اۋدارما • 21 قاڭتار، 2019

شاعىن فەرمالارداعى جوعارعى تەحنولوگيا

387 رەتكورسەتىلدى

ريۆەندەلل فەرماسىنداعى 150-گە جۋىق سيىرعا ولاردىڭ قوزعالىسىن، نە جەگەنىن جانە كۇيسەگەنىن باقىلاپ وتىراتىن قۇرىلعى تاعىلعان. ولاردى روبوت ماشينالار ساۋادى. 

ريۆەندەلل فەرماسىنداعى جەم بەرەتىن روبوت. روسس مانتل، «نيۋ-يورك تايمس»

ستيۆ لور،

«نيۋ-يورك تايمس» – پەنسيلۆانيا (اقش)

تاياۋ ماڭداعى كالە، قىشاتۇس جانە سابىزگە تولى جىلىجاي دا اۆتوماتتاندىرىلعان. ونداعى تەمپەراتۋرا، ىلعالدىق، كۇن ساۋلەسى سەنسور مەن مەتال ەكران ارقىلى باسقارىلادى. سالدەن كەيىن شاعىن روبوتتار ءۇش گەكتار كوكونىس القابىن ارالاپ، اۋرۋدى انىقتاپ، ءدان سەبۋمەن اينالىسادى.

فەرمامەن اينالىسۋ تەحنولوگياعا ارقا سۇيەپ كەلەدى. دروندار، جەرسەرىك سۋرەتتەرى، توپىراق ساپاسىن انىقتايتىن قۇرىلعىلار، سۋپەر كومپيۋتەرلەر تاماق ونەركاسىبىنە ۇلكەن كومەك بەرەدى. ايتسە دە، ونداي تەحنولوگيا نەگىزىنەن القابىنىڭ ۇشى-قيىرى جوق الپاۋىت فەرمالارعا ارنالعان.

ىسكە قوسىلعانىنا ءبىر جىل تولعان ريۆەندەلل فەرماسى شاعىن فەرمالارعا قولجەتىمدى تەحنولوگيالار ءتۇرىن ۇسىنادى. ادەتتە ونداي قوجالىقتار كوپ كۇتىمدى قاجەت ەتپەيتىن ارنايى داقىلدار وسىرەدى. ريۆەندەللگە ارنالعان روبوتتار پيتسبۋرگتەگى Carnegie Mellon ۋنيۆەرسيتەتىندە قۇراستىرىلعان.

ريۆەندەللدا وزىق تەحنولوگيا مەن عىلىمي تاجىريبە جۇرگىزۋگە مۇمكىندىك بار. ويتكەنى ونىڭ يەسى توماس تۋلل – ميللياردەر كاسىپكەر، تەحنولوگيا سالاسىنىڭ ينۆەستورى جانە بۇرىنعى پروديۋسەر. ول ريۆەندەللعا ميلليونداعان دوللار جۇمسادى. ونىڭ ايتۋىنشا، جوبا 2020 جىلعا قاراي ءوز-ءوزىن قامتاماسىز ەتە الۋى كەرەك.

سوندىقتان ريۆەندەلل باسقا قوجالىقتاردىڭ قولى جەتپەيتىن تەحنولوگيانى ءبىر ساتتە پايدالانا الادى. ساراپشىلاردىڭ ايتۋىنشا، فەرمانىڭ باعىتى قالىپتاسقان ۇدەرىسكە ۇقسايدى. ياعني، شاعىن قوجالىقتار دەنساۋلىققا پايدالى تاماق ءوندىرىپ، مال شارۋاشىلىعىمەن اينالىسۋ ءۇشىن تىڭايتقىشتار مەن وڭدەلگەن جەم پايدالانباۋدى ءجون كورەدى.

جايىلىمدى، ەگىستىك القابى مەن ورماندى قوسقاندا ريۆەندەللدىڭ اۋماعى 70 گەكتارعا سوزىلىپ جاتىر. اقش-تاعى شارۋا قوجالىقتارى ون جىلدان بەرى بىرىگىپ كەلەدى. 2017 جىلى ولاردىڭ ورتاشا كولەمى 180 گەكتارعا جەتكەن. جىل سايىن ەلدە وندىرىلەتىن اۋىل شارۋاشىلىعى ونىمدەرىنىڭ جارتىسىنان كوبىن اۋماعى ورتاشا ەسەپپەن 1080 گەكتار بولاتىن بىرنەشە الىپ فەرما وندىرەدى.

