ال بيىل مەملەكەت باسشىسىنىڭ « ۇلى دالانىڭ جەتى قىرى» ماقالاسى اياسىندا «احمەت ياساۋي» تەلەحيكاياسىن, ء«ال-فارابي» كوركەم ءفيلمىن جانە «قامبار باتىر», «ساۋران قالاشىعى» انيماتسيالىق فيلمدەرىن ءتۇسىرۋ جوسپارلانعان. بۇل دەرەكتەردى باسقارما باسشىسىنىڭ مىندەتىن اتقارۋشى اسىلحان تەمىرحان وبلىس اكىمى جانسەيىت تۇيمەباەۆقا وتكەن جىلعى اتقارعان جۇمىستارى جونىندە ەسەپ بەرۋ كەزىندە ءمالىم ەتتى. «وبلىس ورتالىعى تۇركىستان قالاسىنا كوشىرىلۋىنە بايلانىستى 12 وبلىستىق مادەنيەت جانە ونەر مەكەمەسى شىمكەنت قالاسىنا بەرىلدى. ال, وبلىستاعى مادەني وشاقتاردىڭ ماتەريالدىق-تەحنيكالىق بازاسىن نىعايتۋ ءۇشىن 117 ملن. 741 مىڭ تەڭگە قارجى قارالدى. وعان اۆتوكولىك, ساحنالىق كيىمدەر باسقا دا قۇرال-جابدىقتار ساتىپ الىندى», – دەدى باسقارما باسشىسى. سونداي-اق وتكەن جىلى ايماقتا وتاندىق جانە الەمدىك مادەنيەت تۋىندىلارىنا قولجەتىمدىلىگىن قامتاماسىز ەتۋ ماقساتىندا 29 967 ءىس-شارا ۇيىمداستىرىلعان. بۇگىندە تۇركىستان وبلىسىندا 678 مادەنيەت جانە ونەر مەكەمەسى حالىققا مادەني قىزمەت كورسەتۋدە.
وبلىس اكىمى باسقارما باسشىسىنا ق.ا.ياساۋي كەسەنەسىندەگى تۇلعالاردىڭ ءتىزىمى, ءومىربايانى مەن تاريحي دەرەكتەرى جانە تۇركىستان قالاسى تۋرالى اقپارات جيناقتاپ, كىتاپ شىعارۋدى تاپسىردى.
عالىمجان ەلشىباي,
«Egemen Qazaqstan»
تۇركىستان وبلىسى
