مەملەكەتتىك قىزمەتشىلەر جۇمىس ورنىندا اتشاپتىرىم كابينەت, ارتىق الاڭ پايدالانباۋى ءتيىس. مۇنداي الاڭ بولسا, ونى ءتيىمدى قولدانىپ, وزگە مەملەكەتتىك مەكەمەلەرگە نەمەسە جەكە قۇرىلىمدارعا جالعا بەرۋى ءتيىس. وسى ارقىلى مەملەكەت قارجىسىن ۇنەمدەۋگە جانە كىرىس كىرگىزۋگە بولادى.
قازاقستانداعى مەملەكەتتىك قىزمەتشىلەر ءارتۇرلى دەڭگەيىنە بايلانىستى قىزمەت الاڭىمەن قامتىلۋى كەرەك. مىسالى, قاراپايىم قاتارداعى قىزمەتشىگە 7,5 شارشىمەتر جۇمىس ورنى تيەسىلى بولسا, اۋىل اكىمى – 15, اۋدان اكىمى – 36, وبلىس اكىمى – 54 شارشىمەتردەن ارتىق كابينەتتى پايدالانا المايدى. مۇنىڭ ءبارى قازاقستان رەسپۋبليكاسى قارجى ءمينيسترىنىڭ 2015 جىلعى 17 ناۋرىزداعى «مەملەكەتتىك ورگانداردى قىزمەتتىك جانە كەزەكشى اۆتوموبيلدەرمەن, تەلەفون بايلانىسىمەن, كەڭسە جيھازىمەن جانە مەملەكەتتىك ورگانداردىڭ اپپاراتىن ورنالاستىرۋ ءۇشىن الاڭدارمەن قامتاماسىز ەتۋدىڭ زاتتاي نورمالارىن بەكىتۋ تۋرالى» №179 بۇيرىعىمەن بەكىتىلگەن.
- وسى بۇيرىق شارتتارىنىڭ قالاي ورىندالىپ جاتقانىن انىقتاۋ ءۇشىن جاقىندا قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ باتىس قازاقستان وبلىسى بويىنشا دەپارتامەنتى ارنايى ءۇش توپ قۇرىپ, وبلىستاعى مەملەكەتتىك ورگاندار پايدالانىپ وتىرعان ارتىق الاڭداردى انىقتاۋ بويىنشا جۇمىس جۇرگىزدى, - دەيدى وسى دەپارتامەنت باسشىسىنىڭ ورىنباسارى امانقوس جۇبانىش.
تەكسەرۋگە وبلىس اۋماعىنداعى 459 مەملەكەتتىك ورگان قامتىلعان. ناتيجەسىندە وبلىستىق مەملەكەتتىك مەكەمەلەردە 4433 شارشىمەتر, قالالىق ورگانداردا – 1519, اۋداندىق اتقارۋ ورگاندارىندا 17829 شارشىمەتر الاڭ ارتىق پايدالانىلىپ وتىرعانى انىقتالعان. الايدا وسى كولەمنىڭ 10 مىڭ شارشىمەترگە جۋىق بولىگىن عانا وڭتايلاندىرۋ, ياعني ۇنەمدى پايدالانۋعا بولادى. ال قالعان 12475 م2 الاڭ بولمە بولىكتەرىنەن تۇرادى. عيماراتتار ەسكى, بولمەلەر ستاندارتقا ساي ەمەس, ونى قايتا جاساقتاۋ ءتيىمسىز, قارجى شىعىنى اقتالمايدى. اۋىلدا, الىس ەلدىمەكەندەردەگى ارتىق الاڭدى جالعا الۋشى جوق. كەيبىر كونە عيماراتتار ءحىح عاسىردىڭ تاريحي ەسكەرتكىشى رەتىندە مەملەكەتتىك قورعاۋعا الىنعاندىقتان, ول جەردە بولمەلەردى قايتا بولۋگە مۇلدەم بولمايدى.
- وڭتايلاندىرۋعا جاتادى دەگەن 9666 شارشىمەترلىك الاڭنىڭ 1962 شارشىمەترىن قىسقارتىپ, قازىردىڭ وزىندە جىلىنا 2,5 ملن تەڭگەدەن ارتىق قارجى ۇنەمدەدىك. جوسپارىمىز تولىق جۇزەگە اسسا, جىلىنا 16,7 ملن تەڭگەنى ۇنەمدەيمىز, - دەيدى امانقوس ساعىن ۇلى.
2018 جىلدىڭ قورىتىندىسى بويىنشا باتىس قازاقستان وبلىسىنىڭ جەرگىلىكتى اتقارۋشى ورگاندارى ءوز يەلىگىندەگى 4,4 مىڭ شارشىمەتر الاڭدى 70 كاسىپكەرگە جالعا بەرىپ, مەملەكەت قازىناسىنا 13,8 ملن. تەڭگە پايدا تۇسكەن. بىراق بىرقاتار مەملەكەتتىك ورگان 2,1 مىڭ شارشىمەتر الاڭدى وزگەلەردەن جالعا الىپ, ول ءۇشىن 36,3 ملن. تەڭگە قازىنا قارجىسىن شىعىنداعان.
