بىلتىر مەكتەپ اسحانالارىنىڭ بىرقاتار وزەكتى ماسەلەسىن شەشۋ جانە اتا-انالار كوميتەتىنىڭ, اسحانالاردى جالعا الۋشىلاردىڭ, مەكتەپ اكىمشىلىگى مەن ءبىلىم باسقارماسى وكىلدەرىنىڭ ءىس-ارەكەتىن ۇيلەستىرۋ ءۇشىن «نۇر وتان» پارتياسى «مەكتەپ اسحانالارى» جوباسىن ازىرلەگەن ەدى. جوبانى جۇزەگە اسىرۋ ماقساتىندا ءوڭىر مەكتەپتەرىندەگى اسحانالارعا مونيتورينگ جۇرگىزىلىپ كەلەدى. مەكتەپ اسحانالارىنداعى تاعامداردىڭ ساپاسى مەن اسحانا ستاندارتتارىن تەكسەرۋ ماسەلەسى بويىنشا ارنايى ساراپتامالىق توپ تاماقتانۋ ورىندارىنىڭ جاي-كۇيىمەن تانىستى. ساراپشىلار تاعام ساپاسىن, سانيتارلىق ەرەجەلەردىڭ ساقتالۋىن, باعالار مەن ءتيىستى قۇجاتتامالاردى تەكسەرىپ شىقتى.
– مەكتەپكە ارنايى ساراپشىلار كەلىپ, اسحانا جۇمىسىمەن تانىستى. ەشقانداي ەسكەرتۋ ايتىلعان جوق. كۇنىنە شامامەن 220 وقۋشىنى تاماقتاندىرامىز. بالالاردىڭ دۇرىس تاماقتانۋىنا شاما-شارقىمىزشا تىرىسىپ ءجۇرمىز, – دەيدى «فليۋرا» جەكە كاسىپكەرلىگىنىڭ ديرەكتورى ليليا جەتپىسوۆا.
وقۋشىنىڭ دۇرىس تاماقتانۋىنىڭ ماڭىزى زور. سول سەبەپتى تەكسەرىستەن وتكەن ءۇش مەكتەپتە وقۋشىلاردىڭ تاماقتانۋىنا ارنايى كەستە ءتىزىپ, جىلدام ءارى ساپالى اس ىشۋىنە جاعداي جاساعان. ءوڭىر مەكتەپتەرىندەگى اسحانالاردى تەكسەرۋ بارىسىندا ورەسكەلەر قاتەلىكتەر مەن ەرەجە بۇزۋشىلىقتار بايقالعان جوق.
ءبىر ايتا كەتەرلىگى, ساراپشىلار مەكتەپتەرگە ەسكەرتۋسىز مونيتورينگ جۇرگىزەدى. مۇنداي ءىس-ارەكەت ولاردىڭ كۇندەلىكتى جۇمىسىنىڭ ناتيجەسىن شىنايى باعامداۋعا سەپتىگىن تيگىزەدى. قازىرگى ۋاقىتتا قالاداعى 13-كە جۋىق مەكتەپتىڭ اسحاناسىنا مونيتورينگ جۇرگىزىلدى. مونيتورينگ بارىسىندا ساراپشىلار اسحانا باسشىلارىنا كەڭەس بەرىپ, جۇمىس ساپاسىنىڭ ودان ءارى جاقسارۋىنا مۇمكىندىك تۋعىزۋدا.
بايقال ءبايادىل,
«Egemen Qazaqstan»
كوكشەتاۋ قالاسى
