بۇل جونىندە وبلىس اكىمياتىنىڭ اپپارات ماجىلىسىندە وبلىس اكىمى ارحيمەد مۇحامبەتوۆ ايتتى. وتكەن جىلى وبلىس ءبىرىنشى رەت رەسەي مەن وزبەكستانعا 1700 توننا ەت ارتتى. بۇل - سوڭعى جىلدارداعى ەڭ ۇلكەن كورسەتكىش. بيىل وبلىس ەكسپورتقا بۇعان ەكى ەسەگە جۋىق – 3000 توننا ەت شىعارۋدى كوزدەپ وتىر. الايدا, ول وڭاي جۇمىس ەمەس, وعان وڭىردەگى مال شارۋاشىلىعىندا كەشەندى تۇردە جۇمىستار جۇرگىزىلۋى كەرەك.
«الايدا, سىرتقا ارتقان ەتتىڭ كوپ بولىگى ءىرى بورداقىلاۋ الاڭى «سەۆەر اگرو ن» جاۋاپكەرشىلىگى شەكتەۋلى سەرىكتەستىگىنە تيەسىلى. وسى جىلدىڭ العاشقى جارتىسىندا بۇل شارۋاشىلىقتا وتكىزەتىن مال بولمايدى. ال بيىلعى جوسپار بىلتىرعىعا قاراعاندا ەكى ەسەگە جۋىق كوپ. نە ىستەۋ كەرەك سوندا؟ ءبىر شارۋاشىلىقتىڭ عانا بەتىنە قاراپ وتىرۋعا بولمايدى. رەزەرۆ دايىنداۋ كەرەك. مال بورداقىلاۋ الاڭدارىن كوبەيتۋ كەرەك» دەدى ارحيمەد بەگەجان ۇلى.
وبلىس اكىمىنىڭ ورىنباسارى ەرلان سپانوۆ جالپى وبلىستا مال باسىنىڭ كوبەيگەنىن جانە سوعان وراي مالدان الىناتىن ءونىمنىڭ 117,7 ملرد تەڭگە بولعانىن اتاپ ءوتتى. ەت ءوندىرۋ 5 پروتسەنتكە وسكەن. بۇل ورايدا مال باسىنىڭ كوبەيۋىنە «سىباعا» باعدارلاماسىنىڭ ۇلەسى بار. وبلىس وڭىرىندە وسى باعدارلاما بويىنشا شەتتەن 2087 باس ءىرى قارا اكەلىنىپ, جوسپار 112,8 پروتسەنتكە ورىندالعان. 4019 باس ۋاق مال ساتىپ الىنعان. بۇل دا جوسپارداعىعا قاراعاندا ارتىق.
ءنازيرا جارىمبەت,
«EGEMEN QAZAQSTAN»
قوستاناي