مەملەكەتتىك قىزمەت سالاسى قارجى شىعىندارىن ۇنەمدەۋ ءىسى بيىل جىل باسىنان بەرى قاتاڭ قولعا الىنىپتى. ماسەلەن, اقجايىق اۋداندىق جەر قاتىناستارى ءبولىمى بۇعان دەيىن «نۇر وتان» پارتياسىنىڭ عيماراتىنان 45,5 شارشىمەتر الاڭدى جالعا الىپ, ول ءۇشىن جىلىنا بيۋدجەتتەن 1 061 428 تەڭگە تولەپ كەلسە, بيىلعى 1 قاڭتاردان باستاپ اۋدان اكىمدىگى عيماراتىنان ورىن تاپتى. ال اقجول, المالى, بازارشولان, جامبىل, جاڭابۇلاق, قابىرشاقتى, قاراۋىلتوبە, كونەككەتكەن, قۋرايلىساي, مەرگەن اۋىلدىق وكرۋگتەرى بوس الاڭدارىن «قازپوشتا» مەكەمەسىنە, جاستار رەسۋرستىق ورتالىقتارىنا, پوليتسيا بەكەتى مەن مال دارىگەرى ماماندارىنا بەرۋ ارقىلى قوسىمشا تابىس تاۋىپ, عيماراتتارىنىڭ بوس تۇرىپ, ازىپ-توزۋىنان قۇتقاردى.
سونداي-اق قاراتوبە اۋداندىق ءماسليحاتى وزىنە قاراستى عيماراتتا كابينەتتەردى قايتا ءبولۋ جۇمىسىن جۇرگىزىپ, جاڭادان پايدا بولعان ەكى بولمەگە مال دارىگەرلىك ءبولىمى ماماندارى مەن قوعامدىق كەڭەس توراعاسىن ورنالاستىرعان. وسى ارقىلى بيۋدجەتتىڭ 1,02 ملن تەڭگەسى ۇنەمدەلىپتى. تەرەكتى اۋداندىق كاسىپكەرلىك ءبولىمى دە ەكى كابينەتىن جالعا الۋشىلارعا بوساتىپ بەرىپ, جىلىنا 499 مىڭ تەڭگە ۇنەمدەگەن.
سوڭعى ءۇش جىل ىشىندە وڭىردەگى مەملەكەتتىك مەكەمەلەر وتىرعان الاڭداردى وڭتايلاندىرۋ ناتيجەسىندە 5456,8 شارشىمەتر ۇنەمدەلگەن ەكەن. 2016-2019 جىلدار اراسىندا كابينەت جانە كولىك شىعىندارى ءۇشىن 54 ملن تەڭگە بيۋدجەت قارجىسى ۇنەمدەلگەن.
- وتكەن جىلى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ جەرگىلىكتى فيليالىمەن بىرىگە وتىرىپ مەملەكەتتىك ورگاندار مۇلكى مەن شىعىندارىن تولىق تىزىمدەپ شىقتىق, - دەيدى قر قارجى مينيسترلىگى مەملەكەتتىك م ۇلىك جانە جەكەشەلەندىرۋ كوميتەتى بقو مەملەكەتتىك م ۇلىك جانە جەكەشەلەندىرۋ دەپارتامەنتىنىڭ باسشىسى ەرمەك سۇيەرباەۆ.
بارلىعى 110 مەملەكەتتىك مەكەمەنى قامتىعان ينۆەنتاريزاتسيا جۇمىسى ناتيجەسىندە ارتىق پايدالانىلىپ وتىرعان 4312 شارشىمەتر الاڭ قايتارىلعان.
قازاقستاندا مەملەكەتتىك لاۋازىمدى تۇلعالارعا اتقارعان قىزمەتى ءۇشىن حالىقتان سىيلىق الۋعا تيىم سالىنعان. ءتارتىپ بويىنشا مۇنداي سىيلىق جەرگىلىكتى اتقارۋشى ورگانعا ءبىر اپتا ىشىندە تاپسىرىلۋى ءتيىس. سوڭعى ءۇش جىل ىشىندە باتىسقازاقستاندىق شەنەۋنىكتەر وسىنداي 48 سىيلىقتى مەملەكەتكە تاپسىرعان. «ول سىيلىق ارنايى باعالاۋدان وتكەن سوڭ ساۋداعا شىعارىلىپ, بيۋدجەتكە 2,5-3 ملن تەڭگەدەي تابىس ءتۇستى» دەيدى ەرمەك سۇيەرباەۆ. سىيلىقتاردىڭ ىشىندە سىيقادەلەر, اراق-شاراپ, كونفەت جانە باسقا نارسەلەر بولىپتى.
قازبەك قۇتتىمۇرات ۇلى,
«Egemen Qazaqstan»
باتىس قازاقستان
