بيىلعى دۋمان وڭىردەگى 15-كە جۋىق كۇمىس كومەي ساڭلاقتار مەن ساحنا تورىنە ەندى قادام باسىپ كەلە جاتقان جاس ونەرپازداردىڭ باسىن بىرىكتىردى. ولار ءان ونەرىنىڭ نەگىزىن ءمارماردان قالاپ, ەسىمدەرى التىن ارىپپەن جازىلعان ءشامشى قالداياقوۆ, اسەت بەيسەۋوۆ, نۇرعيسا تىلەنديەۆتەردىڭ اندەرىن ورىنداپ قالىڭ كوپشىلىكتىڭ كوڭىلىن جادىراتتى.
ۇلتتىق ونەرگە شولىركەپ قالعان كوكشە جۇرتى ساحنا تورىندەگى ءوڭىر انشىلەرىنىڭ ونەرلەرىنە ءتانتى بولىپ, ءار ءاندى بىرگە قوسىلىپ شىرقادى. شارا كەنجەبەك كۇمىسبەكوۆ اتىنداعى قازاق حالىق اسپاپتار وركەسترىنىڭ سۇيمەلدەۋىمەن وتكەن كەشتىڭ شىمىلدىعى ءشامشى قالداياقوۆتىڭ «كوگىلدىر كوكشە» انىمەن ءتۇرىلدى.
– ءبىز بۇگىنگى شارانى ادەيى دەمالىس كۇنىنە قويىپ وتىرمىز. سەبەبى تۇراقتى كورەرمەندەرىمىز اپتانىڭ ورتاسىندا جۇمىستارىنا بايلانىستى شاراعا كەلە الماي جاتادى,–دەيدى ۇكىلى ىبىراي اتىنداعى اقمولا وبلىستىق فيلارمونياسى ديرەكتورىنىڭ ورىنباسارى جۇماگۇل قايىموۆا.
تازا, جاندى داۋىستا وتكەن اتالمىش كەشكە ونەرپازدار ەكى اي دايىندىق جۇرگىزگەن ەكەن. تىڭعىلىقتى دايىندىقتىڭ ارقاسىندا ۇسىنىلعان كونتسەرتتىك باعدارلاما حالىق كوڭىلىنەن شىقتى. ونەرپازداردىڭ اراسىندا ەلدىڭ ەركەسىنە اينالىپ, وزىندىك سارا جولىن قالىپتاستىرىپ جۇرگەن انشىلەر دە بار.
–بۇل كەشتى حالىق اسىعا كۇتەدى. ءبىزدىڭ باستى ماقساتىمىز كەشەگى اعا-اپالارىمىزدىڭ اندەرىن بۇگىنگى جاستارعا ناسيحاتتاۋ. سونداي-اق ءبىزدىڭ ۇجىمداعى جاس ونەرپازدار وسىنداي كونتسەرتەر ارقىلى شىڭدالادى,–دەيدى قازاقستان رەسپۋبليكاسىنىڭ ەڭبەك سىڭىرگەن ءارتىسى عازيزا جۇمەكەنوۆا.
كونتسەرتتە 60-80-ءشى جىلدار ارالىعىنداعى اسەم اندەر شىرقالىپ, كوزى قاراقتى كورەرمەن قاۋىم بىرەر ءسات سول داۋىرگە ساياحات جاساپ قايتتى. ورىنداۋشىلار تەك قانا ءاندى اسەرلى جەتكىزىپ قويماي, سول كەزەڭدەگى كيىم ۇلگىسىن دە ەسكە سالدى.
–بۇگىن مەن بالالىق شاعىمداعى اسەم اندەردى تىڭداپ ءبىر جاساپ قالدىم. كەشتى وتە جاقسى ۇيىمداستىرعان. مىڭ جىل وتسە دە ءوز ءمانى مەن ماعىناسىن جويماتىن وسىنداي عۇمىرلى اندەر عوي,–دەيدى كورەرمەن ءداريا نيازبەكوۆا.
ۇكىلى ىبىراي اتىنداعى ءان ونەرىنىڭ قازىنالى قارا شاڭىراعى ءار اي سايىن جاڭا كونتسەرتتىك باعدارلاما دايىنداپ, تىڭدارماندارىن قۋانتۋدان جالىققان ەمەس. وعان دالەل 2018 جىلى 224 كونتسەرت وتكىزىپ, 38 مىڭعا جۋىق كورەرمەنگە قىزمەت كورسەتكەن ەكەن. بيىل دا بىرقاتار تىڭ جوبالار قولعا الىنۋدا.
بايقال ءبايادىل,
«Egemen Qazaqstan»
اقمولا وبلىسى
