڭ ەڭبەك سىڭىرگەن قايراتكەرى, «الاش» حالىقارالىق ادەبي سىيلىعىنىڭ يەگەرى, باتىس قازاقستان وبلىسىنىڭ قۇرمەتتى ازاماتى, قۇرمەت وردەنىنىڭ يەگەرى اقۇشتاپ باقتىگەرەەۆا 2018 جىل قورىتىندىسىندا قازاقستان رەسپۋبليكاسىنىڭ مەملەكەتتىك سىيلىعىنا يە بولعان ەدى. ەل-جۇرتى ەركەلەتىپ «اق جايىقتىڭ اق شاعالاسى» دەپ اتاعان اقىننىڭ 75 جىلدىق مەرەيتويى باتىس قازاقستان وبلىسىندا جىل بويى جالعاسادى. اقىننىڭ تۋعان جەرى بقو-نىڭ تەرەكتى اۋدانىندا وتكەن شارادا باتىس قازاقستان وبلىستىق مادەنيەت باسقارماسىنىڭ باسشىسى قادىربولات مۇساعاليەۆ وسىلاي دەدى.
اۋىلداعى شاراعا الماتى قالاسىنداعى قازاقستان رەسپۋبليكاسى ۇلتتىق كىتاپحاناسى ونلاين كوپىر ارقىلى جالعانىپ وتىردى. كىتاپحانا ديرەكتورىنىڭ ورىنباسارى اجار حاميتقىزى ۇلتتىق كىتاپحانادا اقۇشتاپ باقتىگەرەەۆانىڭ 1967 جىلى جارىق كورگەن ء«ورىمتال» كىتابىنان باستاپ بارلىق جيناعى ساقتالعانىن, مەرەيتويلىق شارالار الاتاۋ تورىندە دە ۇيىمداستىرىلاتىنىن ايتتى.
- مەرەيتويعا وراي جازبا اقىندار اراسىندا «عالامات جىر تۋدىرار اقىن بەينە» اتتى رەسپۋبليكالىق جىر ءمۇشايراسى ۇيىمداستىرىلادى. ءتۇرلى ادەبي-مادەني كەشتەر مەن كىتاپ كورمەلەرى, تاربيە ساعاتتارى, اقۇشتاپ وقۋلارى ءوتىپ, اقجايىق مەكتەبىندە اقىن سىنىبى اشىلادى. اقىن مەرەيتويى قىركۇيەك ايىندا تۋعان جەرى – اقجايىق اۋىلىندا كەڭ كولەمدە وتەتىن رەسپۋبليكالىق شارامەن قورىتىندىلانادى, - دەدى تەرەكتى اۋدانىنىڭ اكىمى ءادىل جولامانوۆ.
قازاقستان جازۋشىلار وداعىنىڭ مۇشەسى, اقىن عايساعالي سەيتاق اقجايىق پەن اقۇشتاپتىڭ اجىراماستاي ەگىز ۇعىمعا اينالعانىن ايتا كەلىپ, اقىن شاڭىراعىنا ونەر كيەسى قونعانىن ولەڭمەن ءورىپ بەردى.
- اق جايىق اقسا قاسىنان,
شابىت تا شالقىپ تاسىعان.
كۇيمەنەن تۇندىك تۇرىلسە,
ولەڭمەن قايتا اشىلار.
كورەتىن ءبارىن دوسىنداي,
ورالدا ءۇي بار وسىنداي!
عازيزا جەتسە اڭساپ ءبىر,
قوبىز دا قالماس قوسىلماي, - دەدى اقۇشتاپ اقىننىڭ ونەردەگى ءىنىسى عايساعالي ساميعوللا ۇلى. مۇنىڭ ءمانىسى – اقىن جارى عابدىراحيم مارال ۇلىنىڭ – شەبەر دومبىراشى, قىزى عازيزانىڭ – حالىقارالىق دەڭگەيدە تانىلعان قوبىزشى ەكەنىن نۇسقاعانى ەدى.
تەرەكتىدە وتكەن شارادا قازاقستان جازۋشىلار وداعىنىڭ مۇشەسى, اقىن ايتقالي نارىكوۆ, جازۋشى, قازاقستان جازۋشىلار وداعىنىڭ مۇشەسى باۋىرجان عۇبايدۋللين, جەرگىلىكتى اقىندار ساعىنتاي بيسەنعاليەۆ پەن تىلەس جازىقباي دا ءسوز سويلەپ, اقىن شىعارماشىلىعى حاقىندا وي ءبولىستى. بۇل كەش اقىن جىرلارى اسقاقتاعان, مەرەيتوي يەسىنە حالىق ماحابباتى توگىلگەن ءبىر ءسات بولدى.
باتىس قازاقستان وبلىستىق مادەنيەت باسقارماسىنىڭ باسشىسى قادىربولات مۇساعاليەۆتىڭ ايتۋىنشا, وڭىردە ادەبيەتىمىزدىڭ بىرەگەي تۇلعالارىنىڭ ەسىمدەرىن ۇلىقتاۋ, شىعارماشىلىعىن ناسيحاتتاۋ جۇمىسى جۇيەلى جۇرەدى. ماسەلەن, بىلتىر اقىن تايىر جاروكوۆ پەن جازۋشى, مەملەكەتتىك سىيلىقتىڭ يەگەرى حامزا ەسەنجانوۆتىڭ 110 جىلدىعى كەڭ كولەمدە اتالىپ ءوتتى. الداعى جىلى قازاقستان حالىق جازۋشىسى, كسرو جانە قازاقستان مەملەكەتتىك سىيلىقتارىنىڭ لاۋرەاتى جۇبان مولداعاليەۆتىڭ 100 جىلدىعى دا جوعارى دارەجەدە تويلانباق.
قازبەك قۇتتىمۇرات ۇلى,
«Egemen Qazaqstan»
باتىس قازاقستان