ريۆەندەللداعى ساۋىن البارىنا بارا قالساڭىز، ءتىرى جان كورمەيسىز. وندا سيىرلار، اۆتوماتتاندىرىلعان جەم بەرۋ جۇيەسى جانە ساۋىنمەن اينالىساتىن ءۇش روبوت ماشيناسى تۇر.

«باقىتتى سيىرلار ءسۇتتى كوبىرەك بەرەدى جانە ساپاسى دا جوعارى»، دەيدى ريۆەندالل فەرماسىنىڭ باس مەنەدجەرى كريستين گرەدي. روسس مانتل، «نيۋ-يورك تايمس»

ءسۇتى جينالعان سيىرلار كۇنىنە ءتورت مەزگىل ساۋىلادى. ال مۇنداي جۇمىستى ادام كۇنىنە ەكى-اق مارتە ورىنداي الادى. فەرمانىڭ باس مەنەدجەرى كريستين گرەديدىڭ ايتۋىنشا، مۇنداعى سيىرلار پروتەينى مەن مايى مول جەم بەرىلگەن ءىرى-قاراعا قاراعاندا 15 پايىزعا كوپ ءسۇت بەرەدى ەكەن.

«ولار قالاعان كەزدە ءشوپ جەپ، قالاعان كەزدە جاتىپ، قالاعان كەزدە جەم جەيدى. باقىتتى سيىرلار ءسۇتتى كوبىرەك بەرەدى جانە ساپاسى دا جوعارى» دەيدى ول.

روبوت ساۋىنشىلار بىرنەشە جىلدان بەرى بار. الايدا تەحنولوگيا دامىعاندىقتان، قازىر روبوتتار بۇرىنعىعا قاراعاندا ادامنىڭ كومەگىن از قاجەت ەتەدى.

ءار قۇرىلعىنىڭ قۇنى شامامەن 200 000 دوللاردى قۇرايدى. گرەدي حانىمنىڭ سوزىنە سۇيەنسەك، ساۋىنشى روبوتتار مەن اۆتوماتتاندىرىلعان جەمدەۋ جۇيەسى بولماعاندا ريۆەندەللدەگى ساۋىن فەرماسى 5 جۇمىسشىنى قاجەت ەتەتىن ەدى. قازىر مۇندا 1 عانا ادام قىزمەت اتقارادى.

مۇنداعى قۇرىلعىلاردى گەرمانيانىڭ Lely كومپانياسى قۇراستىرىپ شىققان. پەنسيلۆانيا مەملەكەتتىك ۋنيۆەرسيتەتىنىڭ قىزمەتكەرى مەتتيۋ حااننىڭ ەسەپتەۋى بويىنشا، ەۋروپاداعى كەيبىر ەلدەردە سيىرلاردىڭ 30 پايىزعا جۋىعى وسىنداي قۇرىلعىمەن ساۋىلسا، اقش-تا بۇل كورسەتكىش 2 پايىزعا تەڭ. ونىڭ سوزىنە سۇيەنسەك، ەۋروپادا اۆتوماتتى ساۋىن ماشينالارىنا كوپتەپ ينۆەستيتسيا سالىنۋى قۇرلىقتاعى جۇمىس كۇشىنىڭ قىمباتتىعىمەن بايلانىستى.

تۋلل مىرزا تەحنولوگيانىڭ قارىشتاپ دامۋى شاعىن فەرمالاردىڭ وزگەرۋىنە زور ۇلەس قوساتىنىنا سەنىمدى.  بىراق بىلتىرعى جاعدايدى ساراپتاپ شىققان ول «فەرمەرلەردىڭ ەڭبەگىنە زور قۇرمەت كورسەتى كەرەك. ولاردىڭ جۇمىسى – اۋىر ءارى قيىن. ەڭ باستى ماسەلە – عىلىم مەن ەڭبەكتى دۇرىس بايلانىستىرا بىلۋ» دەيدى.

سوڭعى جاڭالىقتار

ەلوردادا جالپى جاعداي تۇراقتى

كوروناۆيرۋس • بۇگىن، 14:50

فۋتبول ماۋسىمى جالعاسا ما؟

سپورت • بۇگىن، 14:48

الەمدەگى احۋال قانداي؟

كوروناۆيرۋس • بۇگىن، 10:57

قىزىلوردا: تاعى 3 ادام تىركەلدى

ايماقتار • بۇگىن، 09:57

مما: UFC-ءدى سىنعا الدى

سپورت • بۇگىن، 09:20

ۇقساس جاڭالىقتار